Read Vaiphei EZEKIEL 16 Bible Online

EZEKIEL 16 - Vaiphei bible

EZEKIEL 16

²Mihing, Jerusalem chu ki’dak a umdan zosia hiatsak inla,

³a kiang in, LALPA PATHIAN in Jerusalem kiang in zia gual hin a gen hi, ti’n: La kipatna leh la pianna chu Kanaan gam ahi; la pa chu Amor mi ahi’n, la nu chu Hit mi ahi.

⁴La pian dan chu: la pian ni khan la laigui ât lo, tui ah le sil hilo, chi le nu’ hilo ah um, naupuan ah le tuam hilo la hi.

⁵Kuama’n lainatna mit ah hun en le umlo leh, a hun khawtua ziak ah la chung ah bangma bawl nuam le umlo a hiu kha; ahi’n, gamlak ah paimang in la um in, la pian ni kipat khan mite ki’dak la hi.

⁶La umna kiang ka hun haw malam leh, la thisan lak ah kibual in ka hun mu’n. La thisan lak ah kibual ah la um lai in la kiang in, “Hing inla,

⁷loulai hampa gual in hung khang in,” ka la ti hen. La hung khang tul tul ah, la hung sâng ta’n, nungak ting la hung hi tai; la nawite a hung kisiam ta’n, la samle a hung sau tai; himaleh, ngawnchang leh nîk leh puan bei la hi nalai hi.

⁸La kiang hun haw in, ka hun et kit leh, dawichâk ah ngai thei la hung hi tai. Ka puanâk chual mong la chung in ka kaipal ah, la ngawnchang hi’na chu ka khû tai; la kiang in kitiamna ka nei in, nang tawh I kikâl in thuthung ka siam a; tichun, nang chu kei â la hung hi tai, LALPA PATHIAN in a ti ahi.

⁹Ziaphatchun, tui in ka hun sil ah, la chung ah thisan chu ka silthiang ta’n; chuleh, sathau ka hun nu’ tai.

¹⁰Puanjem hoi tak ah hun thuam in, savun pha chi kengtawdap ka hun busak ta’n; puan malngat ka hun kop sak in, puan man tam tak ka hun sil sak tai.

¹¹Kicheina’n ka hun thuam a: La bân ah chaucha leh la ngawng ah sana khi,

¹²la nâk ah nâkbu, la bil ah bilba leh la luchang ah sana lukhuk ka koi hi.

¹³Sana leh dangka’n ka hun thuam ah, la nîk leh puante chule puan malngat, puan mantam leh puanjemte a hiu. La nêk dingin chângbuang nêl pha tak leh khuaizu leh sathau ka hun pia’i. La mêl a hung hoi ta ma ma ah, lengnu ah pang thei hial la hung hi tai.

¹⁴La mêlphatna nam tin lak in a thang hi, ka lopina thuam bukim la hiziak in, LALPA PATHIAN in a tii.

¹⁵Himaleh, la mêlphatna la kisuanpi ta’n, la minthanna ziakin la thanhuai khawlaw ah, a hun haw kha taphot tawh kiphal tak in la thanghuai tai.

¹⁶La sil leh chên khenkhatte chu, la thoimual cheina’n la mang ah, zia tak ah chun la kizuak thanghuai ta’n; zia gual thil hi kuama’n a la bawl kha pua’n, tu’nung inle kuama’n bawl pua’n au.

¹⁷Ka sana leh dangka mêlpha tak tak ka hun piakte chu, kilâk in, pawsal lim in la siam ah, ziate chu la thanghuaipi in;

¹⁸la puanjem hoi takte a khu’na’n la mang ah, ka sathau leh gimtuite chu la pia’n.

¹⁹Chuleh, ka an hun piak chângbuang nêl pha tak leh sathau leh khuaizu, la nêk ding ah ka hun piak haw chu, a kiang ah gimtui dingin la pia’n; zia gual chu ahi LALPA PATHIAN in a ti tai.

²⁰Kei â ding ah chanu chapa lei hinpiakte chu, a kiang ua kithoina dingin la pia nalai a. La thanhuaina hile hun tawk nai lo ding a hem!

²¹Ka chate a kiang ua kithoina dingin la that in.

²²La ki’dak umna leh thanghuaina zosia ziakin la khangdawn lai, ngawnchang ah la thisan lak ah la kitel lai hunte kha la hemil tai.

