Read Vaiphei EZEKIEL 22 Bible Online

EZEKIEL 22 - Vaiphei bible

EZEKIEL 22

¹LALPA‘n ka kiang in:

²Nang mihing, Thutanna bawl ding la hi em, thisan sua’na khawpi chung ah thutanna bawl ding la hi em? Chuleh, a ki’dak umnau zosia chu tâklang in.

³A kiang un: LALPA PATHIAN in zia gual hin a gen hi ti’n: Aw khawpi! La sung ah thisan sua ah, la milimte kisiam ah, nang leh nang kisubuak chung ah gawtna ding hun a tung tai.

⁴Thisan la sua’na ziakin thiamlo la chang ta’n, la milim kisiamte ziakin la kisubuak tai; la kum hun tiamsa tawpna ding nikhua a kihi nai hi. Ziaziakchun, nam tinte gensiat leh gamtinte nuizatbûk dingin ka hun siam tai.

⁵La kiangnai leh gamla um zosia’n hun nuisan in au; nang minsiatna pua leh buaina dim la hi.

⁶Nangma ah Israel lengte, a thil hi’thei dan gual chiat ua thisan sua dingin a um ui.

⁷La sung ah chun nu leh pate musit in a um un; la sung ah malzinte suam in a um un; la sung ah nauchaga leh meithâite diklo tak ah bawl in a um ui.

⁸Ka thil thiangthote la musit un, ka sabbath nite la subuak ui.

⁹Nangma ah thisan sua dingin mi heksiat hatte a um un, nangma ah chun thoimual ah kithoina sanete lak in hûkna thil polche bawlte a um ui.

¹⁰Nangma ah chun a pa jite tawh lumkhawm lawi a um un; la sung ah chun numei a buak lai ah thanghuaipite a um ui.

¹¹Mi pakhat in a Invêngpa ji a luppi ah; midang khat in a monu a tatsualpi in; a dang khat in la sung ah chun ama suapinu, a pa chanu ma ma a tatsualpi hi.

¹²Nangma ah thisan sua’na dingin golgûkna a lau ah; sum bat man ding leh a sum pung la lau a; chuleh, la Invêngte neisa lâkpiak in kihihausat la guau a; tichun, keima lei hemil tau hi, LALPA PATHIAN in a tii.

¹³Ngai in, la sung ah lawkna diklo la bawlte leh thisan sua’nate ziakin ka khut hun betkhum ding ka hi.

¹⁴Nangma ka hun gawt phat leh la sekdona a pang zo in, la khut chu a pang zo na diam? Keima LALPA hin ka gen ta’n, bawl ngal ding ka hi.

¹⁵Namtin lak ah hun the’chek ing ka tin, gam tin ah hun chekjaksak ding ka hi; tichun, la buakkaina zosia hun silthiang ta’ng ka.

¹⁶Chun, nang ziakin namtin mit mu ah hi’buak in um ta’ng ka; chuleh, Keima hi LALPA ka hi ti hun he ta’n la, ti’n a gen a.

¹⁷LALPA‘n ka kiang in:

¹⁸Mihing, Israel mipite hi kei â ding ah thîk-êk gual bep ah mat tâk lo a hung suak zo tau hi; hâltuina mei ah chun a leng un dangka thîk, sum-eng, langva, thîk tak leh hâkngek tawh bang bep a hiu in. Haltuina mei ah chun thîk êk a suak zo tau hi.

¹⁹Ziaziakchun, LALPA PATHIAN in zia gual hin a gen hi: La leng ua thîk-êk la hung suak tâk ziak un, Jerusalem khawlai ah chun hun luak khawm ding ka hi.

²⁰Min hâltui ding ah dangka thîk, sum-eng, thîk tak, hâkngek leh langva hâltuina mei khuk ah pai lut ding ah a chom khawm gual un, ke’nle ka lungnat leh ka hachangthakna ziakin hun lakhawm in, hun hâltui ding ka hi.

²¹Hun chom khawm ing ka tin, la chung un ka lungnatna mei sêmkuang ing ka tin, a sung ah hâltui in um ta’n lau.

²²Dangka thîk hâltuina mei ah hâltui ahi gual in, nanghaw le a sung ah hâltui hi’n lau; tichun, Keima LALPA hin ka lungnatna la chung un but khum ka hi ti he ta’n lau, ti’n a gen a.

²³LALPA‘n ka kiang in;

²⁴Mihing, a kiang un gen in: “Gam hi’thianlo leh lungnatna nikhua gua zuklona chu la hi.

²⁵A sung ah miliante chu, sakeibaknei in a sa nêk ding puaitel ah ngîk tawhbang a hiu; mihing a ne zo un, go thil lûl zosia a kilâk un; a sung ah mi tam tak a meithâisak ui.

²⁶A thiamputeu in ka thuhilna bawtsia’n, ka thil thiangthote a hi’buak ui; a thiang leh thianglo le a khen chuam puau in, a thiang leh thianglo kikhiakna le a hil diak puau ah, ka sabbath nite le a ngaisak ta puau hi; ziaziakchun, a lak un ka min a sia tai.

²⁷A sung ah vaihawm hotute chu, ngei sane lai gual chu a hiu a; thisan a suau ah, diklo tak ah lawkna hawl in mi hinna a lau hi.

²⁸A jawlneiteu in amau sik in a gitlonau khu’na’n bâng kijut vam khum gual in a kihiatlosak un, kilâkna diklo ngen a muu ah, zuau thu’n âi a sân un, LALPA‘n bangma gen lopi’nle a kiang un, ‘LALPA PATHIAN in zia gual hin a gen hi,’ a tiu a.

²⁹A gam ah mipite’n mi van neisa lâkpiak a chîng un, mi a suam ui; migenthei leh tasamte a tawden un, a ziak umlo in gamdang mite thil a lâkpiak sek ui.

³⁰A gam ka hi’siat lona ding ah, gam thasang ah ka ma-âng ah ding ah, a bâng siampha ding leh, a siatna mun ah pang ding a lak un mi ka hawl ah; himaleh, ka mu zo puai.

³¹Ziaziakchun, ka lungnatna ka but khum ta’n; ka lungnatna mei in ka hâltum tai; a umdan dungzui un ka thuk ta ahi, LALPA PATHIAN in a ti ahi,” ti’n a gen a.