Read Vaiphei EZEKIEL 41 Bible Online

EZEKIEL 41 - Vaiphei bible

EZEKIEL 41

¹Chuleh, pindan lailung lam in ei pui lût ah; a sîk tuak ah kot khuamte chu a te’ ah, a sîk zosia chu tong guk chiat ahi.

²A kot letdan chu tong sawm ahi; a bâng sîktuak chu tong nga gêl ahi. Chuleh, a lailung dunglam chu a te’ kit ah, tong sawmli ah sau, a vailam tong sawmni ahi.

³Chuleh, pindan sunggil lam in a lût ah, a lutna kotbiang ah khuamte chu a te’ ah, tong ni ahi; a lûtna kotkhak chu tong guk ah lian ahi; a bâng sîk tuak chu tong sagi in a sâ hi.

⁴Pindan dunglam chu a te’ ah, tong sawmni ah sau leh tong sawmni ah lian ahi. Chuleh, ka kiang in, “Zia tak hi mun thiangtho pen chu ahi,” a ti’n.

⁵Ziazaw chun, Tempul bâng chu a te’ ah, tong guk in a sâ hi; a kiangah pindante chu a vailam tong li chiat ahi.

⁶A pang ah pindante chu sawng thum chiat ahi’n, sawng khat ah chun pindan sawmthum chiat a um hi. Bâng chu a kildenna umlo ah a det theina dingin, a thikkil chu pindante kîmvêl ah bâng sung ah thunlut ahi.

⁷A pang ah pindante chu a sawng a sân dungzui in a lian deu deu un, a Tempul kîmvêl ah a bâng kildênna a let deu deu dungzui ah sak lian a hiu. Chuleh, pindan nuainung pen ah pat a chungnung pen kaltona ding in, a laita chu kihawtheng a hi.

⁸Chuleh, Tempul kîmvêl in dawdan a um ah; a pang ah pindante suangphûm chu tong guk ah sau ahi.

⁹A pang ah pindante bâng chu tong nga sâ ahi; a pang kîmvêl ah pindan kikâl ah mun awng umna,

¹⁰tempul kîmvêl ah chun a huang sung in pindante chu tong sawmni chiat ah lian ahi.

¹¹Chuleh, a pang ah pindanneute kotkhak chu mun awng lamkâi ah kihong ahi’n; khat in mallam a nga’n, khat in simlam a ngai. A mun awng letdan chu tong nga ahi.

¹²Tempul In tomlam ah chun Tempul lam nga’n In chuam pakhat a um ah; zia In chuam chu a dung tong sawmkua, a vai tong sawmsagi leh a kîmvêl ah bâng tong nga ah sâ ahi.

¹³Ziazaw chun, Tempul chu a te’ ah, tong za khat ah sau ahi; a In bâng ah kipat Intom mun awng chu tong za khat ah sau ahi;

¹⁴Tempul In mai lam, sualam ah mun awng chule tong za khat in a sau hi.

¹⁵Chuleh, a In tomlam ah In chuam khat chu a sîk zosia tawh a te’ leh, tong za khat in a sau ah. Tempul lailung leh pindan sungnung ah kipat a hulliap tiang,

¹⁶a bâng in a ûm kîmvêl pathumte chun tukvan a nei chiat un, ziate chu a khûna um chiat a hiu a;

¹⁷a kotkhak chung ah mun awng leh a pindan sunggil leh a pawlam natiang in a khû pha’n. Chuleh, a pindan sungnung leh a lailung kîmvêl ah bâng zosia jemna,

¹⁸cherubte lim leh tûm thing limte kikâlhel ah bawl ahi. Cherubte zosia chun maichang pani a nei chiat un;

¹⁹mihing maichang gual pu chun tûm thing langkhat lam a nga’n, sakeibaknei maichang gual pu zaw chunle tûm thing langkhat lam a nga kit ah; tempul bâng zosia chu zia gual ngen ah chun jem ahi.

²⁰A tuang ah kipat kotkhak chung lam tiang ah a bâng zosia chu, cherub leh tûm thing lim jem ah kibawl ahi.

²¹A lailung ah khuamte chu ning li nei chiat a hiu ah; mun thiangtho pen mai jawn ah chun,

²²thing ah kisiam mâichâm, tong thum ah sâng, tong ni ah sau, tong ni ah lian pakhat a um ah; a ningte, a taw leh a bâng zosia chu thing ngen ahi. Ka kiang in, “Zia hi LALPA âng ah dawkan kiti chu ahi,” ti’n ei hil a.

²³Mun thiangtho tawh Mun thiangtho pen kikâl inle kotkhak a thua in a um hi.

²⁴Kotkhakte chu thua ni gêl a hiu.

²⁵Mun thiangtho kotkhakte chu, cherubte leh tûm thing limte kijem ah bawl ahi. Chuleh, a hulliap paw lam, In mai lam ah chun kotkhak chung lia dingin thingpêk a kikil den hi.

²⁶Hulliap bângjul ah chun tukvan leh tûm thing limte a sîktuak gêl in a um hi.