Read Vaiphei EZEKIEL 37 Bible Online

EZEKIEL 37 - Vaiphei bible

EZEKIEL 37

¹LALPA khut ka chung in a hung chu’n, tichun, LALPA thagau in ei domdok ah, phâicham lailung in ei koi ta’n; zia mun chu gukeu ngen in a dim hi.

²Ei pui vêl ah, phâicham ah gukeu chu tam ma ma leh, keu ma ma a hiu a.

³Ka kiang in, “Mihing, zia gukeute hi a hing kit thei ding awm?” ti’n ei dong ah. Ke’nle, “Aw LALPA PATHIAN, nang in la hia’i,” ti’n ka dawnhu a.

⁴Ziaphatchun, ka kiang in, “Zia gukeute kiang ah hin zia gual hin gen in: Aw gukeu gawpte haw, LALPA thu hi ngai tiam un.

⁵LALPA PATHIAN in zia gukeute kiang hin zia gual hin a gen hi: La sung un hatna hu koi ing ka tin, hing kit ding la hiu.

⁶La sung un thagui hun umsak ing ka tin, la chung un phe hun siam in, vun in hun tuam ing ka tin; chuleh, hung ha’thei in, hung hing kit ta’n lau; tichun, LALPA ka hi ti hun hia’n lau,” ei hun tia.

⁷Tichun, thupiak ah ka um gual chun thu ka gen ta’n; chutia, thu ka gen phat ah chun, phutloin thilgit a hung um ah, gi lak lak in gute chu a hung kisutuau ah, amau gu chiat a hung kizomtua tau a.

⁸Ka et leh, thagui a hung kisiam ah, phe a hun nei un; tichun, a vun in a hun tuam chiat tai; himaleh, amau in hat a nei nai puau hi.

⁹Ziaphatchun, ka kiang in, “Mihing, hui kiang ah chun zia gual hin thu gen in: LALPA PATHIAN in zia gual hin a gen hi: Aw hui, kawl kil li kipat in hung unla; aw hui, zia gute hi a hung hin kit theina ding un zia mithiluangte hi hun mût in,” ti in.

¹⁰Ei thupiak dungzui chun ka gen ta’n; hu a hung lût ah, a hung hing kit un, a keng un a ding chiat tau a, sepai tam tak a ting tau hi.

¹¹Ziaphatchun, ka kiang in, “Zia gukeute hi Israel Inkuante chu a hiu. Amau in, ‘Ka guteu a keugawp ta’n, ka kinepnau le a bei tai; pai thâk thian ka hitau,’ a tiu in.

¹²Ziaziakchun, a kiang un zia gual hin vagen in: LALPA PATHIAN in zia gual hin a gen hi: Aw ka mipite haw, la thânteu hong ding ka hi’n, la thân ua kipat in hun puidok ding ka hi; tichun, Israel gam ah hun pui kit ding ka hi.

¹³Aw ka mipite haw, la thânteu ka hon ah, la thân ua kipat ka hun pui daw phat leh LALPA ka hi ti hun he ta’n lau.

¹⁴La sung un ka thagau koi ing ka tin, hing kit ta’n la tiu in; chuleh, nangmau gam ma ma ah chun hun koi kit ding ka hi; ziaphat chuleh, Keima LALPA hin ka gen dungzui in, hun bawl ding ka hi ti he ta’n lau,” LALPA chun a ti tai, ti in.

¹⁵LALPA‘n ka kiang in:

¹⁶Mihing, molkang pakhat la’n la, a chung in, “Judah leh a kizoppi Israelte â dingin,” ti’n zik inla; molkang dang khat le la’n la a chung in, “Ephraim mol leh a kizoppi Israel Inkuante â ding,” ti’n zik in;

¹⁷chuleh, la khut ah mol pakhat gual hiding in zomtua in.

¹⁸Chuleh, la mipite’n la kiang ah, “Ziate hi bang etsakna ahi ei hil lo ding la hem?” ti a hun dot phat ua leh,

¹⁹a kiang un, LALPA PATHIAN in zia gual hin a gen hi ti’n la: Joseph mol (Ephraim khut ah um) leh Israel namte â chu la ding ka hi; Judah mol chu a chung ah koi ing ka tin, ka khut ah pakhat hiding in zomtua ding ka hi.

²⁰Mol la zikte chu la khut ah a mu phât ua leh,

²¹a kiang un, LALPA PATHIAN in zia gual hin a gen hi: A la chiamangnau namtin lak ah kipat in, Israel mipite chu puidok ing ka tin, mun tin ah kipat pui khawm ing ka tin, a gam un pui tung ing ka.

²²A gam uh, Israel tângte ah chun, nam khat in siam ding ka hi; a leng ua chung in lal pakhat bep in vaihawm ta’n a. Nam chuam pani’n kikhen kit ta pua’n tiu in, lenggam pani inle kikhen kit ta pua’n au.

²³A milimteu leh a thil ki’dak bawlteu; chuleh, thil phalo him him in, amau leh amau kisubuak kit ta pua’n au. A nungtolnau zosia ah kipat hukdok ing ka tin, hi’thiangtho ta’ng ka. Ziaphat chuleh, ka mite hita’n tiu in, Keima le a PATHIAN uh hita’ng ka.

²⁴Ka suak David a chung un lal hita’n ah; tichun, belampu pakhat bep kikop ta’n au. Chuleh, ka dan bawlte zui ta’n tiu in; chuleh, ka thuguatte chingthei tak in mang ta’n au.

²⁵La pu leh pateu a la chênnau, ka suak Jakob kiang ah ka piakna gam ah chun chêng intiu in; a kum a khua’n amau leh a tu leh a chateu tiang in chêngden ta’n au; chuleh, ka suak David chu kumtuang in a lal uh hita’n a.

²⁶Amau tawh kichamna thuthung siam ing ka tin, zia chu a kiang ua ka kumtuang thuthung hita’n a; maljawl in, hi’pung ing ka tin, a lak un kumtuang ah umden dingin ka mun thiangtho chu koi ta’ng ka.

²⁷A lak un chêngden ing ka tin; chuleh, a Pathian uh hita’ng ka tin, amau chu ka mite hita’n au.

²⁸A lak ua ka mun thiangtho a umden phat leh, Israelte suthiangpa chu Keima, LALPA hi ka hi ti he ta’n au.