Read Vaiphei EZEKIEL 40 Bible Online

EZEKIEL 40 - Vaiphei bible

EZEKIEL 40

¹Ka saltânnau kum sawmni leh nga’na, kumbul ah ni sawm tin ni, zia chu Jerusalem khawpi suksiat ah a um nung kum sawm leh li ni chun, LALPA thilhitheina ka chung in a hung chu’n; chuleh, zia lam ah chun ei pui a;

²kilâkna’n Pathian in Israel gam ah ei la pui tung ah, tângsâng tak in ei koi ah, simlam kâi in khawpi tawh bang khat a um a.

³Zia tak chu ei tut phatin, pawsal pakhat a la um ah, a mêl latdan chu sum-eng gual, a khut ah pat khauhual tawh, te’na mol luang tiang chawisa ahi’n; kotpi bulchin ah ding ahi.

⁴Mipa chun ka kiang in, “Mihing, pha tak in en in, gunchu tak in ngaitha’n la, ka hun etsak ding zosia hi la lungthim zosia la ngaitua ding ahi, ziate chu ka hun etsak theina ding ah zia lam ah hi ka hun pui tung la hi’ngal ah; la thil mu zosia chu Israel Inkuante kiang ah la gen daw ding ahi,” a ti’n.

⁵Chun, Tempul chu bâng in a ûm kîmvêl a. Mipa khut ah te’na luang tiang chu tong guk ah sau ahi’n; zia chun bâng sâdan chu a te’ ah, tong guk ah sâ leh tong guk ah sâng ahi.

⁶Chuleh, kotpi lam in a chia ah, sualam a nga’n, kalbi’n a kal to ah, kotpi hulliap chu a te’ ah, tong guk in a lian a;

⁷a sîk ah pindante chule tong guk ah sau leh tong guk ah lian ahi; a sîk ah pindante kikâl chu tong nga’n a lian ah; pindante khêl lam ah chun hulliap tong guk ah lian, Tempul sung lam zotna a um a.

⁸Chuleh, kotpi lûtna chule a te’ ah, tong giat in a lian a;

⁹kotbiang ah khuamte chu tong ni ahi; kotpi jawn ah hulliap chun Tempul lam a nga’.

¹⁰Sualam kotpi pang gêl ah chun pindan pathum a um un; pindante chu a kibang chiat a hiu a; chuleh, kotbiang ah khuamte chule a kibang chiat a hiu.

¹¹Chuleh, kotpi sân dan chu a te’ ah, tong sawm ahi’n; a let dan chu tong sawm leh thum ahi.

¹²Pindan neute ângzawn chiat in bâng a um ah, a sâ dan leh a sân dan chu tong khat chiat ahi; pindan neute chu a dung leh vai tong guk gêl ahi.

¹³Chuleh, pindan neute nung lam bâng ah kipat kotpi le’lam ah kotkhak tiang chu a te’ kit a, tong sawmni leh nga sau ahi.

¹⁴In sung letdan chule a te’ ah, tong sawmni ah lian ahi; Indan pawnung lam chun a huang a um hi.

¹⁵A bâng pawnung pen lutna kotbiang ah kipat pindan nunung pen tawpna tiang chu tong sawmnga ah kigamla ahi.

¹⁶A kotpi pang ah chun tukvan neucha cha a um ah, a pindan sungnung ah chunle tukvan a um chiat hi; kotbiang ah khuamte chu tûmbâk lim ah kijem a hiu.

¹⁷Ziaphatchun, a huang pawnung ah ei pui lût a; zia tak chun, pindan tawh, a dung tung ah dawdan le a um a; dawdan ângzawn ah chun pindan sawmthum a um hi.

¹⁸Chuleh, a dawdan chu kotpi tiang in a dung tung in a kikhang ah; zia chu a dawdan nuainung ahi.

¹⁹Ziaphatchun, a huang sungnung zotna kotpi nuainung pawlam ah kipat, a huang pawnung lam ah kotpi tiang chu a te’ kit ah, tong za khat a ting hi.

²⁰Chun, a huang pawnung zaw, mallam nga kotpi dung leh vai a te’ a.

²¹A sîk ah pindan neute, a langtuak ah pathum gêl tawh, a kotbiang ah khuamte chu a In sung ah umte tawh kibang chiat a hiu ah, a saudan chu tong sawmnga chiat leh, a vailam chu tong sawmni leh nga chiat a hiu.

²²Chun, a tukvante, a hulliapte, a cheina tûmthing limte chu, sualam ah kotpi chu tawh a let leh neu kibang chiat a hiu; a kalto’na kalbi sagi a um ah; chuleh, a hulliap chule a sunglam ah um ahi.

²³Sualam kotpi gual in mallam kotpi a um ah, zia jawn ah chun a huang sung lûtna a um hi; kotpi khat ah kipat a langkhat lam tiang chu a te’ ah, tong za khat ahi.

²⁴Chuleh, simlam kâi in ei pui ah, simlam ah chun kotpi a la um ah; a kotbiang ah khuamte leh a hulliap chu a te’ ah, a dangte tawh kibang chiat ahi.

²⁵A dangte gual tho khan zia hulliap ah chun a sung lam leh a paw lam tukvan a um gêl a; a dung lam tong sawmnga leh a vailam tong sawmni leh nga ahi.

