Read Vaiphei EZEKIEL 32 Bible Online

EZEKIEL 32 - Vaiphei bible

EZEKIEL 32

¹Kum sawm leh ni’na, tha sawm leh ni’na a ni khat ni’n, LALPA‘n ka kiang in:

²Mihing, Aigupta Lengpa Pharaoh sûnna La zia gual hin phuak in, a hun tia: Namdang zosia lak in sakeibaknei gual in la kingai a, himaleh, tuisuagiat ah gulpi tawhbang la hi’ngâl a; luichate la chok vêl ah, la keng in tui la chok in, luicha tui zosia la chok buan tai.

³LALPA PATHIAN in zia gual hin a gen hi: Mi tam tak tawh la kikhop lai un, la chung un lên hun sep ing ka; ka lênlian in hun chûndok ding ka hi.

⁴Lei tual se’na’n hun nei ing ka tin, gamtalai ah hun sepdok ing ka tin, chunglêng vachate zosia la chung ah chênsak ing ka tin, lei chung zosia ah gam sahângte chu, huaihap tak in la sa chu nêksak ing ka.

⁵La saphe chu tâng chung ah thejak ing ka tin; phâijawlte chu la saluang in dimsak ing ka.

⁶La thisan in gam pumpi leh, tâng zosia chapsak ing ka tin, luiguam zosia le dim ta’n la.

⁷Nang ka hun gawtmang phat leh, vante khû ing ka tin, aksitele thimsak ing ka; nisa chu sûmpi liasak ing ka tin, thapi le thim ta’n a.

⁸Van ah vâk zosia chu la chung in thimsak ing ka tin; la gam chung ah thimpi jinsak ing ka, LALPA PATHIAN in a ti’ngâl a.

⁹La hetkhâk ngailona gamtin ah namtin lak ah, sal ah ka hun pui phât leh, la thawm un mite lungthim subuai ding ka hi.

¹⁰Mi tam takte’n nang ka hun bawl dan hi, a mu phât uh leh tiza’n au. A âng ua ka chejam ka vei phat leh, mitin la pûksiat niu ah chun, a hinnau lauthawng ziakin kithing zing ta’n au.

¹¹LALPA PATHIAN in zia gual hin a gen ngâl a: Babulon lengpa chemjam chu, nang do dingin hung kuan in a.

¹²Nam zosia lak ah tizat um pen mihatte chemjam in, la mipite thâsak ing ka. Aiguptate kisuanpi chu hi’siat in um ta’n tin, a mipite zosia mangthai in au.

¹³Tui kitinna mun ah la gancha honte chu, hi’sia’ng ka tin; mihingte keng hi’n, ganchate keng inle palni’n diak ta pua’n a.

¹⁴Tichun, a lui tuite suthiang ta’ng ka tin, a luichateu chule sathau gual in luansak ta’ng ka, LALPA PATHIAN in a ti’ngâl a.

¹⁵Aigupta gam ka hisiat phat leh, a gam sung ah gothil zosia leh, a sung ah chêng zosia ka gawtmang phat leh, ziaphat chuleh, Keima hi LALPA ka hi ti hun he ta’n au.

¹⁶Zia hi a sûnna La chu ahi’n, a chung in awi hita’n a. Namtin lak ah numeite’n awi in au. Aigupta leh a mipite chung ah sak in um ta’n a, LALPA PATHIAN in a tii, ti’n a gen a.

¹⁷Kum sawm leh ni’na, tha khatna, a ni sawm leh nga ni chun, LALPA‘n ka kiang in zia gual hin thu a hun gen a:

¹⁸Mihing, Aigupta mite zosia â dingin thûm inla, Aiguptate tawh nam minthangte chanute zosia tawh, Mithi khua chiate tawh a leng un nuaimi gam ah pai lut in.

¹⁹“Mêlhoina’n kua la khêl ah a hem? Chia suk in! Zektanlote tawh va um khawm tau in!” ti’n la.

²⁰Chemjam ah thite lak in pang ta’n au. Aigupta chu chemjam khut ah piakdaw a hita’n; ama leh a lawite chu a paw mang tau hi.

²¹Sheol ah um, amau panpite leh a hotulianteu chun, “Chemjam ah thite leh zektanlote chu a hung lut suk tau hi,” a la ti’n au.

²²Chemjam ah kithat, Assuriate leh a lawiteu chu, a thân un a ûm kîmvêl tai.

²³A thânkhûk uh chu Mithi khua kawchawng pen ah um ahi. Chemjam ah thi ta, a lawiteu chu a thânkhûk uh ûm kîmvêl ah um in, mihingte gam ah mite tizatsak in a um ui.

²⁴Zia chun Elam a um in, a lawite a thânkhûk kîmvêl un a um ui; chemjam ah thi, nuaimi gam ah zektanlo ah lûtsukte, khawvel ah mihing um nalaite tizatsak ma ma te chu a hiu. Mualpho tak ah mithi khua chia sukte chu a hiu.

²⁵A mi thâ te lakah ama leh a lawite lupna ding a bawl piak un, a thân ah ûm kîmvêl in, a leng un zektanlo, chemjam ah tha a hiu; a tizat umnau chu mihing gam ah genjak ahi’n, mithi khua lûtte tawh a mualphonau a paw khawm un, thalup ah umte lak in a koi tau hi.

²⁶Meshek, Tubal leh a mipite chu zia tak ah chun a um un, a thân khûkteu a kîmvêl un a um ah; a leng un zektanlo, chemjam ah thalup a hiu; chuleh, a tizat umnau chu mihingte gam ah genjak ahi.

²⁷Masang lai pek ah a gâlvanteu tawh, Sheol ah chia suk gâlhatte lak in a pang puau ah, a chemjamte chu a khapchâk un, a phawteu chu a guteu chung in a koi un; zia mi hangsante tizat umna chun, mihing gam ah um nalaite a sudîpchâk nalai hi.

²⁸Tichun, khet siat hi’n la tin, chemjam ah thi zektanlote tawh um khawm ding la hiu.

²⁹Edom le zia chun a lengte, a siamângte tawh, a hatnau ziak ah chemjam ah thi zosia tawh a zam khawm tau a; Mithi khua chia suk zektanlote tawh a um khawm tau hi.

³⁰Mallam ah lalte chule Sidonte tawh, a hatnau ziak ah mi zosia tizatte chu zakcha tak in, nuaimi gam in a lut khawm tau a; zektanlote tawh chemjam ah thi zosia chu, mualpho tak in mithi khua chun a kiton suk tau hi.

³¹Pharaoh in zia chu a mu phât in, a lawite ziakin kithamuan intin, Pharaoh leh a sepai, chemjam ah thi zosia chu, ti’n LALPA PATHIAN in a ti ta’ngâl a.

³²Khawvel ah mihingte zosia a la tizatsak ziakin, zektanlote lak ah chun, chemjam ah thi zosia chu tawh um khawm ta’n au — Pharaoh tawh a lawite chu, ti’n LALPA PATHIAN in a gen hi, ti in.