Read Vaiphei EZEKIEL 25 Bible Online

EZEKIEL 25 - Vaiphei bible

EZEKIEL 25

¹LALPA‘n ka kiang in:

²Mihing, Ammonte lam nga’n la, amau kãl in thu gen in.

³Ammonte kiang in, LALPA PATHIAN gen hi ngai un, ti’n la: LALPA PATHIAN in zia gual hin a gen hi: Ka mun thiangtho sukbuak ahi lai ah, Israel gam sukgam ahi lai ah, Judah Inkuante sal ah pui mang ahi lai un phaje lasak ma ma ziak khan;

⁴nang le sualam gam ah mite khut ah hun pia ding ka hi. La lak un giamun siam intiu in, la khawlai un a puan Inteu jak in au; la thâigau nêk piak in, la bawngnawi uh dawn piak ta’n au.

⁵La khawpiu Rabbah chu sangawngsau tatna mun in siam ing ka tin, la gam uh Ammon chule belam hon giakna mun in siam ding ka hi. Ziaphat chuleh, Keima hi LALPA ka hi ti hun he ta’n lau.

⁶LALPA PATHIAN in zia gual hin a gen ngâl a: Israel gam chungchâng ah musit tak leh, huatna ziak ah kipak ah khutbêng leh kichawm ah la um ziak un,

⁷la chung ah khut tha dingin ka lâm ta ahi; namdangte gâl lâk dingin hun matsak ding ka hi. Midangte lak ah hun sâttha’ng ka tin, la gam ua kipat hun sumangthai ing ka tin, hun susia’ng ka. Ziaphat chuleh, Keima hi LALPA ka hi ti hun he ta’n lau, ti in.

⁸LALPA PATHIAN in zia gual hin a gen hi: Moabte’n Judah Inkuante le nam dangte gual bep a hiu, a ti ziak un,

⁹Moab gam chu a kisuanpiu gamgi jul ah a khawpiteu, Beth-jeshimoth, Baal-meon leh Kiriathaim te hi a mêlmateu lutna dingin hong ding ka hi.

¹⁰Ammonte tawh a paniu in, sualam gam ah mite kiang in a gochan ding un pia ding ka hi. Tichun, namte lak ah Ammon chu hetphâk hita pua’n tin;

¹¹chuleh, Moab chung ah thutanna bawl ta’ng ka. Ziaphat chuleh, Keima hi LALPA ka hi ti hun he ta’n au, ti in.

¹²LALPA PATHIAN in zia gual hin a gen hi: Edom in Judah Inkuante chung ah phuba lâkna a do ziak leh, a chung ua phuba lâkna nasa tak ah a la hi’buai ziak un,

¹³LALPA PATHIAN in zia gual hin a gen hi: Edom do dingin ka khut lâm ing ka tin, a lak ua kipat mihing leh gancha natiang in gawtmang ding ka hi; Teman ah kipat Dedan tiang in chemjam in thi’n au.

¹⁴Edomte chung ah phuba chu ka mipi Israelte khut in la ding ka hi; tichun, a chung ua ka lungnatna leh ka thangtawmna dungzui in Edomte chung ah bawl ta’n au; chuleh, phuba ka lâk ahi ti le he ta’n au, tin LALPA PATHIAN in a gen tai, ti in.

¹⁵LALPA PATHIAN in zia gual hin a gen a: Philistinte’n phuba la’n, kimudana ziak ah tawp ni umlo ah mi sukmanthai nopna lungthim sia pu phuba a lâk ziak un;

¹⁶LALPA PATHIAN in zia gual hin a gen hi: Philistinte do dingin ka khut lâm ing ka tin, Khereth khua mite that ing ka tin, tuisuagiat pangjul ah chêng zosia chule that ing ka.

¹⁷A chung ua lungna leh thangtawm ma ma in, a huaisia thei pen ah gawt kawm in, phuba la ding ka hi. A chung ua phuba ka lâk phat leh, Keima LALPA ka hi ti hun he ta’n au, ti in.