Read Vaiphei EZEKIEL 33 Bible Online

EZEKIEL 33 - Vaiphei bible

EZEKIEL 33

¹LALPA‘n ka kiang in:

²Aw mihing, la mipite kiang ah zia gual hin vagen tiam in: Gam pakhat chung ah kido’na ka tunsak ah, zia gam ah mite chun, amau lak ah gâlvêng dingin mi pakhat a guat un;

³gâlvêngpa chun gâlte hung chu mu’n, mipite hillawkna pengkul chu mût hen la;

⁴a pengkul mût git he ngâl in, a la kisalo khat um taleh, mêlma’n hun sim in hun chom gam taleh, a maw chu amau in a kipuak ding uh ahi.

⁵Pengkul git he ngâl ah, kigâl ginglo a hiu chun; a thisan mawu chu a kipuak diu ahi. A la kigâlging hileu vang, a hinnau kihukhing kha mai thei a hiu.

⁶Himaleh, gâlvêngpa’n gâlte hung a la mu ngâl in, kiginlawkna ding pengkul chu a la mût lo hileh vang, mipite chu hillawk a hilo ziak un, gâlte hung in hung suam gam taleu vang, a thisan phubau chu gâlvêngpa luchung ah chu ding ahi.

⁷Chutichun, nang mihing, Israelte gâlvêngpa hidingin ka hun guat la hi tai; bangtik hun hileh ka thugen la het taphot, kei ah kipat hillawkna thu chu la gensawn sek ding ahi.

⁸Migilo kiang ah, “Aw migilopa, thiding la hi e,” ka ti ah, zia migilo chu a umdan phalo nusia ding ah la vahil lo ahi chun, zia migilo chu a thil bawlkhial ziakin thiding ahi; himaleh, a thisan phuba chu nang chung ah ka sîk ding ahi.

⁹Himaleh, migilote chu a umdan diklo uh haisan ding ah la hil nung ah le, a haisan diak lo ua leh, mi gilote chu a thi ngei ngei diu ahi; himaleh, nang in la hinna hukdok ding la hi.

¹⁰Tu’hin, nang mihing, Israel Inkuante kiang in, “Nanghaw’n, ka hikhelnau leh ka gitlonateu in ei delkhum tâk ziakin, ka chautha zo tau in; bangti’n hingdam ah um thei nalai ding ka hiu em, la tiu a,” ti’n vagen in.

¹¹A kiang un, LALPA PATHIAN in kihaksial hial in, Migilo thi’na chun ka kipak puai; himaleh, migilote chun a umdan uh kiheisan uh hen la, hing leh dam in um leu ka ti ahi; hung kihei kit un, la umdan phaloteu nusia in hung kihei kit tau in; aw Israelte haw, bang ding ah thi mai ding la hiu em?

¹²Chuleh, nang mihing in la mipite kiang in vagen in: midik a la hitamaleh, thil a la bawlkhial kit chun, tu’ma lam ah a la dikna ziakin hukdaw hipua’n ah; zia gual tho ah chun, migilo chunle a thil bawlkhialnau a haisan uh chun, a thil bawlsa te ziakin kipûk pua’n au; chuleh, midik chunle thil a hi’khial chun, a la hidik sate ziakin hawi hi diak pua’n au.

¹³Chuleh, midikte kiang ah hing ngei ding la hi ka ti ah, amau dikna kisuanpi ziakin diklo tak in bawl kit taleu, a thil bawl phat zosiau kha, khat chale hetzing in um ta pua’n ah; ahi’n, a thil bawlkhialnau ziak chun a thi diu ahi.

¹⁴Chuleh, migilo kiang in, “Thi ngei ding la hi,” ti ah ka gensa himaleh, a gitlonau a haisan ua, a dik leh a thiang a bawl ua,

¹⁵migilo chun kitiamna gual ah a pitin ah, a lâkpiak sa a dit kit ah, hindan dik a zui ah, gitlona bawl lo ah a um chun hing ngei ngei intiu in, a thi’lo diu ahi.

