Read Vaiphei EZEKIEL 23 Bible Online

EZEKIEL 23 - Vaiphei bible

EZEKIEL 23

²Mihing, numei pakhat chanu pani a um un;

³a neulai ua, Aigupta gam ah a um lai ua kipat ah nawchizuak a la hi’tâk ziak un, a kizuak thanghuai tau ah; a nawi uh a khoi piak un, a nungak ânglai uh kihelna’n a mang tau hi.

⁴A upa zaw min chu Oholah ahi’n, a naunu min chu Oholibah ahi. Amau chu kei â a hung hiu ah; tichun, chanu chapate a hun hing tau ah. A min uh umzia chu: Oholah chu Samaria ahi’n, Oholibah chu Jerusalem ahi.

⁵Oholah chun ka ângsung in nawchi a zuak ah, a Invêng Assuriate chu a doicha’n,

⁶amau chu sepai hangsan, puandum ah kivan, gam ukpate, vaihawmte, hotulian leh tangval etlâ um tak tak, sakol chungchuang mi ngen a hiu in.

⁷Assuria sepai têlchuamte kinoptelna’n a pang ta’n; a ûtchâk milimte ah chun a kisubuak zo tai.

⁸A nungak lim lai ah kipat pawsalte’n a luppiu leh a nawi a khoi piak un; a taksa utchâknau sukpitinna a mat ziak un, Aigupta gam ah kipat a thanhuaina chu a haisan puai.

⁹Ziaziakchun, a dawichâkte, a etlel pen Assuriate khutthak thoina dingin ka pia tai.

¹⁰Ziate chun a nîk leh puan lîpthâk piak in, a chate a man un; chemjam in a that tau a. A chung in thutanna bawl a hita’n; tichun, numeite lak ah pauchangthiatna mat ahi tai.

¹¹A naunu Oholibah in zia chu muzing in, a u sâng ah thanghuai zaw, a mi dawichakna khawk zaw leh nunsia zaw’n a um a.

¹²Assuriate lak ah gam ukpate, vaihawmte, sepai hangsan gâlvan bukim ah kithuamte, sakol chungchuang mi tangval mêlphate ngen chu doicha’n a sâi a sâi a.

¹³Hi’buak ahi tai ti chu ka mu’n; chuleh, lampi khat in a kiton tau in.

¹⁴Himaleh, a khawk zaw diak in a thanghuai a; bâng ah pawsal lim a mu’n, Kaldaite lim a san ah kisiam ahi’n;

¹⁵a kawng uh kawnggâk ah kigâk, a luchang ua dialkop kâi zeng zung, a leng ua miliante lim ngen Babulonte lim ahi’n, Kaldaite gam ah mite chu a hiu.

¹⁶Ziate chu a mu phât in a dawicha ta’n; tichun, Kaldai gam ah palai a sawl tai.

¹⁷Chuleh, Babulonte chu a kiang ah kingaina jalkhun ah chun a hung tau ah, a mi dawichâkna chun a kihi’buak zo tai; amau tawh a kisubuak zaw phatin, a mêl hi’danglam in a jam mang tai.

¹⁸Nîk leh puan bei ah thanghuai tak ah a kinoptel lai in, a suapinu ka la ki’dak ma ma gual khan ama le ka kiheisan tai.

¹⁹A chutisapi’nle, Aigupta gam ah a ngâklak lai ah thanghuai tak ah a la umdante kha a hetzing ziakin, a thanghuai zaw sêm a;

²⁰a hûk tâkluat ziakin, a zamawu chu sabiltung â gual leh, sakolchal ah kipat chipawt tawhbang ahi.

²¹Chutichun, Aiguptate’n la ngâklak ânglai kinoptelna a mat ua, la nungak lai nawi a khoi piak lai ua la tânzau lai hunte kha la thangai vung vung ta ahi.

²²Ziaziakchun, aw Oholibah, LALPA PATHIAN in zia gual hin a gen hi: La dawichâkte ki’dak in hun siam ing ka tin, kil tin ah kipat nangma do dingin hungsak ding ka hi:

²³Babulonte leh Kaldaite zosia, Pekod leh Shoa leh Koa leh a kiang ah Assuriate zosia tawh, tangval mêlhoi, gam ukpate leh vaihawmte zosia, sepai hotute leh sepai gâlhat zosia a leng ua sakol chung ah chuang in hung in au.

²⁴Mallam ah kipat in mipi tam tak in a sakol kângtalaiteu leh, van pawte tawh hung do ding a hiu; kil tin ah nang do dingin phaw tawh, thik lukhuk tawh hung kuan intiu in, a kiang un vaihawmna pia’ng ka tin, a dan thuguat dungzui un la chung ah vaihawm ta’n au.

