Read Vaiphei EZEKIEL 20 Bible Online

EZEKIEL 20 - Vaiphei bible

EZEKIEL 20

¹A kum sagi’na, a tha ngana, ni sawm tin ni chun, Israel puitute lak ah khenkhat in LALPA thu dong dingin a hung un; ziate chu ka kiang in a hung kichu khawm tau a.

²LALPA‘n ka kiang in zia gual hin a hun gen a:

³Mihing, Israel puitute kiang in zia gual hin gen in: LALPA PATHIAN in zia gual hin a gen hi: Bang bawl ding ah hung la hiu em? Thu ei dong ding maw? Ka hin sungsia nanghaw dot in um pua’ng ka, LALPA PATHIAN in a tii.

⁴A chung ua vaihawm ding la hem, mihing, a chung ua vaihawm ding la hi em? Chuti ahileh, a pu leh pateu ki’dak a umnau chu hil inla,

⁵a kiang un: LALPA PATHIAN in zia gual hin a gen hi: Israelte ka têlchuam ni khan, Jakob suante kiang in thu ka la tiam ta’n: Aigupta gam ah ka la kihiatdawsak ta’n, a kiang un: Kei hi LALPA la Pathian uh chu ka hi, ti’n ka la kitiam tai.

⁶Zia ni chun Aigupta gam ah kipat puidok ing ka tin, amau â ding ah ka mudaw’na gampha, bawngnawi leh khuaizu luanna, gam zosia lak ah pha pen ah pui lût dingin ka la tiam tai.

⁷Chun, a kiang un: Mitin in la mu nop tun tun uh ki’dak um takte chu paimang unla, Aiguptate milim chun kisubuak kiu in; Kei hi LALPA la Pathian uh ka hi, ti’n ka la gen ta’n.

⁸Himaleh, ka chung in a hel un, ka thugen le ngai lo in, a lak ua pakhat chânle a mit ua a mu nop tun tun uh ki’dak umte a paimang nuam puau ah, Aiguptate milim chule a haisan diak puau hi. Ziaphatchun, Aigupta gam sung ah a chung un ka hachang thakna but khum ing ka tin, ka lungnatna a chung ua sua ding ka ngaitua tai.

⁹Himaleh, a umnau Aigupta mite zosia het ah amau puidok ding ti ka la kihiatsak tâk ziakin, a mit muu ah ka min gensiat a hilona dingin, a mit mu ngei in amau ka la puidok tai.

¹⁰Tichun, Aigupta gam ah kipat puidok in, gamthip ah ka pui lût tai.

¹¹Ka thuguatte ka pia’n, ka vaihawmnate ka etsak ah, zia chu zui ah, mi tin a hintheina ding un.

¹²Zia banah chun, amau hithiangthopa chu keima LALPA hi ka hi ti a hettheina ding un, keima tawh amau kikâl ah tepte’na dingin, a kiang un ka sabbath nite chu ka pia’i.

¹³Himaleh, Israel Inkuante chu gamthip ah khan ka chung in a hel un; ka dan bawlte zui lo in, ka thuguatte chu zawm lo in, zia chu zawm ah mi tin in a hinna ding uh chu a nol tau ah; chuleh, ka sabbath nite le huaisia tak in a hi’buak tau hi. Ziaphatchun, gamthip ah khan amau hi’mangthai ziang dingin, ka lungnatna a chung un butthâk ka la gaw hial tai.

¹⁴Himaleh, zia gual chun ka la bawl nuam ta puai, amau ka puidaw a la mu nam zosiate mit mu ah, ka min siatlo’na dingin ka bawl zaw tai.

¹⁵Zialochun, gamthip ah khan gam ka piakna, bawngnawi leh khuaizu luanna gam pha, gam zosia lak ah gam pha pen ah chu pui lût lo ding ti’n ka la kipautiam zo ta’n.

¹⁶Ka thuguatte a nol un, ka dan thuguatte zui lo ah ka sabbath nite a hi’buak ziak un; chuleh, a lungthim un a milimteu a lunggul zaw ngal un.

¹⁷Hitamaleh, ka kimulosak ah; tichun, gamthip ah khan that gam in, ka la hi’mang sik sek talo ahi kha.

¹⁸Gamthip ah khan a chateu kiang ah, la nu leh pateu dan zui kiu inla, a thuguat uh le mang kiu inla, a milimteu inle kisubuak kiu in, ti’n ka la gen ta ahi.

¹⁹Keima LALPA la Pathian uh ka hi; ka dan siamte zui unla, chingthei tak in ka vaihawmnate vop unla,

²⁰keima hi LALPA la Pathian uh ka hi ti la hettheina ding uh leh, keima tawh I kikâl ua tepte’na a hitheina dingin, ka sabbath nite chang thiangtho un, ka ti hen.

²¹Himaleh, a chateu chu ka chung in a hel tau a; ka thuguatte chu zui lo in, ka vaihawmnate chu mitin in a zui ua, a hinna ding uh chu zawm dingin a vop diak puau in; ka sabbath nite le a hi’buak tau hi. Ziaphatchun, gamthip ah khan amau hi’mangthai ziang dingin, ka lungnatna a chung un butthâk ka la gaw hial tai.

²²Himaleh, zia gual chun ka la bawl nuam ta puai, amau ka la puidaw a la mu, nam zosiate mit mu ah, ka min siatlona dingin ka bawl zaw tai.

²³Zia lo chun, gamthip ah khan namtin lak ah thejak ding leh, gamtin ah the’chek dingin ka la kipautiam ta’n;

²⁴ka thuguatte dungzui in a bawl puau a, ka thuguatte nol in, ka sabbath nite a hi’buak tâk ziak un, a mitteu le a pu leh pateu milim lam a ngat zaw tâk ziak un.