¹⁶A thil bawlkhialteu khat chale hetzing hita pua’n ah; a dik leh a thiang in a tawi tau ah, a hin ngei ngei diu ahi.

¹⁷Himaleh, la mipite’n, amau umdan diklopi in, “LALPA thilbawldan hi a dik puai,” a ti nalai un.

¹⁸Midik in a umdan dik haisan ah, thil phalo a bawl phat leh, a thi ding ahi.

¹⁹Migilo in a umdan diklo haisan ah, a dik leh a thiang a bawl phat leh, a hin ding ahi, ti ahi.

²⁰Himaleh, nanghaw’n: “LALPA thil bawldan hi a dik puai,” la tiu a. Aw Israel Inkuante haw, la leng ua la umdan dungzui chiat un la chung un vaihawm ding ka hi! ti in.

²¹Ka saltânnau, kum sawm leh ni’na, tha sawmna leh, zia tha ah a ni nga tin ni chun, Jerusalem ah kipat hung suakcha pakhat ka kiangah hung in, zia gual hin a gen a: “Khawpi chu a pûk thiang tai,” a ti’n.

²²Gâl ah suakcha hung taimangpa hung tun ding jan ah khan, LALPA‘n nasa tak in ei umpi ah; himaleh, gâl ah suakchapa hung tun jingkal ah chun, ka kam chu thu gen theina ei pia’n; tichun, thu gen dingin ka kam ka hun ka’n, ka pau thei tai.

²³LALPA‘n ka kiang in:

²⁴Mihing, Israel gam nutsia ahi’nung ah chêng nalaite chun, “Abraham bep ahi lai in zia gam pumpi hi a la lua ta’n; tu’hin, ei haw tam tak I hi tâk ziak un, gam pumpi hi I lua ding ua piak hi ngei ding I hiu,” a tiu a.

²⁵Ziaziakchun, LALPA PATHIAN in zia gual hin a gen hi, la vati ding ahi: Nang un sa a thisan pum in la neu a; chun, la milim pathianteu chu la ho nalai un; chun, thisan la suau ah. Chuti gual ah um zing ah chun, bangti’n gam chu lua thei ding la hiu em?

²⁶La chemjam uh la kisuanpiu ah, luaksuak um takte la bawl un, mitin in la Invêngteu ji la hi’buak tau hi; bangti’n gam hi lua ding la hiu em?

²⁷A kiang un zia gual hin vagen in, LALPA PATHIAN in zia gual hin a gen hi, vati’n la: Kihaksial in ka kitiam hi, nutsia’na nung ah chêng nalaite chu chemjam in thi’n au; gamlak ah um zosia gamsa nêkzaw dingin pia’ng ka tin; kulpi det leh kawlhawm ah kisêlte chu hîpi’n thi’n au.

²⁸Gam chu thawmhau tak ah nutsia hi’ntin, a kisuanpiu a hatnau chu hi’bei ing ka; Israel gam ah tângte chu nutsia hi’ntin, kuama chia ta pua’n au.

²⁹Luaksuak um tak ah thil a la bawl tâk ziak un, gam chu thawmhau tak ah ka umsak phat leh, Keima hi LALPA ka hi’dan hun he ta’n au, ti in.

³⁰Chuleh, nang mihing, la mipite chun bângjul leh a In kotkhak bul tin ah nang chungchâng in zia gual hin a holim sek ui: “LALPA ah kipat thu hung pawt ngai dingin vachia hitiu,” a kitiu a.

³¹Mipite chu hung khawm in, la kiang in la mipite a hung chukhawm un, la thugente chu a ngai un, himaleh, a zawm diak puau hi. A kam un pâkcha maleu, a lungthim un vang amau lawkna ding bep a ngaituau hi.

³²Amau ngai in Jawl La sak thiam, aw hoi tak tawh thilgi hoi kithua tawhbang la hi; la gen chu he maleu zui pua’n au.

³³Zia gual chu a hung hi’phat leh, a hisa le a hita’n, ziaphat ah chun, a lak un jawlnei pakhat a um hi ti he ta’n au, ti in.