Read Vaiphei EZEKIEL 27 Bible Online

EZEKIEL 27 - Vaiphei bible

EZEKIEL 27

¹LALPA‘n ka kiang in thu a hun gen a:

²Tu’hin, nang mihing, Tura chung ah Kâ La lem inla,

³tuisuagiat lûtna kotbul ah kitung ah, tuisuagiat pang ah mi tamtakte lak ah sumkawlveipa, Tura kiang in zia gual hin gen in: LALPA PATHIAN in zia gual hin a gen hi, ti’n la: “Mêlpha bukim ka hi,” tipa, aw Tura.

⁴La gamgite chu tuisuagiat lailung ahi’n; nang hun siamte chun demna bei ah mêlpha’n a hun siam ui.

⁵Senir tâng ah châk thingte thingpêk in a mang un; long ngul dingin Lebanon tâng ah sidar thingte a lau a.

⁶Bashan sasaw thingte chu longjapna mol dingin a bawl un; Kupra tuipi gei ah thing kiladok, long tuang ah siam chu saiha tuam ahi.

⁷La puanjak chu Aigupta gam ah, puan malngat jem hoi ah kisiam la tepte’na ahi; Elishah luikam ah puan a dum leh, sandupte chu kikhu’na’n la mang hi.

⁸La longjapte chu Sidon leh Arvad khua’ mite a hiu; Zemer ah mi khutthiamte chu, la long jap dingin la lak un a um ui.

⁹Gebal upate tawh a mi khutthiamteu chu, la kiang un a um un, long siampha leh châl ah um a hiu; la thil zokte chaw dingin, a longputeu tawh tuisuagiat ah long zosia a um khawm ui.

¹⁰La sepai, mi hangsante lak in Paraste, Ludte leh Putte a pang un; nangma chu chîngkil ah hun mang in a phawu leh, a thîk lukhukteu a bât un; lopina a hun piau hi.

¹¹Arvad te tawh Helekh te chu, la kulbâng kîmvêl in a pang un; Gamad mite chu gâlvênbûk sâng in a chângpang ui. La kulbâng zosia’n a thalchangteu a thundim un; la mêlphatna a hi’bukim ui.

¹²La hausatna thupi tak ziakin, Tarshish tawh sumkawlveina’n la kikopvâi un; la thil siamdawteu man dingin, dangka thîk, thîk tak, langva thîk leh hâkngêkte a hun piau hi.

¹³Javan, Tubal leh Meshekte’nle la kiang in sumkawl a vei un; la thil neiteu man dingin suak ding mihing leh sum-engte a hun piau hi.

¹⁴Beth-togarmahten le la van uh thenna’n, kido’na sakolte leh sabiltungte a hun piau a.

¹⁵Dedan mite’n le sumkawl a hung vei un; tuisuagiat pang ah gam tam takte hi la sumkawlveina mun a hiu; la van uh tawh then dingin saiha leh selseu gilte a hun puau hi.

¹⁶La hausat ziakin Edomte’n le sumkawl a hung vei un; suang mantamte, puan sandup, puanjem, puanmalngat, khival leh rubi suangte’n la van a hung theng sek ui.

¹⁷Judah leh Israel gam inle sumkawl a hung vei un; Minnith ah gehu bu, châng, khuaizu, sathau leh thingnâi gimtuite’n la van a hung kithenpi sek ui.

¹⁸Helbon ah uain leh samul vamte leh, la hausakna leh la thil siamdaw tam takte ah kivei dingin, Damaska a hung hi.

¹⁹Uzal ah kipat in Vedan leh Javan mite le la thilsiamdaw ah kivei dingin a hung un; thîkthem, gimtuite leh thingguithumte tawh la van a hung kithenpiu a.

²⁰Dedan inle sakol chung chutna puandapte kiveina’n a hung mang a.

²¹Arabia tawh Kedar ah milian zosia le la belam, belamchal leh kêlchal ah kiveite a hiu ah; ziate ah hin nang tawh kiveina a siam ui.

²²Sheba leh Raamah ah kiveite chun, la thilneite tawh kithenpi ding in gimtui phapen pente, suangmantam chitinte leh sanate a hun puau hi.

²³Haran, Kanneh, Eden leh Sheba ah kivei mite leh Asshur leh Khilmadte chun kiveina’n a hun mang ui.

²⁴Zia mite hin nîk leh puan pha pente, puandum leh puanjem neite, a jem chi chuam chuam ah kisiam, tuang ah dâp chite a hênna mong kâite leh pha tak ah kiphante mang in sumkawl a hung vei ui.

²⁵La kiveina dingin Tarshish longliante a chia vêl un. Tichun, tuisuagiat lailung ah van-gik ah dim in a puau hi.

²⁶La longpute’n tuisuagiat ah a hun tawl lut ui. Tuisuagiat lailung ah sualam huipi’n a hun mûtsia tai.

²⁷La hausakna zosia, la thil siamdawte, la kiveinate, la longpute leh hotute, long siamte leh la kiveina van zosia, la sepai hangsan zosia leh la kiang ah la umkhawmpi zosia, tuisuagiat li lai in la tumpi tai, la vangsiat ni chun.

²⁸La longpute patau thawmgi chun la kîmvêl gam a thawng in;

²⁹long chung ah kipat in longjapte zosia a kum tau hi. Tuisuagiat ah longpute leh a hotuteu zosia, se’pho in a ding un;

³⁰nangma sûn in thasia tak in a kap ui. A luchung ua leivui kibuak khum in, leivui lak in a kitel puang tau in;

³¹nang sûnna’n a luu a metkol un, saidip puan a sil ui; thasia tak ah kap in, a sûn tau hi.

³²Thasia tak ah a hun sûn lai un, la chung ah kâ La lem in a sûn ui: “Tura gual ah tuisuagiat lilai ah, hisiat kua dang a um kha em?

³³La nei thilte tuisuagiat ah kipat, puakdaw ahi’phat leh, mi tampite la kipaksak sek in; la neinungna leh la kiveinate’n, khawvel ah leng zosia la hi’hausa sek hi.

³⁴Tu’n vang tuisuagiat lilai ah, tuili thûkna mun ah hisiat in la um tai; la kiveina van zosia tawh la long mite zosia pum in, la tum khawm tau hi.

³⁵Tuisuagiat pang ah chêng zosia’n lamdang a hun sau; a leng leh lalteu a tiza zo tau in, a mai uh a dâng zo tai.

³⁶Mitin lak ah kivei zosia’n, la thil tuak khawk a sa chiat ui; tizat um tak in la mangthai ta’n, bangtik inle hung um kit ta pua’n la,” a tiu a.