Read Vaiphei EZEKIEL 36 Bible Online

EZEKIEL 36 - Vaiphei bible

EZEKIEL 36

¹Aw, nang mihing, Israel tâng sangte kiang in, zia gual hin vagen in: Aw Israel tâng sangte haw, LALPA thu hi ngai tiam un.

²LALPA PATHIAN in zia gual hin a gen hi: Mêlmate’n la kiang in, “Ehei! kumtuang tâng sangte chu kei â ahi tai,” a ti ziak un,

³a kiang un zia gual hin la vagen ding ahi: LALPA PATHIAN in zia gual hin a gen hi: kil tin ah kipat a hun enggawt ziak ua a hun chomgam tâk ziak un, nam tinte luaknâm ah um in, mitin lak ah holimna leh gensiat in la hung um tau a;

⁴ziaziakchun, Aw Israel tâng sangte haw, LALPA PATHIAN thugen hi a la ngai tiam un: LALPA PATHIAN in mual leh tângte, luite leh guamte chomnâm ah um leh nutsia ah um khawpite, a kîmvêl ah nam zosia suam gam leh nuisan ah hung umte kiang in:

⁵LALPA PATHIAN in zia gual hin a gen hi: A gam phatna la etlel ziak ua ka gam suam ah nei den, kipak ma ma leh Edomte zosia dem in ka thangthîpna meikuang hial in ka gen ahi.

⁶Ziaziakchun, Israel gam chung thu’n thu gen inla, mual leh tângte, lui leh guamte kiang in, LALPA PATHIAN in zia gual hin a gen hi ti’n: Nam zosiate hosiatna la puak tâk ziakin, ka thangtawmna hachangthak in thu ka gen ahi:

⁷La kîmvêl ah hunhosia nam zosia chun hosiatna hun tuak in au.

⁸Himaleh, nanghaw Israel mualte haw, ka mipi Israelte â dingin la bâk jamteu in ga hun sua ding la hiu; In lam ah hung kit pai ding la hi’ngal un.

⁹Ngai un, nang uh lam ah pang ka hi; nang uh lam ah hung kihei ing ka tin, gîtnêl ah um in, thâichîn hita’n lau;

¹⁰la sung ah mi hi’pung ing ka tin, Israel Inkuante a leng un chêng in au; khawpite lua kit hita’n tin, a chimsa zosia tundin kit hita’n a;

¹¹la sung ah mihing hileh, gancha hileh hi’pung ta’ng ka. Pung intiu in, ga sua in au; ma lai gual khan la sung ah hun chênsak kit ing ka tin, malai sâng in la chung ah thilpha bawl zaw ta’ng ka.

¹²La chung ah mipi hun puikhawm ing ka tin, ka mipi Israelte chu, amau in hun lua ta’n tiu in, a gochan uh hita’n la. A chateu sûnsak kît ta pua’n la.

¹³LALPA PATHIAN in zia gual hin a gen ah: Amau in nang uh, “Mite la ne zo un, la sung ah chêngte cha sûnsak la hi,” hun ti maleu,

¹⁴mite ne zo ta pua’n la tin, la sung ah chêngte le a chateu sûnsak kit ta pua’n la, LALPA PATHIAN in a tii;

¹⁵chuleh, nam dangte hosiatna git leh mite musit ah hun umsak kit talo ding ka hi; chuleh, la mipite kipal pâisak kit talo ding la hi, LALPA PATHIAN in a tii.

¹⁶LALPA‘n ka kiang in thu a hun gen a:

¹⁷Mihing, Israelte’n a gam uh a lua lai ua khan, a umchan leh thilbawl un gam hi a la subuak tau ah; a umchan uh chu ka mit mu in, numei a thianlo lai tak gual chu ahi.

¹⁸Tichun, gam chung ah thisan a sua’nau leh, a milimteu ziak ah a kisubuak ziak un, ka lungnatna a chung un ka butthâk ahi.

¹⁹Namtin lak in ka the’chek ah, gamtin ah the’jak in a la um tau in; a umchan leh thilbawl tawh kigûn un a chung un vai ka hawm ahi.

²⁰Ahi’n, namtin lak a hung tun phat un, a chiana lam zosiau in, ka min thiangtho a subuak un; a chianau gam ah mite chun, “Ziate hi LALPA mipite himaleu, a gam ah kipat pawtdokte a hiu,” a tiu a.

