Read Vaiphei EZEKIEL 34 Bible Online

EZEKIEL 34 - Vaiphei bible

EZEKIEL 34

¹LALPA‘n ka kiang in:

²Mihing, Israelte chung ah belampute dem in thu gen inla, puitute kiang ah zia gual hin vagen in: LALPA PATHIAN in zia gual hin a gen hi: Katei, nanghaw Israel belampu, nangmau bep kivâk ziang tate haw! Belampute chun a belamteu a vâk ding uh hilo a hem?

³A nawiteu la neu ah, a multeu kituam lumna’n la mang un, a thau cha cha la kithau in; himaleh, belamte chu la vâk puau hi.

⁴A jawngkhalte som nuam lo in, a damlote la kaitua puau ah, a liamte la tuam puau ah, a vâkmangte la hawl khawm puau ah, a gam mangte hawl nuam lo in a chung un nunsia tak leh huham tak in vai la hawm sek ui.

⁵Tichun, belampu a umlo ziakin belamte a chekjak zo tau in; a chekjak tâk ziak un gamsate an a suak tau hi.

⁶Ka belamte a kithejak zo tau in, mual tin, tâng tin ah a vâk chek zo tau hi; ka belamte chu lei chung mun tin in a vâk chek zo tau in, kuama a hawl ding leh a kan zui ding a um puau hi.

⁷Ziaziakchun, nanghaw belampute haw, LALPA thu hi ngai un:

⁸LALPA PATHIAN in kihaksial in thu a gen ah: Belampu a umlo ziak in, ka belamte chu a hingsan ah nêk ding bep ahi tâk ziak un, gamsate an ding bep a hung hitau hi; chuleh, ka belampute’n ka belamte a ching puau ah, zia malak ah chun, ka belamte kinêk in, a vâk puau hi;

⁹ziaziakchun, belampute haw, LALPA thu hi ngai tiam un:

¹⁰LALPA PATHIAN in zia gual hin a gen hi: Belampute chu ka do hi; a khut un ka belamte man chu hun sîk ing ka tin, ka belamte vâk ah a pannau haisak ing ka; ka belamte kivâkna’n mang ta pua’n au. A nêk kit tâk lona ding un, a kam ua kipat in ka belamte ladok ing ka, ti in.

¹¹LALPA PATHIAN in zia gual hin a gen ta’ngal ah: Keima’n ka belamte chu kihawl ing ka tin, hawldok ding ka hi.

¹²Belampu’n a belam vâkmang a hawldaw gual in, ka belamte hawldok ing ka. Sûm jinni leh thimpi jing lak ah vakjakte chu, a vakjaknau mun zosia ah kipat in pui khawm kit ding ka hi.

¹³Namtin lak ah kipat in puidok ing ka tin, gam tin ah kipat pui khawm in, amau gam ma ma ah pui tung ding ka hi; tichun, Israel tângte leh tui luanna mun leh, mihing chênna mun zosia’n amau vâk ta’ng ka.

¹⁴Gam phatna’n amau vâk ing ka tin, Israel mual sangte chu a tatna mun nuam uh hung hita’n a; zia mun ah chun hampa hing phatna mun ah kual ta’n tiu in, Israel mual sângte ah hampa hing phatnate chun kivâk ta’n au.

¹⁵Keima’n ka belamte kichin ing ka tin, kicholdamsak hiat hiat ta’ng ka, LALPA PATHIAN in a ti ta’ngal a.

¹⁶A mangthai hawl ing ka tin, a vâkjakte pui kit ing ka tin, a liamte chu tuam ing ka tin, a jawngkhalte chu hi’hât ing ka; himaleh, a thau leh a hât laite chu hi’mangthai ing ka. Dikna’n vâk ding ka hi, ti in.

¹⁷Chuleh, nanghaw ka gan honte â dingin, LALPA PATHIAN in zia gual hin a gen hi: belam hon lak ah vaihawm ing ka tin, kêlchal leh kêlpite lak inle vaihawm ding ka hi.

¹⁸Nanghaw â dingin hampa hing no dip dep nêk chu hun tawk ma ma hilo a hem, la nêkbang uh la chuan chil nalai un. Tui thiang la dawn zaw phat uh leh a dang cheng la chot buan khel khel ding uh a hem?

¹⁹La nêkbang uh la chotchil sau chu ka belamte’n a nêk ua, la dawnkhop nung ua la chot buan uh tui chu a dawn tei tei ding uh la tiu a hem?

²⁰Ziaziakchun, LALPA PATHIAN in a kiang un zia gual hin a gen hi: Keima ma’n belam thau leh a gawngte kikâl ah vaihawm ding ka hi.

²¹Gamtin ah a vâkjak masiau la liangko un la phuu ah, a damlote la tongbûk un la suk ziak un,

²²keima’n ka gan honte hukdok ing ka tin, nanghaw engbawl dingin umsak kit talo ding ka hi; tichun, belam zosia chung in vaihawm ding ka hi.

²³A lak un amau chingtup ding David tawhbang tungding ing ka tin, amau vâk in, a chingpa hita’n a.

²⁴Chun, Keima LALPA hi a Pathian uh hi’ng ka tin; chuleh, ka suak David chu a lak ua hotu hita’n ah; Keima LALPA hin zia gual chun ka gen ta’ngal a.

²⁵Chun, amau tawh kichamna thuthung siam ing ka tin, a gam ua kipat gamsa zosia delmang ing ka; tichun, gamtalai lak ah a nop dan dan un chêng in, thing lak gam inle bit tak in lum ta’n au.

²⁶Amau tawh ka tâng kîmvêl ah gamte chu maljawl ing ka tin; a hunbî tak in van gawtuite zuksak ing ka tin, maljawlna gua hita’n a.

²⁷Gamlak ah thingte’n a gau sua intiu in, lei inle a gau sua ta’n au. A gam un bit tak in um intiu in; tichun, a saltânnau ngawngkol ka khetbot piak ah, amau sal ah mante khut ah kipat ka hukdaw phat leh, Keima hi LALPA ka hi ti hun he ta’n au.

²⁸Nam tinte suam dingin um kit ta pua’n tiu in, gamlak ah sa te’nle ne kit ta pua’n au; bit tak in chêng muang ta’n tiu in, kuama’n hi’lau ta pua’n au.

²⁹Nêk leh châk kiningting tak in pia’ng ka tin, a gam uh kialna’n subuai ta pua’n tin, nam dangte musit in um kit ta pua’n au.

³⁰Keima, LALPA a Pathian uh hin umpi zing ka hi ti leh, Israelte Inkuan hi ka mite a hiu ti hun he ta’n au, LALPA PATHIAN in a ti ahi.

³¹Nanghaw ka belamte, ka gantatna mun ah belamte chu la hiu ah; Keima hi la Pathian uh ka hi, LALPA PATHIAN in a ti ahi, ti in.