Read Vaiphei EZEKIEL 19 Bible Online

EZEKIEL 19 - Vaiphei bible

EZEKIEL 19

¹Nang in vang Israel lengte Sûnna La ding phuak inla,

²zia gual hin sa’n: La nu kha sakeibakneite lak ah sakeibakneipi hilo maw? Sakeino lak in a kual ah, a note a vâk hi.

³A note lak ah pakhat a vâk lian ah, sakeibaknei chaltuai khat a hung hi’n, samat dan a hun zil in, mihing a hun ne ta’n.

⁴Namtin in ama ûmna’n dak a sai un, a pumthâng chawu ah chun a man tau hi; ngakuai ah kai in, Aigupta gam in a pui tau a.

⁵A lawsam ahi tai ti leh, a kinepna a thawn ahi tai ti a hetdaw phatin, a note lak ah pakhat sakeibaknei chaltuai in a hun siam kit ta’n.

⁶Sakeibaknei hon lak in a vâkvel ah, sakeibaknei tuaidawng a hung hita’n; samat dan a thiam ta’n, mihingte a hun ne tai.

⁷A kulpiteu a phia’n, a khawpiteu a susia gam tai; a ngîk git lau ziakin gam leh, a sung ah chêng zosia lau in a lungdong zo tau hi.

⁸Namtin ama do dingin gambung tin ah kipat kikhawm in, a chung in a lên uh a jak un, a pumthâng un a awk tai.

⁹Thikkol but pum in a bawm in a khum un, Babulon lengpa kiang a pui tung tau hi; Israel tâng chung ah a aw het ahi kit tâklo’na dingin, vêngtu nuai in a koi tau hi.

¹⁰La nu chu grep lak ah grep gui, tui lak ah kiphut, tui tam ziak ah ga leh bâk tam tak sua tawhbang chu ahi.

¹¹A bul det pen chu, lal tiang ah mat a hung hi’n; thingbuk lak in a sâng chuam ah, a bâkjamte tawh sâng tak in a dingdok hi.

¹²Himaleh, thangtawmna ah bawdaw in a um ah, lei tual se’na’n mat ahi; sualam hui in a mût keu in, a gate chu heu in a um ah, a kung det chu a keugawp ta’n; mei in a kâng tum tai.

¹³Tu’hin gamthip ah phu in a um ta’n, gamkeu leh tui um lo’na phu ahi.

¹⁴A kung ah kipat in meikuang a hung pawtdok ah, a kung detdo leh vaihawmna ding laltiang a um tâk lo’na dingin, a bâkte leh a gate chu a kâng tum tai.