Read Vaiphei EZEKIEL 44 Bible Online

EZEKIEL 44 - Vaiphei bible

EZEKIEL 44

¹Chuleh, mun thiangtho lutna pawlam kotkhak in ei pui ah, zia chu sualam nga ahi; ahi’n, a kikhâk ahi.

²Ka kiang in, “Zia kot hi khâk zing hi’n a; hon ni um pua’n tin, kuama lût ngai pua’n a; LALPA, Israel Pathian chu zia chun a lut ta’ngal a; ziaziakchun, khâkden hiding ahi tai.

³Vaihawm lengpa bep LALPA âng ah vaithum ne dingin a kiang ah kichu thei in a; a hulliap kotkhak ah lût intin, zia chun a pawt kit ding ahi,” a hun ti’n.

⁴Chun, mallam kotkhak haw in, Tempul mai lam in ei puidok ah; chuleh, ka vak et leh, LALPA lopina’n LALPA Tempul chu a dim ta’n; tichun, ka mai ah lei tual si’n ka bokkhup tai.

⁵Ziaphatchun, LALPA‘n ka kiang in, “Mihing, LALPA Tempul dan leh thuguat la kiang ah ka hun hil dingte hi tepte pha’n la, pha tak ah en in, ngai pha’n; Tempul ah bang gual mite lût thei ding, ti leh, mun thiangtho ah lût theilo dingte chu tepte pha’n.

⁶Mi thukhelte Inkuan, Israel Inkuante kiang in zia gual hin gen in: LALPA PATHIAN in zia gual hin a gen hi, ti’n la: Aw Israel Inkuante haw, la thilbawl ki’dak um takteu hi haisan tau in,

⁷gamdang mite la hun pui lût un, lungthim leh taksa ah le zektanlote, ka nêk ding sathau leh thisan lei piak phat uh leh, ka mun thiangtho ah lût in, la subuak zo tau a. La thilbawl uh ki’dak um takte bep le hilo in, ka thuthung la botsia nalai un.

⁸Ka thilzek thiangthote nang un la enkol nuam puau a; ka mun thiangtho chu midangte la etkolsak zaw tau hi,” a tia.

⁹Ziaziakchun, LALPA PATHIAN in zia gual hin a gen hi: Israel chate lak ah um gamdang mi kuale, lunggil leh taksa zektanlo, gamdang mi taphot chu, ka mun thiangtho sung in a lût lo diu ahi.

¹⁰Himaleh, Levi mite, gamla tak ah ei nusia, Israelte a vâkmang lai ua a milimteu zui ah gamla tak ah ei vâkmang sante chun, a gitlo man uh kipuak in au.

¹¹Amau chun ka mun thiangtho ah ka nasêm intiu in, Tempul lûtna kotkhak enkol in, Tempul sung ah nasêm in au; mipite hâlmang thillat leh kithoina ganchate chu that in, a sep piak diu ahi.

¹²Himaleh, a milim ho’nau a bawl piak ah, a thil bawl khial ziak ua Israel Inkuante â ding ah kipalna a hung hitau. Ziaziakchun, gawt lo in koi pua’ng ka, ti’n LALPA PATHIAN a kihaksial tai.

¹³Ka thiampu nasêm dingin ei hun nai ta pua’n tiu in, thilzek thiang leh a zek thiangtho pente khoi dingin hung ta pua’n au; himaleh, ki’dak um tak ah thil a bawl ziak un, mualpho tak in um ta’n au.

¹⁴A chutisapi’nle, Tempul sung ah nasep vantang sêm ding leh, a tawi a chan dingin guat tho tho ding ka hi.

¹⁵Himaleh, Levi dan ah thiampu, Zadok chate chu Israel mipite’n ei jamsan lai ua le, ka mun thiangtho enkol in a la pang tau ah; amau chun ka nasêm dingin ei hun nai diu ahi; sathau leh thisan ei pia ding in a pan diu ahi, LALPA PATHIAN in a ti ahi;

¹⁶ka nasêm dingin ka mun thiangtho ah lût in, dawkan tuam ah nasêm in, ka thupiak a zui diu ahi.

¹⁷Indan sungnung pen ah a lût phat uh leh, puan malngat in a kithuam diu ahi; Indan sungnung pen leh a kotkhak tuam ah na a sep lai un, a chung un samul puan a be’ lo ding ahi.

¹⁸Puan malngat, dialkop leh kawnggâk a nei diu ahi; khawsa-ul pawtsak thei ah a kithuam lo diu ahi.

¹⁹Indan pawlam ah mipite kiang lam ah a chia daw phat uh leh, a nasepnau mun, pindan thiangtho ah chun a sil leh chênteu liptha’n, sil leh chên dang in a kithuam diu ahi; achutiloleh, a puan thiangtho uh chun mipite hisiat khawlaw kha’n au.

²⁰A sam uh a mêtkol lo ding uh, a hoisau diak lo ding uh ahi; a sam mong uh neukhat bep a tan thâk sek ding uh ahi.

²¹Indan sungnung ah lût ding, thiampu’n zu a dawn lo ding ahi.

²²Meithâi a hem, mi nolsa a hem chu a kichenpi lo diu ahi; Israel Inkuan lak ah nungak thiangtho, Ahiloleh, thiampu’n a thi’san meithâi a hem bep a kichenpi diu ahi.

²³Ka mite chu thilzek thiang leh a vantang kibat lo dan a hil diu ahi; chuleh, a thiang leh thianglo hetkhen ding dan le a etsak diu ahi.

²⁴Kinial buaina a um leh, thutan ah a pan diu ahi; ka thutanna dan dungzui in thu a ta’n diu ahi. Ka kût guatbîkte chungchâng ah ka dan leh thuguatte a zui diu ahi; ka sabbath nite le a chan thiantho diu ahi.

²⁵Amau kihi’buakna dingin mithiluang a nai lo diu ahi; ahi’n la, a pa a hem, a nu a hem, a chapa leh a chanu a hem, a suapipa leh pawsal nei lo a suapinu a hem ziakin kisubuak thei in au.

²⁶A kisukbuak nung leh, ni sagi tiang chu kisim intin, zia nung chuleh, a zethiang hi’ngal ta’n a.

²⁷Mun thiangtho leh Indan sungnung ah nasêm ding ah a lût phat leh, a gitlo kithoina ding a lat ding ahi, LALPA PATHIAN in a tii.

²⁸Zia hi ama gochan ding hi’n tin: “Keima a gochan uh ka hi, go bangma dang a chan lo diu ahi; Israelte lak ah bangma dang la piak lo ding ahi; Kei hi amau chanvo ka hi’ngal a.

²⁹Thâi thillatte, gitlo thillatte zosia chu a nêk diu ahi; chuleh, Israelte lak ah thilzek thiangtho zosia chu amau chanvo ding ahi ngal hi.

³⁰Thâiga chitin lak ah a ga masa pen leh, thillat chitin lak ah thillat zosia chu thiampute chanvo ding ahi; chuleh, la In sung ua nêk leh dawn la butin theina ding un, la vaithum dia masak penteu chu thiampute la piak diu ahi.

³¹Thiampute chun vacha hileh, sa him him, a pûlthi hileh, sapêlup taphot chu a nêk lo diu ahi,” ti’n a gen a.