Read Vaiphei EZEKIEL 24 Bible Online

EZEKIEL 24 - Vaiphei bible

EZEKIEL 24

¹A kum kua’na, tha sawmna a ni sawmna chun, LALPA‘n ka kiang in thu a gen a:

²Mihing, tu’ni min, tu’ni min ma ma hi zikdok in. Tu’ni hin Babulon lengpa chun Jerusalem do pan ding ahi.

³Chun, mi thukhelte Inkuan chung thu ah tekhinthu’n zia gual hin gen in: LALPA PATHIAN in zia gual hin a gen hi, ti’n la: Bêl chu suang inla, suang zing inla; a sung ah tui le sung in;

⁴sa semsa chu thâk inla, a sapha zosia, a mal, a liang leh a gu pha pente chu thâk dim in.

⁵Gan hon lak ah a pha diakte chu la’n la; a nuai ah thingtum sia in; sa semsa chu huan inla, a gu tawh huan khawm in.

⁶Ziaziakchun, LALPA PATHIAN in zia gual hin a gen hi: Thisan sua hat khawpi chung a gik hi, sabel sung kângkhik, a bêlkhik hi’thian theilo ahi! A them them in thûkdok unla, têlchuam ding a um puai.

⁷A mithate thisan chu a khua sung in a luang ngal a; leivui in a sêl thei ding ah lei tual ah sungtha lo in, suangpi keu chung in a bunthâi.

⁸Phuba la ding ah ka lungnatna choktho dingin, a thisan sua sêlguk ahi lona ding in, suangpi chung ah ka koi ahi.

⁹Ziaziakchun, zia gual hin LALPA PATHIAN in a gen hi: Thisan sua hat khawpi chung a gik hi! A thingkhua keima’n nasa tak in siabe nalai ding ka hi.

¹⁰Thingkhua siavum unla, mei chu sêm kuang un; sa chu huan phau inla, chok hel unla, a gute chu huan kâng hial un.

¹¹Sumbêl a hung sat ah, a khîk leh a tuiêk a kat tum ah, a bêl a val theina dingin, meihol âm chung in suang un.

¹²Ka gim thawn na e! A khîk sâ tak chu a bei diak pua’n, mei in a tuiêk a kâng thiang thei puai!

¹³La hûknau buakna ka hun silthian guat inle, la buaknau ah kipat in la thiang thei diak puau hi; ka lungnatna a dam masia’n, sukthian kit hita pua’n lau.

¹⁴Keima LALPA hin ka gen tai; a hun tung ding ahi tai, bawl ngei ding ka hi. Kisûm pua’ng ka tin, hawi pua’ng ka tin, kipadâm pua’ng ka! La umdan leh la thil hi dungzui in la chung ah vaihawm ding ka hi, LALPA PATHIAN in a tii, ti in.

¹⁵LALPA‘n ka kiang in thu a gen a:

¹⁶Mihing, phutlo in la mu nop pen te chu lamang ding ka hi; himaleh, kap pua’n la tin, sûn diak lo in, la mitthi le pawt pua’n a.

¹⁷A gûkcha’n, thûm inla, mithi chu sûn kin. La dialkop inla, la kengtawdap but zing in; la mûk tuam kin la, lusûnna an le ne kin.

¹⁸Zia gual chun mipite kiang ah jingkal lam ah ka gen a; chun, nitâk lam in ka ji chu a thi tai. Chun, a jingkal in thupiak ah ka um gual chun ka bawl tai.

¹⁹Ziaphatchun, mipite’n ka kiang in, “Zia gual ah la bawl hi, kei uh â ding ah bang etsakna ahi ei hil lo ding la hem?” a tiu a.

²⁰A kiang un, “LALPA‘n ka kiang in,

²¹Israel Inkuante kiang ah, LALPA PATHIAN in zia gual hin a gen hi: La kisuanpi, la mu nop pen leh la lunggil ah la ngainat pen, ka mun thiangtho chu subuak ding ka hi; chuleh, la chanu chapa la nutsiate chu chemjam in thi’n au.

²²Ka bawl gual khan nang unle hun bawl in lau; la mûk uh tuam pua’n la tiu in, lusûnna an le nelo ding la hiu.

²³La dial uh kop in la tiu in, la kengtawu le but in; lusûn in, kap pua’n la tiu in; himaleh, la thil bawlkhialnau ah mangthai in kikâ khum tua ta’n lau.

²⁴Zia gual chun, Ezekiel chu nanghaw â ding ah tepte’na hita’n a; ama um gual gual khan hun bawl ta’n lau. Zia chu a hung tun phat leh, Keima hi LALPA PATHIAN chu ka hi ti hun he ta’n lau,” ti’n a gen tai.

²⁵Mihing, nang vang chu a kulpiteu, a kipaknau leh a lopinau, a mit uh limna pen leh a lungthim ua a ngainat pen uh leh, a chanu chapateu tawh ka lâkpiak ni phat leh,

²⁶zia ni chuleh, a suakcha pakhat in thil tung chanchin la kiang in hung hil in a.

²⁷Zia ni chuleh, a suakcha sun kiang ah chun thu gen ding la hi; thip hiat hiat in um talo ding la hi. Tichun, amau â ding ah tepte’na hung hita’n la; chuleh, amau in Keima LALPA ka hi ti he ta’n au, ti in.