Read Vaiphei EZEKIEL 18 Bible Online

EZEKIEL 18 - Vaiphei bible

EZEKIEL 18

¹LALPA‘n ka kiang in zia gual hin a gen a:

²Israel gam chung thu ah, “Nu leh pate’n grep thûk a nêk uh leh a chateu ha a jai,” ti thuching kigen gen ziang hi bang ti’na a hem?

³Keima LALPA PATHIAN hi ka hin lai sia, zia thuching hi Israelte chung thu in kimang kit talo ding ahi.

⁴Mihing zosia hinna kei â ahi; nu leh pa hinna gual tho in chate hinna le kei â ahi: a gilo pen bep chu thiding ahi.

⁵Kua a hem khat chu a dik ah, dan dungzui ah dik tak ah a um nâk chun;

⁶thoimual ah sate ne lo ah, Israelte milim lam a ngat lo nâk ah, a Invêngte ji a hem, numei a buak lai ah a kihibuak lo nâk ah,

⁷kuama poi a khoi lo ah, a kitiamna dungzui ah a leibat a dit kit ah, misuam ah pang lo ah, gilkialte nêk ding a piak ah, sil leh chên beite a thuam a,

⁸sumpung a lâk lo ah, nunsiatna bawl lo ding ah a khut a tûktân ah, a kinate dik tak ah thu a tan a,

⁹ka thuguatte a zui ah, ka dan thute chingthei tak ah a vop ah, ginum tak ah a um nâk chun zia gual mi chu midik hi’n a: ama chu hing ding ahi, LALPA PATHIAN in a tii.

¹⁰Chuleh, a chapa chu suammang leh tualthat ahi chun,

¹¹(a pa bawl lo gual tak in) ziate hi bawl hen la, thoimual ah kithoina sate ne’n, a Invêngte ji hi’buak in,

¹²genthei leh tasamte gawt hen la, mi suam hen la, a bat dit ki’hen la, milimte lam nga hen la, thil ki’dak um tak bawl hen la,

¹³sumpung doina ziakin mi thunglâksak hen la hileh, zia gual mi chu a dam diam? Hing pua’n a. Zia gual thil ki’dak um zosia bawlpa chu, a thi tei ding ahi; a thisan maw ama’n kipuak in a.

¹⁴Himaleh, zia gual ah bawlpa chun chapa khat nei hen la, a pa thilbawl phalo zosia chu mu’n, ama kingaituana dungzui ah a pa bawl gual zui lo ah,

¹⁵thoimualte ah kithoina sa ne lo in, Israel chate milim lam a ngat lo ah, a Invêngte ji a hibuak lo ah,

¹⁶kuama chung ah thilsia bawl lo ah, mi kipautiamsak khel khel lo ah, kuama suam lo ah, gilkialte nêk ding pia’n, nîk leh puan beite a thuam ah,

¹⁷thil phalo bawl lo ding ah a khut a tûktân ah, sumpung la’lo ah, ka thuguatte a zui ah, ka dan thuthungte a vop chun, a pa gitlona ziakin ama chu thi pua’n tin, a hin ngei ngei ding ahi.

¹⁸A pa ahileh vang, thagum ah mi â a lak piak ah, a suapi a suam ah, a mipite lak ah thil phalo tak a bawl ziakin, a gitlona ziakin a thi ding ahi.

¹⁹Ahi’nla, nang un, “A pa gitlona ziakin bang ding ah a chapa’n thuak lo ding a hem?” la tiu a. A chapa’n dan zui in, thil dik a bawl ah, ka dan thuguat zosia chingthei tak ah a zui chun, matheilo in a hin ding ahi.

²⁰Thil phalo bawl pen chu a thi ding ahi. A nu leh pa gitlona ziakin a cha’n thuak pua’n tin, a cha ziakin a nu leh pa’n le thuak diak pua’n au; midik in a dik man mun tin, migilo in a gitlo man kipuak in a.

²¹Himaleh, migilo in a thil phalo bawl zosia haisan ah, a gitlona lampi kiheisan ah, ka dan thuguat zosia a zui ah, dan a zui ah, thildik a bawl chun, a hin ngei diu ahi; zia gual mi chu a thi lo diu ahi.

²²A thil la hikhialsa zosia chu hetmil hita’n tin, a thilbawl dikte ziakin hing ta’n au.

²³LALPA PATHIAN in, “Migilo in a nunchan haisan ah a hin sâng in, migilo chu a gitlona ziakin thi leh kipak zaw dingin lei ngai ua a hem?” a ti’ngal a.

²⁴Himaleh, mi diktat in dikna lampi haisan in thil phalo bawl hen la, migilote thilbawl ki’dak um takte chu hun bawl ta leh hing ding a hiu em? thilpha a la bawlsa zosia chu, khat chale het hita pua’n ah; a hi’khelna leh a thil phalo bawl ziakin a thi ngei ding ahi ngal a.

²⁵Hilehle nang un, “LALPA thilbawl dan hi a kilawm puai,” la ti nalai ui. Aw Israel Inkuante haw, tu’hin ngai un: Ka thilbawl dan chu maw a kilawm lo? Nanghaw thilbawl dan chu a kilawm lo zaw hilo maw?

²⁶Midikte chun dikna lampi nusia ah thil diklo a bawl uh chun, a thilbawl diklo ziak un a thi diu ahi.

²⁷Chuleh, migilote’n gitlo’na lampi nusia in dan zui ah thildik a bawl uh chun, a thilbawl diknau chun a hinnau hukdok in au.

²⁸Amau kilunggel dungzui ah a thil phalo bawl uh haisan a hiziak un, a hin tei diu ahi; a thilo diu ahi.

²⁹Ahi’nla, Israel Inkuante’n, “LALPA thilbawl dan a kilawm puai,” a ti nalai lai ui. Aw Israel Inkuante haw, ka thilbawl dan maw a kilawm lo? Nanghaw thilbawl dante hi a kilawm lo zaw hilo maw?

³⁰Ziaziakchun, Aw Israel Inkuante haw, la umdan dungzui chiat un mi tin chung ah vaihawm ding ka hi, LALPA PATHIAN in a tii. Sim unla, la hi’khelnau zosia haisan tau in; achutiloleh, nunsiatna chu la manthâinau hung hi kha’n a.

³¹Ka chung ah la thil bawlkhial zosiau haisan unla, lunggil thak leh thagau thak kilâk lût chiat tau in! Aw Israel Inkuante haw, bang ding ah thi laizang ding la hiu em?

³²Kuama thi’na chu ka kipakpi paw’ngal ah, LALPA PATHIAN in a tii. Hung kihei un; tichun, hing in lau.