Read Vaiphei EZEKIEL 29 Bible Online

EZEKIEL 29 - Vaiphei bible

EZEKIEL 29

¹Kum sawmna, tha sawmna leh a ni sawm leh nina chun, LALPA‘n ka kiang in thu a hun gen a:

²Mihing, Aigupta lengpa Pharaoh lam nga’n la, ama leh Aigupta gam pumpi kãl in,

³zia gual hin gen in: LALPA PATHIAN in zia gual hin a gen hi, ti’n la: “Ngai in, Nail luipi hi kei â ahi’n, kei â ding ah ka siam ahi,” tipa chun dragon lian tak luidung ah um gual ah, Aigupta lengpa Pharaoh, ka hun do la hi.

⁴Ngakuai in la khagu hun kuai ing ka tin, la umna luidung ah sanga zosia, la phulip in be’sak ing ka. La umna luidung ah kipat in, nang leh la luidung ah sanga la phulip ah bek zosia, hun khaidok khawm ding ka hi.

⁵Nang tawh la luidung ah sanga um zosia chu, gamkeu ah seplut ing ka tin; gamtalai ah thi’n la tin, vui dingin kuama’n hun chomkhawm pua’n a. Lei chung ah gamsate leh, chunglêng vachate an ding ah ka hun piak ahi.

⁶Israel Inkuante â ding ah luangkang tawhbang la hiziak in, Aigupta gam ah mi zosia’n Keima hi LALPA ka hi ti hun he ta’n au;

⁷tûkchâk ah a hun nei uh leh la bong in; a liangko zosiau la puaitel ta’n; kinêlna a hun mat uh leh, la bong in; a kengteu la tawtholsak tai.

⁸Ziaziakchun, LALPA PATHIAN in zia gual hin a gen hi: Nangma do ding in chemjam hun sawl ing ka tin, mihing leh gamsate lak ah kipat hun paitha ding ka hi;

⁹tichun, Aigupta gam chu a hawm leh a ngawnchang ah nutsia hita’n a. Ziaphat chuleh, Keima hi LALPA ka hi ti he ta’n au. Nang in, “Nail luipi hi kei â ahi, ka kisiam ahi,” la tingal a;

¹⁰ziaziakchun, nang leh la luidungte ka do hi; tichun, Aigupta gam hi Migdol ah kipat Syene, Ethiopia gamgi bul tiang in a hawm leh bangma umlo ah ka siam ahi.

¹¹Kuama’n haw pua’n tin, gamsa te’nle haw ta pua’n ah; kum sawmli sung kuama chêng lo in um ta’n a.

¹²Gamthipte lak ah Aigupta gam chu, a thawmhau pen in siam ing ka tin; a khawpite chule suksiat ah um khawpi zosia lak ah huaisia diak in, kum sawmli sung um ta’n a. Namtin lak ah Aigupta thejak ing ka tin, gam tin ah the’chek ta’ng ka.

¹³Zia ban ah chun, LALPA PATHIAN in zia gual hin a gen a: Kum sawmli zaw leh, a kithejaknau mitin lak ah kipat in, Aigupta mite chu pui khawm kit ing ka tin,

¹⁴Aiguptate vangphatna pia kit ing ka tin, a kipatnau Pathros gam ah pui tung kit ding ka hi; zia tak ah chun lenggam zawngkhâl tak in um ta’n au.

¹⁵Lenggam zosia lak ah a zawngkhâl pen a hiding ziak un, nam dangte chung in kiletsak ta pua’n au; zawngkhâl tak ah ka siam ziakin, nam dangte chung in thu nei zo ta pua’n au.

¹⁶Aiguptate chu Israel Inkuante’n kisuanpi ngai ngai ta pua’n au; a panpi ding ah a vachial phat uh leh le, a la bawl khial dan uh hiatsak zaw ta’n au. Ziaphat chuleh, Kei hi LALPA PATHIAN ka hi ti hun he ta’n au.

¹⁷Kum sawmni leh sagi’na, tha khatna, a ni masa pen ah chun LALPA‘n ka kiang in thu a hun gen a:

¹⁸Mihing, Babulon Lengpa Nebukadrezar in, Tura do dingin a sepaite gim tak in a pansak in; luchang zosia kol hial leh a liangko zosiau dul hial in a pang tau hi; himaleh, amau hin a sepaiteu hileh, Tura do ah a sepgimnau tawh kiphutawk in bangma a lawchâk puau hi.

¹⁹Ziaziakchun, LALPA PATHIAN in zia gual hin a gen hi: Babulon Lengpa Nebukadrezar kiang in Aigupta gam hi pia ding ka hi; a hausaknau zosia lâkpiak in, suam in chomgam intin; a sepaite law dingin pia’n a.

²⁰Kei â ding ah nasem a hiziak un, a sepgim man ding un Aigupta gam hi pia ding ka hi, LALPA PATHIAN in a tii, ti in.

²¹Ziaphat chuleh, Israel Inkuante â dingin kî pakhat kêdawsak ing ka tin, a lak un thu hun gensak ding ka hi. Ziaphat chuleh, Kei hi LALPA ka hi ti hun he ta’n au, a tia.