²³Zia gual ah la gitlo zaw nung hin (la chung a gik hi! la chung a gik hi! LALPA PATHIAN in a tii;)

²⁴lam pâm mun awng tin ah kemdaw in, mun thawveng la kisiam a;

²⁵lambom tin ah mun thawveng la kisiam ah, la mêlphatna la zuak ah, la thanhuaina hi’pung dingin a hun haw kha taphot kiang in la kipia’n.

²⁶La Invêng Aigupta, mi hukte chu tawh thanghuai tak in la um tau ah, ka lungnatna supung dingin la thanghuaibe nalai hi,

²⁷Ziaziakchun, nangma do dingin ka khut ka lâm ta’n, la nêk ding an ka hun piak hi’tawm ing ka tin, la mêlma, la umdan hun simmaw ma ma, Philistin chanute’n a nop nop ua a hun bawl ding un hun pia ding ka hi.

²⁸A hun tawk la hetlo ziakin, Assuriate tawh thanghuai tak in la kihêl un, zia chule la tongkhop nai diak puai.

²⁹Sumkawlveina gam ah Kaldaite tawh la thanghuai un; zia tiang ah chunle la khop zo nai diak puai.

³⁰LALPA PATHIAN in, zachâtna châng helo nawchizuak gual ah, zia gual lawm lawm ah la um hi, la lunggul na lawm lawm e!

³¹Lambom tin ah kem la daw ah, lamlian kiltin ah khang sâng la siam nalai sêt ah! Himaleh, a man la lâk nop lo ziakin nawchizuak la bang puai.

³²Ji ângkawm, a pawsal sâng ah mi dang dawi zaw!

³³Nawchizuakte kiang in a man piak a hisek in, nang in vang la jawlsaipite thilpiak la pe zaw’n; la thanhuaipi ding ah mun tin ah kipat hung dingin la golgu zawi.

³⁴Tichun, la thanghuai dan hi numei dang tawh la kibang puai: kuama’n thanghuaipi dingin a hun zawl pua’n; kuama’n a man hun pelo in, nang in la pezawi; la lamdang hi.

³⁵Ziaziakchun, aw mi thanghuai, LALPA thugen hi ngai in:

³⁶Zia gual hin LALPA PATHIAN in a gen hi: La ngaizawngte tawh la thanhuaina lam un, la ngawnchang hi’na hawkdaw ahiziak in, la buakna butthâk ahi tai; chuleh, la milim ki’dak um zosia ziak leh amau â ding ah cha leh nau la hin piakte thisan ziakin,

³⁷la kinoptelpi, la ngaizawngte zosia, nang in la hepi leh la mudate a leng un hun pui khawm ing ka; mun tin ah kipat in nangma do dingin hun pui khawm ing ka tin, la zamaw a et theina ding un la ngawnchang in hun koi in au.

³⁸Numei ângkawm leh tualthat chung thu a ta’n gual un, la chung thu tan ing ka tin, lungna leh itsik in la chung ah thisan phuba la ding ka hi.

³⁹A khut un hun pia’ng ka tin, la kemdaw leh la jawlbukte pheltha’n, la nîk leh puan zosia sût piak in, la kijemna mêlphate lâkpiak in, ngawnchang leh a hawm in hun nusia in au.

⁴⁰Suang ah hun sep dingin mipi chokphûl intiu in, suang ah hun sep in, a chemjam un hun sât tel ta’n au.

⁴¹La Inte chu mei ah hâl intiu in, numei tam tak mu’na’n la chung thu tan in au; thanghuai tak in umsak ta pua’ng ka tin, kuama le sum pia diak ta pua’n la.

⁴²Tichun, la chung ah ka lungnatna dam ta’n tin, ka hun thangsiatna le bei ta’n ah; thip hiat hiat ta’ng ka tin, la chung in lungna ta pua’ng ka.

⁴³Nang in la khangdawng lai hunte hemil ah, zia thil zosia ah hin lei suklungnat tâk ziakin; ziaziakchun, la thilbawl tawh kigûn la chung ah ka tunsak ahi tai, LALPA PATHIAN in a ti ahi. Ki’dak um zawsêm ding ah zia gual buaknate hi la bawl hilo a hem?

⁴⁴Ngai in, paukikna mang sek taphot in, zia paukikna hi la chung in hun mang ta’n au: “A chanu’n a nu dung a sûn hi,” ti in.