²⁵Thangtawm tak ah a hun soisak theina ding un, ka lung awilo’na la chung un bunkhup ing ka. La nâk leh la bilte âtthak piak intiu in, a hing sunte chu chemjam in that in au. La chanu leh chapate man intiu in, a hing sunte mei in kâng tum in a.

²⁶La nîk leh puante lîpthâk piak intiu in, la sana kicheinate lâkpiak ta’n au.

²⁷Aigupta gam ah kipat la thanhuaina leh la kizoknate haisak ing ka; ziate chu thangai ta pua’n la tin, Aigupta le hemil ta’n la, ti in.

²⁸LALPA PATHIAN in zia gual hin a gen ta ngâl a: La mi huat ma ma te khut in hun pia’ng ka tin, la ki’dak ma ma te khut in pûk lut inla;

²⁹hun haw ma ma kawm in hun soisa’n tiu in, la sepgimna gau lâkpiak in, khutngawn ah nutsia ah um in, la thanhuaina zosia hawkdaw piak hita’n la.

³⁰La thanhuaina leh nawchizokna ziakin zia gual hi la tuak ahi; namtin kiang ah la kizawk thanhuai ziak leh, a milimteu ziak ah la kisubuak zaw ziak uh ahi.

³¹La suapinu dung la sûn ziakin, a dawn ding chu nang dawn ding inle ka hun piak ahi tai.

³²Zia gual hin LALPA PATHIAN in a gen hi: La suapinu notung lian chu dawn ding la hi; musit leh nuisan ah um ding la hi, a dawl tam ngâl a.

³³La suapinu Samaria no, siatna leh thawmhauna, zukhamna leh lungngaina no chu, la khop sêt ah dawn ding la hi;

³⁴dawn vâ in, chîp kang inla; a bêlhal mang in la nawi âttha’n au; Ka gensa ahi ta’ngâl a, LALPA PATHIAN in a tii.

³⁵Ziaziakchun, LALPA PATHIAN in: Keima ei hemil ah lei nungngatsan tâk ziakin, la thanhuaina leh la kizokna ziak ah la chung ah tung ding hi thuak in, ti’n a gen a.

³⁶LALPA‘n ka kiang in: Mihing, Oholah leh Oholibah chung thu tan ding la hi em? A chutileh, a thil ki’dak um bawlteu chu tâklang in.

³⁷A zawntat ziak un, a khut uh thisan a nât kawm in; a milimteu tawh a zawntat tau ah, kei â ding ah cha a hinteu natiang chu a an ding un a pedok un.

³⁸Zia bep chule hilo in, ka chungin zia gual hin a bawl nalai ui: Ka sabbath nite a hi’buak niu ma ma chun, ka mun thiangtho le a hi’buak tau ahi.

³⁹A milimteu kiang ah kithoina ding ah a chateu a thalup niu ma ma in, ka munthiang hi’buak dingin a hung lut un. Ka In ah zia gual chun thil a bawl ui.

⁴⁰Gamla tak ah kipat pawsalte chial dingin palaite a sawl un, a hung ta ngei ui. Amau â dingin la kisil un, la mit uh chei in, kicheina chitin in la kichei ui;

⁴¹lal gual ah nuam tak in jalkhun in la kichuuah, la âng ah dawkan la dawu ah, a chung in ka gimtui leh sathau la koi un.

⁴²Mipi kipakna thawm in a tuam kîmvêl in, gamthip ah kipat zukhamte leh mi nautangte chu a hun pui khawm hi; a luchang ah lallukhuk hoi tak leh a numeiteu khut ah chauchate a busak ui.

⁴³Ziaphatchun, keima’n, “Katei, amanu jawntat khop gawp ahi tai ka la ti’n; ahi’n la, a lum khawm zing nalai ui,” ka ti’n.

⁴⁴Nawchizuaknu kiang ah mi a lût zing gual un, a kiang in a chia zing ui. Tichun, numei hûk Oholah tawh Oholibah kiang in a lût zing ui.

⁴⁵Himaleh, thudik ah vaihawmte chun ama chu ângkawm leh tualthat in thiamlo chansak ta’n au; ângkawmna leh a khut ah thisan bek zing ahiziak in.

⁴⁶LALPA PATHIAN in zia gual hin a gen ta’ngâl a: Amau sulau ding leh suam dingin mipi pui khawm un.

⁴⁷Mipite chun suang in sep uh hen la, chemjam in sât tel dim dem uh hen; a chanu chapateu that uh hen la, a In uh mei in hâltum uh hen.

⁴⁸Numei zosia’n la hûkna gual chu a lauthawng ua a bawl lona ding un, zia gual chun gam sung ah hûkna subei ding ka hi.

⁴⁹La hûkna ga chu mu’n la tin, la milim honau gilo tak gawtna chu tuak in lau; ziaphat chuleh, keima hi LALPA PATHIAN ka hi ti hun he ta’n lau, ti’n a gen a.