Read Vaiphei EZEKIEL 43 Bible Online

EZEKIEL 43 - Vaiphei bible

EZEKIEL 43

¹Zia nung ah chun, sualam nga kotkhak ah chun ei puidok a.

²Zia tak ah chun, Israelte Pathian lopina vâk, sualam ah kipat hung chu ka mu’n; tuisuagiat kinawk gi gual in a gi’n; tichun, a lopina chun lei tual a salvâk tai.

³Ka thil mu chu, Jerusalem khawpi susia ding ah hung, Khebar lui pang ah ka la mu gual gual kha ahi’n; tichun, ka mai ah lei tual si’n ka bokkhup tai.

⁴Sualam nga kotkhak ah kipat LALPA lopina a hung lût phat ah chun,

⁵Thagau in ei dom ah, huang sungnung ah chun ei koi ah; chuleh, ngaitia, LALPA lopina chun Tempul a lua dim tai!

⁶Ka kiang ah mipa a din zing lai in, Tempul sunglam ah kipat ei hun ho gi khat ka he ta’n;

⁷ka kiang in, “Mihing, zia tak hi ka lalchutpha umna mun, ka kengpêk ngakna leh, ka mipi Israelte kiang ah kumtuang ah ka umdenna ding mun chu ahi. Israel Inkuante’n ka min thiangtho hi’buak kit ta pua’n au; amau leh a lengteu inle ângkawmna ziak leh a lengteu thiluang inle hi’buak kit ta pua’n tiu in,

⁸ka In mai zawn ah In mai bawl in, ka kotbiang khuam zawn ah kotbiang khuam bawl in, amau tawh ka kikâl ua bâng bep ah kidaidan ah bawl ahi. A ki’dak umnau ziak ah ka min thiangtho a la hi’buak ziak un, ka lungnatna puangjak in ka la tha’gam ahi ta’ngal ua.

⁹Tu’hin, a milim honau leh a leng leh lalteu mithiluangte chu gamla tak in koimang uh hen; tichun, kumtuang in a kiang un chêngden ta’ng ka,” a tia.

¹⁰Chuleh, nang mihing, Israel Inkuante kiang in Tempul chung châng chu hil inla, a um ding dan zosiau chu tê det det tau hen; chuleh, a thil bawlkhialnateu ziakin zakcha tak in um tau hen.

¹¹Thil a la bawl khial ziak ua a zachat thei uh chun, tempul kiguanggal dan chu a lim bawl piak inla, a kileptua ding dan, a pawtna ding leh a lûtna ding kotkhakte leh, a mêl put ding dante leh a sung ah thilbawl ding dan zosia leh, a dan a mual zosia le hil in; a muthei ding un zikdaw piak inla, a dan leh mual dungzui ah bangkim a bawl ua, a zuitheina ding un.

¹²Zia hi Tempul dan chu ahi: Tângvum kîmvêl zosia chu mun thiangtho pen hi’n a. Ngai in, zia hi Tempul dan chu ahi, ti’n a gen a.

¹³Chun, ziate hi mâichâm letdan leh tong ah te’dan chu ahi (tong khat chu tong khat leh tûk khat ah sau ahi;) a kingakna chu tong khat ah sâng, tong khat ah lian, a geikawl khâp khat in ûm kîmvêl in a. Mâichâm sau dan chu zia gual chu a hi’n:

¹⁴Lei tual ah a kingakna kipat, a gei nuainung zaw tiang chu tong ni hi’ntin, tong khat ah lian hi’n a; chuleh, a kitunna neuzaw ah kipat a lianzaw tiang chu, tong li’ sau leh tong khat ah lian hi’ntin;

¹⁵mâichâm ah thukkhûk chu tong li’ lian hi’n a; mâichâm ah thukkhûk ning li’ kipat in a mâichâm ningzum, tong khat ah sau pakhat chiat a um ding ahi.

¹⁶Mâichâm ah thukkhûk chu ning li nei hi’n a; tong sawm leh ni ah sau leh tong sawm leh ni ah lian hi’n tin.

¹⁷A kingakna chule ning li nei hi’ntin, a dung leh vai tong sawm leh li gêl hi hen la, a geikawl tong kimkhat ah lian in ûmvêl intin, a kingakna chu tong khat in ûm kîmvêl in ah. Mâichâm leilawn kalbite chun sualam a nga ding ahi, ti’n a gen a.

¹⁸Ziaphatchun, ka kiang in, “Mihing, LALPA PATHIAN in zia gual hin a gen hi: Ziate hi mâichâm â ding ah dan kisiamte chu ahi: A chung ah hâlmang thillatte latna ding leh, thisan the’khumna ding ah tundin ahi ni’ chun,

¹⁹levi te dan ah thiampu nasêm, Zadok Inkuante, ka nasêm ding ah ei hun nai sekte gitlo kithoina dingin, bawngchal la piaksak ding ahi, LALPA PATHIAN in a tii,” ti’n a gen a.

²⁰Chuleh, thisan bang jat a hem chu la’n la, mâichâm ningbawk palite ah chun tât inla, a kil palite leh a geikawl ah le la tât ding ahi; tichun, mâichâm thiansuana leh a tatna dingin la bawl ding ahi.

²¹Gitlo thoina bawngchal kithat chu la’n la, Tempul ah, mun thiangtho pawlam, a kihâlna ding mun kiguatna chun la hâltum ding ahi.

²²A ni ni’na chun, gitlo thoina dingin, demna bei kêlchal khat, la lat ding ahi; bawngchal ah thiansuana la bawl gual tho khan la bawl ding ahi.

²³A thiansuana la bawlzaw phat leh, a chung in demna bei bawngchal khat leh belamchal khat la lat ding ahi.

²⁴LALPA âng ah lân in la tin, thiampute’n a chung ah chi the’khum in, LALPA kiang ah hâlmang thillat dingin la hâltum ding ahi.

²⁵Ni sagi sung, nisi’n ah kêlcha pakhat jel, gitlo thillat dingin la lat ding ahi; chuleh, bawngchal khat leh belamchal khat, demna bei gêl le la lat khawm diu ahi.

²⁶Mâichâm sukthianna ding leh, thiansuana dingin ni sagi sung la bawl ding uh ahi’n; tichun, hi’thian hita’n a.

²⁷A thiansuana ding hun chu a bei ah, a ni giat ni kipat chun thiampu’n la hâlmang thillatteu leh kichamna thillatte chu mâichâm chung ah lân in tin; tichun, hun pom piak ta’ng ka, LALPA PATHIAN in a tii, ti’n a gen a.