²⁵Zia lo chun, dan phalo takte leh a hintheilo’na ding uh thuguatte ka pia zaw tai.

²⁶Keima hi LALPA ka hi ti a hettheina ding un, a cha lutîl uh kithoina a piak ua, a hung tizat theina ding un, a thilpiak ma mau in ka hi’buak ta ahi.

²⁷Ziaziakchun, mihing, Israel Inkuante kiang in: Zia gual hin LALPA PATHIAN in a gen hi, ti’n gen in: La pu leh pateu in zuau thei tak ah ei kilepsan ziak un ei gensia tau ahi.

²⁸A kiang ua piak ding ah ka tiamna gam ah ka pui lût phatin, tâng sâng leh thingbuk lak tincheng in kithoina leh lungnat chok tho ding thillat a lân ui.

²⁹(A kiang un, Bang ding ah thoimual ah chia la hiu em? Ka ti ziak in, tu’ni tiang hin Bamah a tiden tau ahi.)

³⁰Ziaziakchun, Israel Inkuante kiang in, LALPA PATHIAN in zia gual hin a gen hi vati’n: La pu leh pateu dungsûn ah nang uh kisubuak ding leh a thil ki’dak um bawlteu del ah taijak ding la hiu em?

³¹La thilpiak uh lân ah, la chateu mei ah la lat phat ua leh, tu’ni tiang in la milimteu tawh, nanghaw kisubuak bep la hiu. Aw Israel Inkuante haw, nanghaw dot in um ding ka hem? Ka hin sungsia, nanghaw dot leh ho in um pua’ng ka, LALPA PATHIAN in a tii, ti in.

³²I kîmvêl ua nam dangte gual in, I gam ua um namte gual hin thingbul, suangbulte ho hitiu, ti’n lunggel maleu chin, zia gual chun um him him pua’n lau, ti in.

³³Ka hin sungsia, khut hat tak lâmsa’n, lungnatna leibua’n la chung un lal ah hung um ngei ngei ding ka hi, LALPA PATHIAN in a tii.

³⁴La kithejaknau namtin leh gam tin ah kipat in, khut hat tak lâmsa’n, ka lungnatna leibua’n hun puikhawm kit ing ka tin;

³⁵chuleh, mihing umlo’na gamthip ah hun pui lût ing ka tin, zia tak ah chun kimaitua in la chung un vaihawm ding ka hi.

³⁶Aigupta gamthip ah la pu leh pateu chung thu ah vai ka la hawm gual khan, nanghaw chung inle vaihawm ding ka hi, LALPA PATHIAN in a tii.

³⁷Vaihawmna mol thuthung nuai in hun koi ta’ng ka.

³⁸La lak ua kipat mi thukhelte leh ka chung ah thil bawlkhialte chu zendok ing ka tin; malzin gual in a chênnau gam ah kipat puidok ing ka tin, Israelte gam in vang lut pua’n au. Ziaphat chuleh, LALPA ka hi’dan hun he ta’n lau.

³⁹Aw Israel mipite haw, ka thu la ngai lo ding vânglak uh leh, tu’ kipat hin chiau inla, mitin in la milimteu ho mai tau in; ahi’n la, la thilpiakteu leh la milimteu in ka min hi’buak ta kiu in.

⁴⁰Ka tâng thiangtho, Israel tângsip ah chun Israel mipi zosia’n, zia gam ah chun ka na sêm ding ahi ngal un; zia mun ah chun amau pom ta’ng ka tin, la thawlawmteu leh la thilpiak lûl takteu chu, la thilzek thiangthoteu tawh a la dawi ta’ng ka, LALPA PATHIAN in a tii.

⁴¹La kithejaknau ah kipat ka hun pui khawm kit phat leh, gimtui gual in hun pom ta’ng ka; namtin mit mu in la lak un ka thianthona hun tâklang ta’ng ka.

⁴²La pu leh pateu kiang ah piak ding ah ka la tiamna gam, Israel gam ah ka hun pui lût phât leh, Keima LALPA hi ei hun he ta’n lau.

⁴³Zia tak ah chun, la umdan leh la tatdan phalo tak ziak ah, la kisubuak dan uh hezing kawm in; la thilbawl uh phalo zosia ziakin nang uh nasan kiki’dak hial in lau.

⁴⁴Aw Israel mipite haw, la thilbawl uh phalote leh la dukdak lonau dungzui hilo in, ka min ziak ah ka hun gawt phat leh, Keima LALPA ka hi ti hun he ta’n lau, LALPA PATHIAN in a tii.

⁴⁵LALPA‘n ka kiang in:

⁴⁶Mihing, simlam nga’n la, simlam dem in thu gen inla, Negeb lam ah gammâng kãl in thu gen in;

⁴⁷Negeb gammâng kiang in, LALPA thugen hi ngai un: LALPA PATHIAN in zia gual hin a gen hi: La lak un mei hun sêm ing ka tin, zia mei chun la lak ua thinghing hi’n, a keu hileh kâng tum in ah; zia meikuang chu mit pua’n tin, simlam ah kipat mallam tiang ah mite maichang zosia kâng ta’n a.

⁴⁸Mihing zosia’n zia meikuang chu LALPA hun sêm ahi ti he ta’n au; kuama’n phelmit pua’n au, ti’n a hun gen a.

⁴⁹Ziaphatchun, “Katei LALPA PATHIAN! Mi zosia’n kei hi, ‘Hetmaw thu phuakpa hilo a hem,’ ei ti kha’n au,” ti’n ka dawnhu tai.