Read Vaiphei EZEKIEL 3 Bible Online

EZEKIEL 3 - Vaiphei bible

EZEKIEL 3

¹Ama chun ka kiang in: Aw mihing, a hun kipia hi ne ziang in; zia lekhabu kizial hi ne’n la, chia inla Israelte kiang ah vagen in, a hun ti tai.

²Tichun, ka kam ka ka ta’n; chuleh, ama’n ka nêk dingin lekhabu kizial chu ei pia tai.

³Ka kiang in: Mihing, zia lekhabu kizial ka hun piak chu ne’n la, la gilpi vâ hial in ne ziang in, a hun tia. Ziaphatchun, ka ne ta’n; ka kam in khuaizu gual in a thum hi.

⁴Chuleh, ka kiang in: Mihing, Israelte kiang ah chia inla, zia ka thu ma ma hi vagen in.

⁵Pauchuam leh pau haksa la het theilote kiang in ka hun sawl pua’n, Israelte kiang in ka hun sawl la hi’ngal a;

⁶pauchuam leh pau haksate, a pau uh la hetthei lo mite kiang in ka hun sawl puai. Amau kiang ah hun sawl hileng chu, matheilo in la thugen ngaisak in au.

⁷Himaleh, Israel Inkuante chun la thugen ngaisak pua’n au, ka thugen a ngainop lo ziak un; Israel Inkuante zosia milochal leh lung tâk ngen a hiziak un.

⁸Ngai in, a maichang uh kãl dingin la maichang leh, a chalkiu kãl dingin la chalki ka hikhau tai.

⁹Suanggial leh suang tâk pen sâng ah le tâk zaw’n la chalki ka siam piak tai; amau chu lau kin la, a mêl unle hun hi’lungthuai diak kiu hen, helmangte Inkuan ahi ngal un.

¹⁰Chuleh, ka kiang in: Mihing, la kiang ah ka thugen ding zosia hi la lunggil in vop inla, la bil inle he ta hen;

¹¹ziaphat chuleh, la chipi saltângte kiang ah chia inla, a kiang un thu vagen in. Ngai nuam in ngainuam lo leule, a kiang un: LALPA PATHIAN in zia gual hin a gen hi, ti’n la vagen ding ahi, ti’n a gen a.

¹²Ziaphatchun, thagau in ei domkâng ah, LALPA lopina a umna mun ah a kipatdaw phatin, ka nung lam in husa nasa tak ka he ta’n;

¹³zia husa chu thilhingte’n a thau a ta’tua git uh leh, a pang chiat ua kângtalai kengte git, husa nasa tak gual ah hung pawtdok ahi.

¹⁴Thagau chun ei domkâng in, ei paw mang ta’n; ka chung ah LALPA khut a hât bêk ziakin, ka thagau kithunun lo leh nuam lo sasa’n ka chia tai.

¹⁵Khebar lui pang ah saltângte chênna mun, Tel-abib chu ka vatung tai. Lamdang sa’n, ni sagi a lak un ka kichu ta mai a.

¹⁶Ni sagi zaw phatin, LALPA‘n ka kiang in thu a hun gen a:

¹⁷Mihing, Israel Inkuante vêng dingin ka hun siam tai; ka kam ah kipat thu la het phat leh, keima ah kipat in thu la hil ding ahi.

¹⁸Mi nunsia kiang ah, “Thi ngei ngei ding la hi,” ka ti ah, a kiang ua hilna thu la gen lo ah, zia mi nunsia chu a hinna ding ah a nunchan phalo nusia ding ah la hil lo ahileh, zia gual ah mi nunsia chu a tat phalo ziakin a thi ding ahi; himaleh, a thisan mawu la chung ah phût ding ka hi.

¹⁹Ahi’n, mi nunsia chu la hil ah, himaleh, a nunsiatnau a kiheisan lo ua, a nunsiat nau lampile a haisan lo uh chun, a tat phalo ziak un a thi ding uh ahi; himaleh, nang in vang la hinna hukdok ta’n la.

²⁰Chuleh, mi diktat in diktatna a kiheisan ah, dukdak lo tak ah a um ah, a masang ah a kipalna ding ka koi leh thi ding a hiu; thu la hil lo ziak leh, a gitlona ziak un a thi diu ahi; chuleh, a diktatnau zosia chu het zing hita pua’n ah; ahi’n, a thisan mawu nang khut ah phût ding ka hi.

²¹Ahi’n la, mi diktat chu gitlona haisan ding ah thu la hil ah, bawlkhial lo ah a um chun, a hing ngei ngei ding ahi, thuhilna a mat ziak un; chuleh, la hinna le la hukdok ding ahi tai, ti’n a gen a.

²²Ziaphatchun, LALPA khut ka chung in a hung um ta’n; chuleh, ka kiang in, “Kipan inla, phâijawl ah chiadok in, zia tak ah chun la kiang ah thu gen ding ka hi,” a ti kit a.

²³Tichun, ka kipan ah, phâijawl ah chun ka chia ta’n; chuleh, Khebar lui pang ah a lopina ka la mu gual khan LALPA lopina, zia tak ah chun a la ding ta’n; tichun, ka mai ah lei tual si’n ka bokkhup tai.

²⁴Thagau chu ka sung in a lût ah; chuleh, ei din dawsak in, ei hun ho ah, ka kiang in zia gual hin a gen ah: “Chia inla, la In sung ah kikhak khum in.

²⁵Nang, mihing la hileh vang, khauhual la chung ah zam hi’ntin, mipite lak ah la chia daw theilona dingin ziate chun hun kântom ta’n a;

²⁶amau kiang ah thu gentheilo leh thu la hil theilo’na dingin, la lei chu la khadang ah bedensak ing ka; helmangte Inkuan ahi ngal un.

²⁷Himaleh, la kiang ah thu ka hun gen kit phat leh, la kam kâtsak kit ing ka tin, ziaphat chuleh a kiang un, ‘Zia gual hin LALPA PATHIAN in a gen hi,’ ti ta’n la; a ngaitha nuam in ngaithau hen la, a ngaitha nuam lo in ngaithâk dâ tau hen; helmangte Inkuan ahi ngal un,” a ti tai.