²¹Himaleh, Israel Inkuante’n, namtin lak ah a chianau taphot ah a hi’buak un, ka min thiangtho hi ka ngaisak ma ma hi.

²²Ziaziakchun, Israel Inkuante kiang in, LALPA PATHIAN in zia gual hin a gen hi, ti’n la: Aw Israel Inkuante haw, ka thil hun bawl guat hi nanghaw ziak hilo in, la chianau taphot ah namtin lak ah la subuak uh, ka min thiangtho ziakin ahi zaw’n.

²³Ka min lopi namtin lak ah la la sukbuak uh, a lak ua la sukbuak uh chu hi’thiangtho ing ka; a mit muu ah nangmau ziak ah ka thiantho’na hi’lat ahi’phat leh, namtin in Keima hi LALPA ka hi ti hun he ta’n au, LALPA PATHIAN in a tii.

²⁴Namtin lak ah kipat leh gamtin ah kipat hun pui khawm in, nangmau gam ma ma ah hun pui lût ta’ng ka.

²⁵Tui thiangtho hun the’khum ing ka tin, la buakna zosia leh milimte ziak ah la buakna zosia lak ah kipat in hun hi’thiang ta’ng ka.

²⁶Lungthim thak hun pia’ng ka tin, la sung ah thagau thak hun koi ta’ng ka; nangma taksa ah kipat suang gual ah tâk lungchang chu ladok ing ka tin, phe gual ah nêm lungchang khat hun pia ta’ng ka.

²⁷La sung ah ka thagau koi ing ka; tichun, ka dante hun zuisak ta’ng ka tin, ka dan thuguatte chingthei tak in zui ta’n la.

²⁸Ziaphat chuleh, la pu leh pateu kiang ah ka la piakna gam ah hin chêngden ta’n lau; tichun, ka mite hi’n la tiu in, keile la Pathian uh hita’ng ka.

²⁹La buaknau zosia kipat hun hukdok ing ka tin, bu leh bâlte thu pia’ng ka tin, hung pung intiu in, kial thuak ta pua’n lau.

³⁰Namdang zosia lak ah kialna ziak ah musit la hi tâklona ding un, thingga punsak ing ka tin, lou ah thâi piangte le punsak ing ka.

³¹Ziaphat chuleh, la umchan dikloteu leh phalo tak ah la la bawldan zosiau kha hezing in lau; la thil bawlkhial zosiau leh ki’dak um tak ah la la umnau zosia ziakin, nang uh kichimchâk hial ta’n lau.

³²Zia hi nanghaw ziak ah ka hun bawl ding ahi puai ti, la leng un he tau in, LALPA PATHIAN in a ti ahi. Aw Israel Inkuante haw, la umchanteu kha zakcha’n, lungngai tau in.

³³LALPA PATHIAN in zia gual hin a gen ah: La nunsiatnau zosia ah kipat ka hun hi’thian phat leh, khawpite chu lua kit hita’n tin, munsiatna zosia le pua phat kit hita’n a.

³⁴A chia tua zosia’n gam nutsia ah um, a ti sek uh chu lou ah bawl kit hita’n a.

³⁵Chuleh, “Zia gam nutsia ah um kha Eden huan gual ahi kit in; khawpi hisiat leh nutsiasate le chênkitna leh kulpi ah ûm bit ahi kit tai,” ti ta’n au.

³⁶Ziaphat chuleh, la kîmvêl ua namdang um zosia’n, Keima LALPA hin mun sesa bawlpha kit in, nutsia ah um zosia lua kitsak ka hi, ti hun he ta’n au; Keima LALPA hin ka la ti ta’n, zia chu hun bawl ding ka hi, ti in.

³⁷LALPA PATHIAN in zia gual hin a gen a: Gancha hon gual ah tam, mihing hi’pung dingin, Israel Inkuante kichial khawmsak ta’ng ka.

³⁸Kithoina ding ah gancha kikai khawm, Jerusalem ah kût ni kikai khawm ah dim gual in, khawpi sesa zosia chu mipi’n lua dim kit hita’n a. Ziaphat chuleh, Keima hi LALPA ka hi ti hun he ta’n au, ti in.