Read Vaiphei EZEKIEL 26 Bible Online

EZEKIEL 26 - Vaiphei bible

EZEKIEL 26

¹A kum sawm leh khatna, a tha khatna, ni khat ni’ chun, LALPA‘n ka kiang in:

²Mihing, Jerusalem chungchâng ah Tura in zia gual hin a la gen ta’n: “Katei, mipite kotpi a chim tai; kei â dingin a hung kihong hi; a chimsa kha lua dim kit ing ka,” ti in.

³Ziaziakchun, LALPA PATHIAN in zia gual hin a gen hi: Aw Tura, ngai in ka hun kãl hi! tuisuagiat in a fawn a nawk khawm gual in, nang do dingin nam tam tak hun chok phûl ding ka hi.

⁴Tura kulbângte hisia’n tiu in, a Insângte hi’chim in au. A sung ah lei chu gît thiang ing ka tin, suangpi thiang gual in siam ing ka.

⁵Tuisuagiat lailung ah lên phâna mun hung hi’n a. Keima LALPA PATHIAN hin ka gensa ahi. Nam dangte gâl lâk hung hi’n au;

⁶a gam sung khawpi dang ah umte chu, chemjam in that gam ta’n au. Ziaphat chuleh, Keima hi LALPA ka hi, ti he ta’n au, ti’n a gen a.

⁷LALPA PATHIAN in zia gual hin a gen ngâl a: Tura do dingin mallam lal Nebukadnezar, leng zosia lak ah hat pen chu a sakol tawh, a sakol kângtalai tawh, a sakol sepai tawh, sepai hât tam tak tawh hun sawl ding ka hi.

⁸Gam sung ah la khawpel ah chêng zosia, chemjam in that gam in a. Nangma do’na ding kul hun bawl khum intiu in, nang do’na ding leipalte bawl intiu in, kidâlna phaw detdo tak siam in au.

⁹Kul suksiatna thingtum chun, la kulbâng sulîng intin, a heichapi’n la In sâng tuchim in a.

¹⁰A sakol uh tam bêk ziakin, a chotnau leivui khu’n hun chup hial in a. A sakol sepaiteu leh, a kângtalai keng kipei gite chun, la kulpite thing intin, la kotpite a lût guat phat leh, khawpi kul bei gual in lût theng ta’n au.

¹¹A sakol kengtin un la kotzing zosia chuan sia’n au. La mipite chemjam in that intiu in, la khuampi detdote chu khet chim hita’n a.

¹²La hausaknau leh la neithil zosiau suam ta’n au; la kulpite phe jak intiu in, la In mêlpha takte chu hi’chim ta’n au. La suangte, thingte leh la leivuite chu, tui lak ah sep lut in au.

¹³La La sak husate thipsak ing ka tin, la tingtang giteu het hi kit ta pua’n a.

¹⁴Suangpi keu gual in hun siam ing ka tin, lên pho’na mun hung suak ta’n la. Bawl phat kit hita pua’n la, Keima LALPA hin ka gen ta’ngâl a, LALPA PATHIAN chun a tii.

¹⁵Tura kiang in LALPA PATHIAN in zia gual hin a gen hi: La sung ah kitha’na a um zing ah, liamna thuakte thûm leh mau ah a um zing ui, la pûkna thawmgit in tuisuagiat pâm ah gamte chu thawng lo ding a hem?

¹⁶Ziaphat chuleh, tuisuagiat pang ah lal zosia’n a lalchutphau nusia’n, a lalpuanteu leh puanjem hoi takte liptha’n, lau ah kithing in lei tual ah kitung ta’n au; kithing den intiu in, mak hun sa’n au.

¹⁷Tichun, nang Sûnna La zia gual hin lem ta’n au: “Aw, khawpi minthang, khatvei chu nang leh la sung ah chêng zosia, tuisuagiat chung ah gâlhat la la hita’n; gam zosia chung ah tizat um, bangtidan ah tuisuagiat ah mangthai ziang la hitam!

¹⁸Tuisuagiat pang ah gamte la siat ni’n a kithing un; tuisuagiat pang ah gamte chu, la manthai ni’n a beidong ui,” ti in.

¹⁹LALPA PATHIAN in zia gual hin a gen ta’ngâl a: Kuama chên lona khawpite gual ah, khawpi sia ka hun suaksak ah, tuili thûk te ka hun chup mangsak phatin, tuiliante’n a hun chupmang tau a,

²⁰tuan ah tâng ah a la chiasate zotna, Mithi khua lam ah ka hun sot lût phat leh, tuan ah tâng ah mithi khua a la chêngsate lak in, nuaimi lam ah chêng ding la hitâk ziakin, mihingte chênna khawvel ah hin mun nei ta pua’n la tin, a lak unle chêng ta pua’n la.

²¹Tizat um tak in hun hi’tawp ing ka tin, um talo ding la hi; hun hawl maleu kuama’n hun mu zo ta pua’n au, LALPA PATHIAN in a ti ahi, ti in.