Read Vaiphei EZEKIEL 42 Bible Online

EZEKIEL 42 - Vaiphei bible

EZEKIEL 42

¹Chuleh, mallam kâi ah a huang pawlam ah ei puidaw zaw phatin, a tualzawl mallam ah kipat Tempul hun ângngat, tualzawl ah pindante sung ah chun ei pui lût a.

²Mallam kâi ah In dung chu tong za khat ah sau leh tong sawmnga lian ahi.

³Huang sungnung ah kipat tong sawmni nung ah chun huang pawnung lam nga’n dawsawn sawng thum ah kibawl a um kit a.

⁴Zia In mallam kâi ah kotkhak zawn ah chun, pindanneu lûtna lampi tong sawm ah lian leh tong za khat ah sau a um a.

⁵Pindan chungnung lamte chu a nuainung lam te leh a laitate sâng in a chîp zaw’n.

⁶Sawng thum ah sak ahiziak in, a huang pawnung gual in khuampi a nei puau ah; tichun, a sawng chung lam ah pindante chu a sawng laita leh a niam pen sâng ah pawngdok zaw ah kisa ahi.

⁷Pindante tawh kizawn chiat in, a huang pawnung lamkâi ah chun bâng a um ah, zia chu tong sawmnga sau ahi.

⁸Huang pawnung zawk ah pindante chu tong sawmnga a hiu ah; a mai jawn ah Tempul ah pindante chu vang tong za khat ah sau a hiu.

⁹A huang pawnung ah kipat lutna dingin, zia pindante nuai zawn ah sualam kâi ah chun lampi a um ah,

¹⁰zia chu a pawlam tiang tung ahi. Simlam kâi ah, In nung ah Tempul âng jawn ah chun, pindanneute a um chil chel a;

¹¹a kot zawn chiat un lampi a um hi; mallam kâi ah pindante tawh a dung, a vai, a pawtna, a kotkhak leh kilemdan kibang chiat ah siam a hiu.

¹²Simlam kâi ah pindante nuai ah chun, sualam lutna kotkhak a um ah, zia chu I lut leh, a bânglai khat a la um hi.

¹³Chuleh, ka kiang in, “Mallam leh simlam ah pindan, In mai tual lam ngate chu pindan thiangtho, LALPA kiang hun nai thiampute’n thillat thiangtho pente a nêkna ding uh chu ahi; zia tak ah chun, thillat thiangtho pente: thâi thillat leh gitlo thoina thillatte chu a koi ding uh ahi, zia chu mun thiangtho ahi ngal a.

¹⁴Zia mun thiangtho ah nasem thiampute chu, a huang pawlam ah a pawtnop phat uh leh, a nasepnau sil leh chênte chu zia mun ah chun koitha’n tiu in, ziate chu a zek thiangtho ahi ngal ah; mipite umna lam ah a pawt daw mau in sil leh chên dang in a kithuam diu ahi,” a ti’n.

¹⁵Tempul sung lam chu a te’ suak zaw phatin, sualam nga kotkhak ah chun ei puidok ta’n; chuleh, Tempul kîmvêl chu a te’ a.

¹⁶A te’na mol chun sualam sîk chu a te’ ah, te’na mol dungzui in tong za nga a ting hi.

¹⁷Chuleh, a kihei ah, mallam sîk a te’ kit ah, a te’na mol dungzui ah tong za nga ahi.

¹⁸Chuleh, simlam in a kihei ah, a te’ kit leh, a te’na mol dungzui in tong za nga ahi.

¹⁹Chun, tumlam in a kihei ah, a te’ ah, a te’na mol dungzui in tong za nga ahi.

²⁰A sîk li’n a te’ zo ta’n. A kîmvêl bâng in a ûm ah, a dung tong za nga leh a vai tong za nga a ting ah; zia chu mun thiangtho leh mipi vantang kidaidanna’n a pang hi.