Read Vaiphei EZEKIEL 28 Bible Online

EZEKIEL 28 - Vaiphei bible

EZEKIEL 28

¹LALPA‘n ka kiang in:

²Tura lengpa kiang in, LALPA PATHIAN in zia gual hin a gen hi, va ti’n: La lungthim in la kiletsak ah, “Pathian ka hi, pathiante chutna tuisuagiat lilai ah kichu ka hi,” la ti hen; pathian lungthim tawh kibang nei in kikoi malechin le, pathian hilo in mihing, a thi thei mai mai la hi nalai hi.

³Danial sâng in vang la pilzaw’n, la hetdaw zaw lo thugûk a um puai;

⁴la pilna leh hetthiamna ziakin, hausakna chitin, sana leh dangka la gobawm dim in la kikhol khawm hi.

⁵Kivei dan la thiam ziakin la hausakna la hi’pung ah; la hausakna ziakin la lungthim in la kiletsak tai.

⁶Ziaziakchun, LALPA PATHIAN in zia gual hin a gen hi: Pathian lungthim tawh la lungthim kibang ah la ngai ziakin,

⁷nam zosia lak ah tizat um pen, la het khâklote hung dosak ding ka hi; la kisuanpi la pilna that gam dingin, a chemjam uh jukdok intiu in, la lopina hi’buak ta’n au.

⁸Mithi khua’n hun nam lut intiu in, tuisuagiat lilai ah tual thi in lau.

⁹A hun thatte kiang leh, a hun hi’liamte kiang in pathian hilopi, mihing thi thei hi’ngal in, “Pathian ka hi,” la ti tei tei nalai diam?

¹⁰Gam dang mite khut in zektanlote gual in thi’n la; Keima LALPA PATHIAN in ka ti ta’ngal a, ti in.

¹¹Zia ban ah chun, LALPA‘n ka kiang in:

¹²Mihing, Tura lengpa Sûnna La phuak inla, a kiang in, LALPA PATHIAN in zia gual hin a gen hi ti’n la: Nang pilna dim leh demna umlo ah mêlpha, bukimna tepte’na’ mat la hi.

¹³Pathian huan, Eden ah la um hi; suang mantam chitin: karnelian, topaz leh jaspar, krusolit, beril leh onik, saphir, karbankul leh emeral, zosia hi la kicheina a hiu a; la kicheina zosia chu sana ah kisiam ngen ahi. Nangma kisiam ni khan ziate zosia hi, nang â ding ah siam ahi tau hi.

¹⁴Sathaunu’ ah um Cherubte venbitna nuai in ka hun koi in; Pathian tâng thiangtho ah la um in, mei ah kuang suang lak in la vâk vêl vêl hi.

¹⁵Nangma siam ah la um ni kipat, la siatna mu ahi masang in, la tawidan zosia’n demna ding a um puai.

¹⁶La hung kiveipun ma ma phatin, hiamngamna nei in gitlona la hun bawl tai; tichun, Pathian tâng thiangtho ah kipat in, buaksia gual in ka hun paidok ta’n; chuleh, mei ah kuang suang lak ah kipat in, vengtu Cherubte’n a hun nawdok tau hi.

¹⁷La mêlphatna ziakin la lungthim a kiletsak in; la lopina ziakin la pilna la hi’khawlo zo tai. Lei tual in ka hun paitha tai; etnop ah a hun mat ding un, lengte âng in ka hun koidok tai.

¹⁸La nunsiatna a tam bêk ziak leh, la kiveidan a diklo ziakin, la mun thiangthote la subuak tai. Chutichun, la sung in mei ka hun sêm ah, a hun hâltum tai; nang hun mu zosiate mit mu in, lei tual ah vut la suak tai.

¹⁹Mite lak ah nang hun he zosia’n lamdang a hun sau; tizat um tak in la mangthai ta’n, bangtik inle hung um kit ta pua’n la, ti’n gen in a hun tia.

²⁰LALPA‘n ka kiang in:

²¹Mihing, Sidon lam nga’n la, ama kãl in thu gen in,

²²LALPA PATHIAN in zia gual hin a gen hi: Aw Sidon, ka hun do la hi, la lak un lopina chang ding ka hi. A sung ah vai ka hawm ah, ka thianthona ka tâklat phat leh, LALPA ka hi ti hun he ta’n au.

²³A lak un natpi ka sawl ding ziakin, a kotzingteu ah tualthana um ding ahi; kil tin ah kipat chemjam in a hun do ding ziakin, a lak un mithiluang tampi kizam ta’n au. Chun, Keima LALPA hi ei hun he ta’n au.

²⁴Israel Inkuante simmaw tak ah a la engbawl, a Invêngte lak in ling leh khau lingnei in a hi’nat gual ah hi’na ding leh, subuai ding, kuama um ta pua’n ah. Chun, Keima LALPA PATHIAN ka hi ti hun he ta’n au, ti in.

²⁵LALPA PATHIAN in zia gual hin a gen hi: Israel Inkuante a kithe’cheknau mun tin ah kipat ka pui khawm kit ah, nam tinte mit mu ah ka thianthona ka tâklat phat leh, ka suak Jakob kiang ah ka la piakna, a gam uh chun chêng ta’n au.

²⁶Bit tak in chêng ta’n tiu in, a In ding uh kisak in, a grep huanteu kibawl ta’n au. Amau simmaw ma ma a Invêngteu zosia chung ah vai ka hawm phat leh, bit tak in chêng ta’n au. Chun, Keima hi LALPA a Pathian uh ka hi dan hun he ta’n au, ti’n a gen a.