Read Vaiphei EZEKIEL 30 Bible Online

EZEKIEL 30 - Vaiphei bible

EZEKIEL 30

¹LALPA‘n ka kiang in thu a hun gen a:

²Mihing, zia gual hin LALPA PATHIAN in a gen hi, ti’n la gen in: Ehei! tu’ni hi chu aw ti’n kap chuai chuai un,

³Zia ni chu a nai ta’n, LALPA ni ngei chu a nai ta’ngal a; sûmpi ji’n ni leh nam tinte vangsiat ni ding chu ahi.

⁴Aigupta gam ah mi thalup a hiu a, a hausaknau puak mang ahi ah, a suangphûmte sukchip ahi’phat leh, Aigupta gam ah chemjam lêng intin, Ethiopia gam ah lungngaina tung in a.

⁵A pankhawmpi Ethiopia, Put, Lut, Arabia tawh Libia gam ah mipi a pankhawmpi zosia chu chemjam in that gam in au.

⁶Zia gual hin LALPA‘n a gen hi: Aiguptate panpi zosia chu thâgam hi’n tiu in; Migdol ah kipat Syene tiang ah, a mihat kiletsak hung suk dingte chu, chemjam ah thâgam hita’n au, LALPA PATHIAN in a ti’ngal a.

⁷Gam thawmhau nutsia ah um zosia lak ah a huaisia pen in pang intin; khawpi hisiat ah um zosia lak in a huaisia pen hi’n a.

⁸Aigupta gam mei ah ka hâl ah, ama panpi zosia a siat gam phat leh, keima hi LALPA ka hi ti he ta’n au.

⁹Ziaphat chuleh, kiging khol lo tak ah um Ethiopiate hilau ding in, long liante ah thangkote sawldok ing ka tin; Aiguptate vangsiat ni chun, a chung un lungngaina hung tung ta’n ah; zia ni chu a hung tung ngal a!

¹⁰LALPA PATHIAN in zia gual hin a gen hi: Babulon lengpa Nebukadrezar khut in, Aiguptate go khol khawm chu subei ding ka hi.

¹¹Nam zosia lak ah tizat um pen, Nebukadrezar tawh a mipite chu, a gam uh susia ding in pui hi’n tiu in; Aigupta gam do in a chemjam uh jukdok intiu in, mithiluang in a gam uh sudim ta’n au.

¹²A luidungteu chu hi’kang ing ka tin, a gam uh migilote kiang in pia’ng ka; chuleh, a gam leh a sung ah um zosia le, gamdang mite khut in hisia’ng ka; Keima LALPA hin ka ti ta ahi.

¹³LALPA PATHIAN in zia gual hin a gen hi: A milim pathianteu susia’ng ka tin, Memphis mun ah a milim siamteu hi’tawp ing ka; Aigupta gam ah lal um kit ta pua’n a; tichun, Aigupta gam chu lau umna’n dimsak ta’ng ka.

¹⁴Pathros khua hi’sia’ng ka tin, Zoan khua mei in hâl ing ka tin, Thebes khua chungchâng ah vaihawmna thu tan khum ta’ng ka.

¹⁵Aiguptate kulpi Pelusium chung in ka lungnatna buntha’ng ka tin, Thebes khua mipite paitha’ng ka.

¹⁶Aigupta gam chu mei ah hâl ing ka tin, Pelusium lungngai tak in um in a; Thebes kulbâng phehawm ing ka tin, Memphis in sûnchang lai in mêlma nei in a.

¹⁷On leh Pibeseth khua tangvalte chu, chemjam in that intiu in; a khawpite chu sal in lût ta’n au.

¹⁸Aigupta gam thuneina ka hisiat phat leh, Tehaphnehes chu sûnchang lai tak in thim intin, a kisuanpi a hatna chu suktawp hung hi’n a; a khawpi chu sûmpi’n chup intin, a khawpelte chu sal ah pui in um ta’n au.

¹⁹Zia gual chun Aigupta chung ah thutanna bawl ing ka. Ziaphat chuleh, Keima hi LALPA ka hi ti he ta’n au.

²⁰Kum sawm leh khatna, tha khatna, a ni sagi ni chun, LALPA‘n ka kiang in thu a hun gen a:

²¹Mihing, Aigupta Lengpa Pharaoh khutbân chu ka khenbong tai; chemjam lek zo ding khop ah a hât kit theina ding ah sukdamna ding in, tuam le ahi puai.

²²Ziaziakchun, LALPA PATHIAN in zia gual hin a gen hi: Aigupta Lengpa Pharaoh chu ka do in, a khut thahât hitaleh, a bong tasa hilehle, hi’bong gêl ding ka hi; chuleh, a khut ah kipat chemjam khiak thâksak ta’ng ka.

²³Namtin lak ah Aiguptate the’chek ing ka tin, gamtin ah the’jak ding ka hi.

²⁴Babulon Lengpa khutbânte chu suhât ing ka tin, a khut ah ka chemjam koi ing ka; himaleh, Aigupta khutbânte chu hi’bong ding ka hi; thi ding khop ah liamna tuakte thûm gual in thavai tak in thûmsak ing ka.

²⁵Babulon Lengpa khutbânte chu suhât ing ka tin; himaleh, Aigupta Lengpa khutbânte chu guallel ta’n a. Babulon Lengpa khut ah ka chemjam ka koi phat leh, Keima LALPA ka hi ti he ta’n au. A chemjam chu Aigupta do-na’n lâm intin,

²⁶tichun, namtin lakah Aiguptate the’jak ing ka tin, gam tin ah the’chek ta’ng ka. Ziaphat chuleh, Keima hi LALPA ka hi ti he ta’n au.