Read Vaiphei EZEKIEL 14 Bible Online

EZEKIEL 14 - Vaiphei bible

EZEKIEL 14

¹Israel upa vaihawmte lak ah khenkhat ka kiang ah hung in, ka âng in a kichu tau a.

²Chun, LALPA‘n ei hun ho a:

³Mihing, ziate hin a milimteu a lunggil un a koidet un, a dukdak lo’nau chu a kipalna ding un a koi tau hi; amau dot leh ho dingin um ding ka hi em?

⁴Ziaziakchun, a kiang un zia gual hin gen in, LALPA‘n zia gual hin a gen hi: Israel Inkuante lak ah a lunggil ua a milimteu koidet ah, a dukdak lonau a kipalna ding ua koi zo kei ah, jawlnei kiang ah hung,

⁵a milimteu ziak ah ei la jamsan ta, Israel Inkuante lungchang chu ka tûktân theina dingin, zia tawhbang milim tam tak nei pum ah hungte chu Keima, LALPA hin dawnhu ing ka.

⁶Ziaziakchun, Israel Inkuante kiang in, LALPA PATHIAN in zia gual hin a gen hi: Kisik unla, la milimteu kiheisan tau in; chun, la ki’dak umnau zosia kiheimangsan tau in.

⁷Kuale, Israel Inkuan lak ah mi hi hen la, gam dang mi Israel gam ah chêng hitaleh, a lungthim ua milim koidet ah, a dukdak lo’nau ah a kipalna ding uh koi zo ta’ngal ah, jawlnei kiang ah thu ei dong ding ah hung taphot chu, Keima, LALPA hin amau chu dawnhu ing ka.

⁸Ziagual mite chu dodâl ing ka tin; tepte’na ding leh mite pau changthiat dingin siam ing ka tin; ka mipite lak ah kipat paitha’ng ka; chuleh, keima hi LALPA ka hi ti he ta’n lau.

⁹Chuleh, jawlnei pakhat chu thep zaw a um ah, thu a gen chun, Keima, LALPA hin zia jawlnei chu ka thep zaw hi’ntin, ama do in ka khut lâm ing ka tin, ka mipite lak ah kipat paitha ding ka hi.

¹⁰Chuleh, a dongte leh dot ah um jawlnei chu a kibang in gawt ding ka hi;

¹¹tichun, Israel Inkuante’n ei jamsan lo ah, a thil bawlkhialnau lampi zui ah a kisubuak kit tâklo’na ding un. Ziaphat chuleh, ka mite hita’n tiu in, keile amau Pathian hita’ng ka, LALPA PATHIAN in a ti ahi.

¹²LALPA‘n ka kiang in:

¹³Mihing, gam pumpi’n ginum lo tak ah ei gitlosan phat uh leh, ka khut amau do in ka lâm ah, a ankuang uh bunkhup in, kialna ka tunsak sek ah; chuleh, gancha leh a mihing chanpiu lakah kipat in ka paitha sek in,

¹⁴Noah, Danial leh Job cheng thum khanle amau dikna ziakin, amau hinna bep a hukdok thei uh ahi kha, LALPA PATHIAN in a ti ahi.

¹⁵A gam susia ding ah gam sahângte ka sawl lut chun, a gam chu nutsia’n um ta’n tin, gam sahângte a lau ziak un, kuama’n haw ngam talo ding a hiu;

¹⁶zia mi pathumte hi a la chêng hileule, a chapateu leh a chanuteu le hukdok thei diak pua’n tiu in, amau bep hukdaw hi’n au; a gam chule nutsia in um tho tho in ah, ti’n sia ka sam hi, LALPA PATHIAN in a ti ahi.

¹⁷Ahiloleh, zia gam chu gawt ding ah chemjam ka sawl ah, “Chemjam in a gam pumpi that hen,” ka ti ah, a gam ah gancha leh mihing a thâ gam chun,

¹⁸zia mi pathumte hi a khua sung chun a la um ziangleu le, a chapateu leh a chanuteu hukdok diak pua’n tiu in, amau bep hukdaw in um in au, ti’n LALPA PATHIAN in a gen hi.

¹⁹Ahiloleh, zia gam ah chun natpi ka sawl ah, a chung ua ka lungnatna thisan tawh kihel, mihing leh gancha that gam ding ah a chung ua ka butthâk chun,

²⁰Noah, Danial leh Job, a sung ah um hiziang leule, a chapateu leh a chanuteu hukdok thei diak pua’n au; amau dikna ziakin amau hinna bep hukdaw hiding a hiu, ti’n LALPA PATHIAN in sia a sam tai.

²¹LALPA PATHIAN in zia gual hin a gen ngal a: Jerusalem gawtna palite, chemjam, kialna, gam sahângte leh natpi, mihing leh gancha that gam ding ah ka hun sawl hun ding chu a huaisia na ding e!

²²Himaleh, a suakcha um nalai intiu in, chapate leh chanute puidok in um in au; amau chu la kiang ah hung in au. A umdanteu leh a thilbawl danteu la mu phat leh vang, Jerusalem chung ah keima thilbawl siatna ka hun guitunsak zosia ah hin lungkim ta’n la.

²³A umdanteu leh a thilbawl danteu la mu phat leh, amau chun hun thamuan ta’n au; ziaphat chuleh, a chung ah ka thilbawl zosia hi a ziak leh jal bei ah ka bawl hilo ahi ti he ta’n la, LALPA PATHIAN in a ti ahi.