Read Vaiphei EZEKIEL 39 Bible Online

EZEKIEL 39 - Vaiphei bible

EZEKIEL 39

¹Chuleh, nang mihing, Gog kãl in thu gen inla, zia gual hin LALPA PATHIAN in a gen hi: Aw Gog, Meshek leh Tubal ah vaihawm lianpen, nang ka hun kãl hi!

²Hun le’hei ing ka tin, la malam in hun naw ding ka hi; mâl tawp ah kipat hun puidok ing ka tin, Israel tânggamte do dingin hun pui ing ka tin;

³la khut veilam ah kipat la thalpi jeptha’ng ka tin, la changlam khut ah la thalchangte kiakthâksak ing ka.

⁴Israel tânggamte ah nang leh la sepai honte tawh, la kiang ah la mipi zosia pum in thi ta’n lau; la taksau chu sasial ne vacha chitin tawh, gamsa zosia nêk dingin pia ta’ng ka.

⁵Gamtalailak in thi’n lau, ti’n Keima LALPA PATHIAN hin ka gen ta ngâl ah, ti in.

⁶Thialkâl ah bit tak ah chêngmuangte leh Magogte chung in meikuang sawl ing ka tin; ziaphat chuleh, LALPA ka hi ti he ta’n au.

⁷Chun, ka mipi Israelte lak in ka min thiangtho hiatsak tâng ka tin; tichun, ka min thiangtho sukbuak kit sak ta pua’ng ka; ziaphat chuleh, namtin in Keima hi LALPA, Israel Mithiangtho chu ka hi ti he ta’n au.

⁸Ngai in, a hung nai ta’n, hung tung ngâl ding ahi tai, LALPA PATHIAN in a tii. A hung tung ding ti ah ka gen gen kha zia hun hi ahi tai.

⁹Ziaphat chuleh, Israel gam ah khawpi chêngte chun a gâlvanteu: awmphaw leh phawte, thalpi leh thalchangte, molzum leh cheichate chu chom khawm intiu in, kum sagi mei in tik ta’n au;

¹⁰tichun, gamlak ah thing a puak uh ngai ta pua’n tin, gammâng thing a phûk uh le ngai diak pua’n a; gâlvante chu thing ah tik ta ding a hiziak un; amau sim ah hungte chu amau in sim zaw ta’n tiu in; chuleh, amau suam ah hung kuante chu amau in a la suam zaw ta’n au, LALPA PATHIAN in a tii.

¹¹Ziaphat chuleh, tuisuagiat sualam ah khualzinte Phâicham, Israel gam ah chun Gogte kivuina ding pia’ng ka; khualzin tuate chiana ding dâl ta’n au; Gog tawh a mipite zosia zia chun kivui ding ahi ngâl un; zia mun chu, Hamon-gog Phâizawl, ti hita’n a.

¹²Israel Inkuante chun, gam hi’thianthona dingin tha sagi sung mithiluang vui ta’n au.

¹³Gam sung ah mipi zosia’n mithi vui ta’n au; tichun, ka lopina ka etsak phat leh, amau inle ja’na chang ta’n au, LALPA PATHIAN in a ti ahi.

¹⁴Tha sagi zaw leh, a gam sung hi’thianthona ding ah gam pumpi ah mithiluang chomnâm dingin, mi guat ta’n au.

¹⁵Mithiluang hawlte’n mithi gu a mu phât uh leh, mithi vuite’n Hamon-gog Phâicham ah vui ding ah a hun luak khawm masiau um dingin, tepte’na tâk malam pek in au.

¹⁶(A kiang ah chun Hamonah khawpi chule a um ah.) Zia gual chun gam chu hi’thiang ta’n au.

¹⁷Nang, mihing in vang LALPA PATHIAN in zia gual hin a gen hi: Vacha chitin leh gamsa chitinte kiang in, “Hung khawm unla, nanghaw â ding ah luaithena ka bawl ûm dingin kil tin ah kipat hung un, Israel tânggam ah luaithe’na thupi tak ka bawl piak hi, zia tak ah chun a sa ne’n, a thisan hung dawn tau in.

¹⁸Mihâtte sa ne’n la tiu in, lei ah vaihawm miliante thisan dawn in lau; Bashan gam ah kivâkthau, belamchalte, belamte, kêlchate leh bawngchalte thisan ngei chu.

¹⁹Nang uh â ding ah luaithe’na thupi tak ka siam piak ah la vâ sêt un a thau ne in, la khop sêt un thisan dawn in lau.

²⁰Tichun, ka dawkan ah chun sakol leh a chungchuang mite, sepai hâtte leh mihangsan zosiate ah chun kivâkva ta’n lau, LALPA PATHIAN in a tii,” ti in.

²¹Chun, ka lopina namtin lak ah tâklang kit ta’ng ka; tichun, nam zosia’n a chung ua ka vaihawm dan leh, a chung ua ka khut ka thâk dan zosia chu mu ta’n au.

²²Zia kipat chun, Israel Inkuante zosia’n LALPA a Pathian uh ka hi’dan hun hechiat ta’n au.

²³Chuleh, namtin in Israelte’n diklo tak ah ei la bawl ziak un, a gitlonau ziak ah sal in a tâng tau in; tichun, ka kisêl mangsan ah, a mêlmateu khut ah pedok in, a gâlteu in a thâ gam uh ahi ti he ta’n au.

²⁴A buaknau leh a thil bawlkhialnau tawh kigûn in ka thuk ta’n, ka kisêl mangsan ta ahi.

²⁵Ziaziakchun, LALPA PATHIAN in zia gual hin a gen hi: Tu’hin, Jakob vangphatna pia kit ing ka tin, Israel Inkuan zosia chung in ja’ngai ta’ng ka; tichun, ka min thiangtho â dingin thangtawm ta’ng ka.

²⁶Nam zosia mit mu ah ka thianthona ka tâklatna, mitin leh a mêlmateu gam ah kipat ka puidaw ah, amau gam ah thamuang tak ah a chên phat uh leh,

²⁷ka chung ah a thilbawl uh zachât um takte leh, a mualpho’nau zosia chu hun hemil ta’n au.

²⁸Namtin lak ah thejak in, amau gam ngei ah ka pui khawm kit tâk ziakin, Keima LALPA hi a Pathian uh ka hi ti hun he ta’n au. Nam dang lak ah amau mi pakhat chale nusia lo ding ka hi;

²⁹chuleh, Israel Inkuante zosia chung ah ka Thagau ka butthâk phat leh, amau chu kisêl mangsan ta pua’ng ka, LALPA PATHIAN in a tii, ti in.