Read Vaiphei EZEKIEL 45 Bible Online

EZEKIEL 45 - Vaiphei bible

EZEKIEL 45

¹Chun, a chênna ding uh gam la hop piak phat leh, LALPA â dingin gambung khat, a dung tong sîng ni leh sang nga leh a vai tong sîng ni ah lian la koichuam diu ahi; zia hual sung pumpi chu a zek thiangtho la hisak diu ahi.

²Zia lak ah chun, a ning li kituak, mun bek khat, a dung a vai tong za nga kual sung chu mun thiangtho â ding hi’ntin; a kîmvêl ah gam awng tong sawmnga ah lian in a ûm kîmvêl ding ahi.

³Zia gambung thiangtho sung ah chun, Tempul leh mun thiangtho pen umna bial dingin, a dung tong sîng ni leh sang nga leh a vai tong sîng khat ah lian la te’daw kit diu ahi.

⁴Zia tak chu gam sung ah a thianthona mun chu hi’ntin; mun thiangtho ah sêm leh bawl, LALPA nasêm ding ah nai sekte, thiampute â ding hi’n ah; a chênna ding uh Insakna ding leh Tempul â ding ah mun thiangtho hi hen.

⁵A langkhat ah a dung tong sîng ni leh sang nga leh a vai tong sîng khat ah lian chu, Tempul ah nasêm Levite chênna khawpi ding ah a chan diu ahi.

⁶Gambung thiangtho ding ah la koidawnau pangjul ah chun, khawpi mun dingin a dung tong sîng ni leh sang nga leh a vai tong sang nga ah lian la koichuam diu ahi. Zia tak chu Israel Inkuan zosiate kikop ding ahi.

⁷Chun, gam ah lengpa â dingin, gambung thiangtho tumlam gamgi jul ah kipat gam mong tiang; chuleh, a sualam gamgi jul ah kipat sualam gam mong tiang, a dung le Israel phung tin chanvo ding ah kipia tawh kibang dingin la piakdaw diu ahi.

⁸Zia huap sung hi Israel gam ah a gochan ding uh chu ahi. Tichun, ka lal vaihawmte chun ka mipite a hi’genthei lo diu ahi; himaleh, Israel Inkuante zosia a phung dungzui un gam a neisak zaw ding uh a hiu.

⁹LALPA PATHIAN in zia gual hin a gen hi: Aw Israel lengte haw, a hun tai! Hiamngamna leh kihi’gentheina haisan unla, diktatna leh thudik in vaihawm tau in; ka mite a gam ua kipat nawdok ta kiu in, LALPA PATHIAN in a tii.

¹⁰Te’na dik, Ephah dik leh Bath dik tak la mat diu ahi.

¹¹A nêl te’na Ephah dim khat tawh, a tui te’na Bath dim khat kikim intin; Bath dim sawm tawh Homer dim khat, Ephah dim sawm tawh Homer dim khat a kikim ui; te’na zosia chu Homer dungzui hi hen.

¹²A gik dan te’na Shekel khat chu Gerah sawmni hi’ntin; Shekel sawmguk chu Minah khat tawh kikim hen.

¹³La thillat dingte chu zia gual hi hiu hen: Gehu bu Homer khat la lâknau ah Ephah dim khat mun guk ah khen a mun khat; Barli bu Homer khat la lâknau ah Ephah dim khat mun guk ah khen a mun khat hi’ntin,

¹⁴sathau lam piak ding dan kibawlsa chu Kor khat jel ah Bath khat mun sawm ah khen a mun khat hi hen la; (Kor chu Homer gual ah kimang, Bath sawm tawh kikim ahi;)

¹⁵chuleh, Israel Inkuan zosia lak ah kipat belam za ni lak ah pakhat a hun piak diu ahi. Zia hi thâi lak ah thillat, hâlmang thillat leh kichamna ding ah thillat, la kitatna ding ua la hun piak dingteu chu ahi, LALPA PATHIAN in a tii.

¹⁶Israel gam sung ah mi zosia’n, a lengpau matchâk dingin, zia gual hin a hun piak chiat diu ahi.

¹⁷Israel Inkuante â ding ah nibîk zosia, kût nite, tha thak nite, sabbath nite ah hâlmang thillat ding, thâi thillat ding, dawnchi thillat ding zosia chu, vaihawm lengpa mawpuakna ahi. Ama’n a gitlo thoina ding, thâi thillat ding, hâlmang thillat ding leh kichamna thillat ding zosia tuak in, Israel Inkuante zosia kitatna a bawl ding ahi.

¹⁸LALPA PATHIAN in zia gual hin a gen a: Tha khatna, a ni khat ni leh bawngchal tuai khat, demna bei la’n la, Tempul zethianna la bawl ding ahi.

¹⁹Thiampu chun gitlo thoina gan thisan chu neukhat la’n, tempul kotbiang teni chu tât intin, mâichâm ningbawkte chule tuai in, Indan sungnung lûtna kotbiangte chule tuai hen.

²⁰Zia gual ma hin, zia tha a ni sagi ni hin tup mawng ah hi’khial hileh, chanpal ah bawlkhial nei taphot thasâng in la bawl kit ding ahi; zia gual chun Tempul sukthianthona la bawl diu ahi.

²¹Tha khatna, a ni sawm leh li tin ni leh, chiakân kût la bawl diu ahi; zia hun ni sagi sung chun thawipanglo vaithum bep la nêk diu ahi.

²²Zia ni chuleh, lengpa’n ama â ding leh a gam sung ah mipi zosia gitlo thoina dingin bawngchal khat a tuak ding ahi.

²³Kût sung ah LALPA kiang ah hâlmang thillat dingin, bawngchal tuai sagi tawh, belamchal sagi, demna bei ngen ni sagi sung ah mat dingin; chuleh, nisi’n gitlo thoina ding ah kêlchal pakhat tawh, nisi’n ah pakhat chiat a piak ding ahi,

²⁴Chuleh, changbuang thillat dingin, bawngchal pakhat tawh Ephah khat, belamchal pakhat tawh Ephah khat kituak dingin; chuleh, sathau Ephah khat tawh Hin khat kituak dingin a piakbe ding ahi.

²⁵Tichun, tha sagi’na, a ni sawm leh nga tin ni leh, kût ni sagi hun sung in, gitlo kithoina thillat ding, hâlmang thillat ding, changbuang thillat ding leh sathau thillat dingte chu kibang tak in a piak ding ahi, ti’n a gen a.