Read Vaiphei EZEKIEL 4 Bible Online

EZEKIEL 4 - Vaiphei bible

EZEKIEL 4

¹Aw mihing, nang in chêktang la’n la, la âng ah koi in. A chung ah Jerusalem khawpi lim jik inla;

²mêlmate’n a ûm chilnau lim jik inla, sepaite panchâkna kuak leh kulbâng leh sepaite giamun limte ûm kîmvêlsak in.

³Ziazaw chuleh, thîkpêk khat la’n la, nang tawh khawpi kikâl ah thîk bâng um gual in koi in; zia thîkpêk bâng lam chu nga’n la, khawpi chu lâk ah a hung um ding dan thaw in. Zia hi Israel Inkuante â ding ah tepte’na ahi.

⁴Chuleh, la veilam delphâ in lum inla, Israelte chung ah gawtna chu la chung in koi in; la lup hun ding ni jat chu a chung ua gawtna tung ding la puak ding ahi.

⁵A chung ua gawtna tung ding, ni khat tawh kum khat kituk ding ah hisap in, ni za thum leh sawmkua la lup ding ahi; tichun, Israel Inkuante gawtna ding chu la puak ding ahi.

⁶Zia chu la bawl zaw phat leh, a niveina dingin, la changlam delpha in lum kit in, Judah Inkuante gawtna ding chu la puak ding ahi; ni khat tawh kum khat kituk ding ah hisap in, ni sawmli la lup ding ahi.

⁷Jerusalem lam nga’n la, la khut thing in amau kilanpi in thu la gen ding ahi.

⁸Ngai in, gâl lâk ding dan la thaw zaw masia, la kilek tawl tawl theilona dingin khauhual ah hun kân ding ka hi.

⁹Nang in gehu tawh barli, be tawh bethiang, châng tawh bumante hun la’n la; bêl pakhat ah koikhawm inla, la nêk ding vaithum siam in. La veilam delpha ah la lup hun, ni za thum leh sawmkua sung la nêk ding ahi.

¹⁰Ni khat ah la nêk ding chu shekel sawmni ah gik in la siam ding ahi; a hunbî kitiam dungzui chiat ah la nêk ding ahi.

¹¹Tui le tê chît chiat ah la dawn ding ahi; ni khat ah te’na Hin khat mun guk ah khen a mun khat la dawn sek ding ahi; a hunbî kitiam dungzui chiat ah la dawn ding ahi.

¹²A mitmuu ah mihing êk gawp ah kikang barli bu vaithum la siam chu la nêk ding ahi.

¹³LALPA‘n a gen ah: “Israel mipite chun ka naw mangna gam ah nam tinte lak ah, zia gual ah chun a an uh ki’dak um tak chu ne ta’n au,” a ti’n.

¹⁴Ziaphatchun, keima’n, “Katei, LALPA PATHIAN! Ka taksa ka hi’buak ngai puai; ka neu ah kipat ah sapûl leh sapêlup a hem leh sa ui him him ka ne kha puai,” ka ti tai.

¹⁵Ziaphatchun, ka kiang in, “Ngai in, la vaithum siamna ding ah mihing êk keu thasâng in bawng êk hun pia’ng ka,” a ti tai.

¹⁶Ziaphatchun, ka kiang in, “Mihing, Jerusalem ah vaithum siamna mol chu hi’bong ding ka hi; te’ chît chiat leh lauthawng kawm kawm in an ne ta’n la tiu in; lungngai tak kawm in tui le te’ chit chiat in dawn ta’n au.

¹⁷Nêk leh dawn tâksap ziak ah lungdong ah ki-entua in, a gawtna thokgim ziak un chautha zo ta’n lau,” a ti tai.