Read Vaiphei EZEKIEL 21 Bible Online

EZEKIEL 21 - Vaiphei bible

EZEKIEL 21

¹LALPA‘n ka kiang in:

²Mihing, Jerusalem lam nga’n la, mun thiangtho dem in thu gen in; Israel gam demna’n thu gen inla,

³Israel gam kiang in: LALPA‘n zia gual hin a gen hi ti’n: Nanghaw do in ka hung kuan hi, ka chemjam a pâi ah kipat jukdok ing ka tin, la lak ua midik hi’n mi nunsia hileh, sât tan sik sek ding ka hi.

⁴La lak ua kipat midik leh mi nunsia ka sâttan ding ziakin, ka chemjam chu kipandok in, simlam ah kipat mallam tiang ah mite do dingin kuandok intin,

⁵chuleh, mi zosia’n keima LALPA hin, ka chempâi ah kipat chemjam jukdok ka hi ti he ta’n au; a pâi ah thun kit hipua’n a.

⁶Thûm in mihing, a mit muu in thasia tak in thûm inla, lungngai tak in um in.

⁷Amau in la kiang ah, Bang ding ah thûm la hem? a hun ti phat uh leh a kiang un, Thil hung tung ding ziak ahi. Lungthim zosia tuitha’n tin, khut zosia zeng intin, ngaituana zosia basam intin, khûp zosia zawitha ta’n ah. En in, hung tung ding a hita’n, guitung ziang ding ahi tai, LALPA PATHIAN in a tii, ti’n gen in, a ti’n.

⁸Chun, LALPA‘n ka kiang in a hun gen a:

⁹Mihing, zia gual hin gen in: LALPA‘n zia gual hin a gen hi ti’n la: Chemjam, Chemjam chu tât hiam a hita’n, nawtval zaw ahi tai;

¹⁰mi satlupna ding ah tât-hiam ahi’n, kawlphe gual ah te’ ding ah nawtval ahi! Bang kipakpi ding maw? Thununna leh mol chu la ngainêp tau hi.

¹¹Chemjam chu nawtval di’n piak ahi’n, khut ah tûk ding ahi; mi thattu matchâk dingin tât-hiam a hita’n; chemjam chu nawtval ahi tai.

¹²Aw mihing, kap inla, pengjak ta’n, ka mipite do’na ahi ngal a; Israel lal chate zosia do’na ahi, ka mipite tawh a leng un chemjam se’na’n a kinei ui. Katei! A malpiu sât un!

¹³Bang a hem? Kingaitua un: Hilna mol la ngainêp uh chun, hung guitung lo ziang ding a hem? LALPA PATHIAN in a tii.

¹⁴Nang mihing in thu gen in: Khut bêngtua hial in jep in. Chemjam in nivei, thumvei sât hen, mi tha’na ding chemjam ahi. Mi tam tak tha’na ding chemjam ahi’n, amau a ûm chimit tai;

¹⁵ziaziakchun, lung a thuai zo ta’n, mi tam tak a pûk tau hi. A kotpi tin un chemjam hiam ka koi piak zo tai. Katei! Vai ding ah siam ahi’n, mi tha’na ding ah nawtval ahi.

¹⁶La chem in a ngatna lam lam chu, changlam sât inla! Veilam ah lek in!

¹⁷Ke’nle ka lungnat thepbi’na dingin, khut leh khut in kisattua pi’ng ka; ti’n Keima LALPA hin ka gen ta’ngal ah, ti in.

¹⁸LALPA‘n ka kiang in:

¹⁹Mihing, Babulon lengpa chemjam hungna ding lampi pani tepte in; a paniu in gam khat ah kipan ding a hiu. Lampikâwk siam inla, khawpi sung lûtna ding lamlian dung ah lampi daidanna bawl inla;

²⁰Ammonte khua Rabbah ah chemjam a hung lûtna ding leh, Judah leh kulpi det Jerusalem ah lûtna ding lamlian chu tepte in.

²¹Babulon lengpa chu âisân in, lamlian pani kisuktuana lampi kidaidanna mun in a um ta’ngalah; a thalpi a thing ah, a milimte chu a dong ah, sathin a endik tai.

²²A changlam in Jerusalem kul hisiatna ding leh mi tha’na ding, kido ding ah kokhawmna, kotpite hisiatna ding, a ûmna siam ding dan leh a galvênbûk sâng siam ding dante a hung chu tai.

²³Himaleh, zia âisân chu a thawn gual in a ngai ui, thuthung pha tak ah siamsa a hiziak un; ahi’n, a gitlonau a hetzingsak ah, amau sal ah man dingte puitungna bep ahi tai, ti’n a gen a.

²⁴Ziaziakchun, LALPA PATHIAN in zia gual hin a gen hi: La hi’khelnau tâklat ahi’n, la bawlkhialnau hetzingna la bawl ziak un, la thil bawlnau zosia’n la gitlonau a kilat tâk ziakin hetzing in la um un, sal ah pui mang in um in lau.

²⁵Nang Israel hotu gilo leh nunsia, la gitlona gawtna ding nikhua, huntawp ni chu a nai tai;

²⁶ziaziakchun, LALPA PATHIAN in: La dialkop hawk inla, la lallukhuk liptha’n; a hisa gual in bangma um ta pua’n a. Kingainiamte chu chawisâng unla, miliante chu tawden in um tau hen.

²⁷Siatna, Siatna, Siatna hun tut ding ka hi! Bangmatik ah um ngai lo chu, a neitu dik tak ding a hung masia, ama kiang in pia’ng ka.

²⁸Nang mihing in vang zia gual hin thu gen mai in: LALPA PATHIAN in Ammon mite chung thu leh a demna zia gual hin a gen hi: Chemjam, Chemjam! Mi that ding ah jukdawsa’n a um hi. Val zo ding ah nawtval, kawlphe gual ah val ding.

²⁹Nang â ding ah kilâkna lêm etsak, nang thêm ding ah âisânna zuau thu leh, nunsiate ngâwng ah chemjam, a chung thu vaihawmna nunung ding chu, a hung tung hi.

³⁰Chempâi ah thun in! Nangma kisiamna mun, la kipatna gam ah la chung thu vaihawm ding ka hi.

³¹La chung in ka lungnatna buntha’ng ka tin; la chung ah ka hachang thakna mei sêm ing ka. Mi hiamngam, mi tha thiamte khut in hun pedok ing ka.

³²Mei kuangchaw in pang in la tin, la thisan lei khikêk ah lût intin; hetmil in um ta’n la; Keima LALPA hin ka ti ta’ngal ah, ti in.