²⁶A chiato’na ding kalbi sagi a um ah, a hulliap chu a sunglam in a um ah; a kotbiang ah khuam sîk langtuak ah a jemna tûm thing lim khat gêl a um hi.

²⁷A huang sungnung simlam kâi chun kotpi khat a um ah; simlam kâi ah kotpi langkhat ah kipat langkhat lam tiang chu a te’ ah, tong za khat ahi.

²⁸Chun, simlam kotpi kipat in a huang sungnung chu ei pui lût ah, simlam kotpi chu a te’ ah, a dangte tawh a kibang hi.

²⁹A sîk ah pindan neute, a kotbiang ah khuamte leh a hulliapte chu a dangte â tawh kibang tho ahi; a sunglam leh a hulliapte ah chun a kîmvêl in tukvante a um ah; a dung tong sawmnga leh a vai tong sawmni leh nga ahi.

³⁰A kîmvêl in hulliap a um ah, a dung tong sawmni leh nga leh a vai tong nga ahi.

³¹A hulliap chun a pawlam huang ûmna lam a nga, a kotbiang khuamte jemna tûm thing lim a um ah, a kalto’na chun kalbi pagiat a um hi.

³²Chuleh, a sualam pang ah kotpi huang sungnung ah chun ei pui lût ah, a kotpi chu a te’ ah; a dangte tawh kibang tho ahi.

³³A sîk ah pindan neute, a kotbiang ah khuamte leh a hulliapte chu a dangte tawh kibang tho ahi; a hulliap sunglam leh pawlam in a kîmvêl ah tukvan a um in; a dung tong sawmnga leh a vai tong sawmni leh nga ahi.

³⁴A hulliap in a huang pawlam ûmna lam a nga, a kotbiang khuamte jemna tûm thing lim a sîktuak ah pakhat gêl a um ah, a kal tona chun kalbi pagiat a um hi.

³⁵Ziazaw chun, mallam kotpi’n ei pui ah, a te’ ah; a dangte tawh kibang tho ahi.

³⁶A sîk ah pindan neute, a kotbiang ah khuamte leh a hulliapte chu a dangte tawh kibang tho a hiu in; a kîmvêl in tukvan a um hi. A dung tong sawmnga leh a vai tong sawmni leh nga ahi.

³⁷A hulliap in a pawlam huang ûmna lam a nga’n, a kotbiang ah khuamte jemna tûm thing lim a sîk tuak ah pakhat gêl a um ah; chuleh, a kaltona chun kalbi pagiat a um hi.

³⁸Hâlmang thillat ding a sawpnau mun, a hulliap lutna kotpi bul ah chun pindan neu ah lutna kotkhak a um a.

³⁹A hulliap lutna kotpibul pang tuak in, dawkan khat gêl a um ah; zia dawkan chung ah chun hâlmang thillat ding, gitlo thoina ding leh thil bawlkhial thoina ding ganchate chu a that sek un.

⁴⁰Chuleh, mallam kotpi lutna, hulliap pawlam ah chun dawkan pani a um ah; hulliap langkhat ah chun dawkan pani ma a um hi.

⁴¹Kithoina gancha tha’na ding dawkan pagiat a um hi: A kotpi sung lam ah pali, a pawlam ah pali.

⁴²Hâlmang thillat hâlna ding suang kisêk ah kisiam dawkan pali a um ah; hâlmang thillat leh kithoina ding gancha a tha’na ding uh; chuleh, a matchâkte koina dingin, tong khat leh a kim ah sau, tong khat leh a kim ah lian leh tong khat ah sâng ah kibawl dawkan a um hi.

⁴³Dawkan kîmvêl ah chun tûk khat ah sau thîk kuaikâ a kitiang ah. Zia dawkan ah chun kithoina sa chu koi sek ding ahi.

⁴⁴Kotpi sungnung zawk pawlam ah a huang sungnung zawk ah chun, La sate â dingin pindan pani a um ah; mallam kotpi pang ah zia pindan um chun simlam a nga’n; sualam kotpi pang ah pindan um zaw chun mallam a ngat hi.

⁴⁵Ka kiang in, “Simlam nga’ pindan hi Tempul sung ah mawpua thiampute pindan ding ahi’n,

⁴⁶mallam nga pindante hi mâichâm ah mawpua, thiampute pindan ding ahi; Levi phung ah mite lak ah Zadok suante bep chun LALPA nasêm dingin a hun nai diu ahi,” ti’n a gen a.

⁴⁷Tichun, a huang sung chu a te’ ah, a dung tong za khat, a vai tong za khat, a sîk pali nei ah siam ahi; mâichâm chu Tempul ângjawn ah um ahi.

⁴⁸Chun, Tempul hulliap ah ei pui ah, hulliap kotbiang khuamte chu a te’ ah, a sîk zosia tong nga ngen ahi; chuleh, a kotpi letdan chu tong sawm leh li ahi; a bâng sîk lam chu tong thum gêl ahi.

⁴⁹Hulliap dung chu tong sawmni ah sau leh a vai tong sawm leh ni ah lian ahi; a kaltona ding kalbi sawm a um ah; chuleh, a kotbiang ah khuamte tilo in, khuam, sûtpi pani le a langtuak in a um hi.