⁴⁵Nang hi la nu, a pawsal leh a chate ki’daknu chanu la hi’n; chuleh, a pawsal leh a chate ki’dak, la suapinute suapi la hi kit hi. La nu chu Hit mi ahi’n, la pa chu Amor mi ahi.

⁴⁶La u-nu chu Samaria ahi’n, a chanute tawh nang umna mallam ah chêng ahi; chuleh, la naunu chu, la umna simlam ah um, a chanute tawh chêng Sodom chu ahi.

⁴⁷A umdan uh la zui bep le hilo in, a ki’dak umnau gual in la bawl nalai ah; hun chomcha kâl sung in, la umdan zosia’n amau sâng in la sezaw tai.

⁴⁸La suapinu Sodom leh a chanute’nle nang leh la chanute’n, la bawl tiang uh hi a bawl puau hi, LALPA PATHIAN in kihaksial ngam in a ti ahi.

⁴⁹La suapinu Sodom gitlona chu zia hi ahi: ama leh a chanute a kisathei un, nêk a pap un, a kinoptel un, genthei leh tasamte vang a ngaisak puau hi.

⁵⁰Mi uang a hiu ah, ka chung in thil ki’dak um a bawl tau hi; ziaziakchun, ka mu phât in ka chawn mang ta ahi.

⁵¹Samaria in nangma thil bawlkhial kimkhat hile a bawl puai; amau sâng in ki’dak um la bawl tam zaw’n, la thil ki’dak um bawl a tam bêk ziakin, la suapinute chu midik gual in la kilatsak hial hi.

⁵²La suapinute dikzaw ah la kilat sak tâk ziakin, nangma’n la mualphona chu la kipuak ding ahi tai; amau sâng ah thil ki’dak um la bawl nasat zawk ziakin, la gitlonate ziakin amau chu nang sâng in a dikzaw tau ahi. Ziaziakchun, zachatna’n ngai in, nang inle la mualpho’na chu kipuak ding la hi, la suapinute nang sâng ah dikzaw dan ah la bawldaw tâk ziakin.

⁵³A vangphatnau pia kit ding ka hi, Sodom leh a chanute vangphatna leh, Samaria leh a chanute vangphatna; chuleh, amau tawh kigual in nang le vangphatna hun pia kit ing ka;

⁵⁴la mualpho’na la kipuak ah, la chung ah thil tung zosia ziak ah; amau â ding ah thamuanna la hitheina ding ah la zachat theina dingin.

⁵⁵La suapinute, Sodom leh a chanute chu a umdan masau gual un um kit intiu in, Samaria leh a chanute a umdan masa gual un um kit ta’n tiu in; chuleh, nang leh la chanute le la umdan masa gual un um kit ta’n lau.

⁵⁶La kisakthei lai ah, la ngawnchang hi’na hawkdaw ahi masang khan, la suapinu Sodom chu pauchangthiatna la mat hilo a hem?

⁵⁷Tu’hin la, Aram chanute tawh, a Invêng zosiate leh Philistin chanute tawh, a kîmvêl ah um a hun simmaw zosiate nuizatbûk la hung hi tai.

⁵⁸La thanghuaina leh la ki’dak umna man la puak ngei ngei ding ahi, LALPA‘n a tii.

⁵⁹LALPA PATHIAN in zia gual hin a gen a: Thutiamna musit ah, thuthung botsete chu a thilbawl gual gual un a chung un hun bawl thuk ding ka hi;

⁶⁰himaleh, la khangdawn lai ah la kiang ah thuthung ka siam kha hezing ing ka tin, nang tawh I kikâl in kumtuang dai ding thuthung siam ing ka.

⁶¹La kiang ah thuthung ka bawl ziak hilo ah, ka suapi numeite, la u leh la naute la chanute hiding ah ka hun piak phat leh, la umchan zosia kha hezing ta’n la tin, zakcha ta’n la.

⁶²Nang tawh I kikâl ah thuthung phu det ta’ng ka tin; chuleh, keima hi LALPA ka hi ti he ta’n la tin,

⁶³la thilbawl dan zosia ka ngaidam phat leh, la het zing ziak ah la zachat man ah bangma gen ding neilo in, la kam ka hawm ziang ding la hi, LALPA PATHIAN in a ti ahi.