Read Vaiphei EZEKIEL 46 Bible Online

EZEKIEL 46 - Vaiphei bible

EZEKIEL 46

¹LALPA PATHIAN in zia gual hin a gen hi: Indan sungnung lûtna kotkhak, sualam nga chu nasepna hun ni guk sung khâk hi’ntin, sabbath ni tawh thathak ni bep leh hon sek ding ahi.

²Lengpa chu hulliap lam ah kipat hung lût in, kotbul ah khuam kiang ah chun ding hen. A hâlmang thillat tawh, a kichamna thillatte chu thiampu’n lat piak intin, ama chun kotbul ah kipat bokkhup in ho ta’n tin; chuleh, pawtdok kit ta’n a. Himaleh, kotpi chu nitâk masia khâk lo ding ahi.

³Gam sung ah mipi zosia’n, zia kotpi bul ah kipat chun, sabbath ni leh tha thak ni si’n in LALPA ho ta’n au.

⁴Sabbath ni si’n leh lengpa’n hâlmang thillat dingin belamno paguk, demna bei tawh, belamchal pakhat, demna bei tawh;

⁵chuleh, a belamchal tawh a lat khawm ding changbuang Ephah khat hi’ntin; belamnote tawh a lat khawm ding chu ama piak thei dan dan hita’n a; Ephah khat tawh sathau Hin khat kituak dingin a piak khawm ding ahi.

⁶Tha thak ni si’n leh bawngchal tuai pakhat, belamno paguk tawh, belamchal pakhat, demna bei ngen a lat ding ahi.

⁷An thillat ding chu: bawngchal â dingin Ephah khat, belamchal â dingin Ephah khat, belamno â ding chu ama piak thei dan dan pia ta’n tin; Ephah khat tawh sathau Hin khat kituak dingin a piak khawm ding ahi.

⁸Lengpa a lût ding phat leh, kotpi hulliap lam ah kipat lût intin, zia lam ma chun a kile’kit ding ahi.

⁹Gam sung ah mipite chu, kût ni kiguat dungzui ah LALPA ho ding ah a hung phat uh leh, mallam kotpi lûtte chu simlam kotpi’ a pawt diu ahi; chuleh, simlam kotpi lûtte chu mallam kotpi’ a pawt diu ahi; kuama a hung lûtnau kotpi’ chu a pawtkit lo ding uh ahi; mitin ama zawn chiat un a chia theng ngal diu ahi.

¹⁰A hung lût lam un lengpa tawh hung lût khawm intiu in; a pawt daw phat uh leh lengpa le a pawtdok ding ahi.

¹¹Kût nite leh hunbî kiguatte ah chun, bawngchal tuai tawh lat khawm ding chu changbuang Ephah khat hi’ntin; belamchal tuai tawh latkhawm ding chu Ephah khat hi’ntin; belamnote tawh lat khawm ding chu, a lânte piak thei dan dan hi’n a; chuleh, Ephah khat tawh kituak dingin sathau Hin khat tawh a piak khawm ding ahi.

¹²Lengpa’n ama kiphalna dungzui ah hâlmang thillat a hem, kichamna thillat ding a hem ah LALPA kiang ah a kiphalna dungzui ah a piak ding phat leh, sualam nga kotpi chu hon piak ding ahi; tichun, a hâlmang thillat ding a hem, a kichamna thillat ding a hem chu sabbath ni phat leh a piak sek ding ahi. Ziazaw chuleh, pawtdok intin, ama pawt daw zaw phat leh kotpi chu khâk hita’n a.

¹³Nisi’n ah LALPA kiang ah hâlmang thillat dingin belamno pakhat, kum khat ah upa, demna bei a piak ding ahi; jingkal si’n leh a piak ding ahi.

¹⁴Chuleh, jingkal si’n leh changbuang, Ephah khat mun guk ah khen a mun khat tawh, changbuang helnêm ding sathau Hin khat mun thum ah khen a mun khat tawh, LALPA kiang ah changbuang thillat ding in a piak zing ding ahi; zia hi chawl lo ah hâlmang thillat bawl ding dan chu ahi.

¹⁵Tichun, chawl lo ah hâlmang thillat dingin belamno tawh, changbuang thillat tawh, sathaute chu jingkal si’n leh piak ding ahi.

¹⁶LALPA PATHIAN in zia gual hin a gen a: Lengpa chun a chapate lak ah khat pen pen kiang ah gam sung mun khat a piakdaw ahi chun, zia gam sung chu a chapate â hita’n tin, go ah a lua ding hita’n a.

¹⁷Himaleh, a suakte lak ah khat pen pen kiang ah a gam sung ah mun khat a piakdaw ahi chun, jubili kum tiang bep chang thei in a; zia nung chuleh lengpa chang kit ta’n a; ama chate bep in luaden thei in au.

¹⁸Lengpa chun a gam sung mite gam a lâkpiak lo ding ahi; ama gam neisa lak ah kipat bep in a chapate golua ding a hop piak ding ahi; ka mipite chu kuama’n a gam uh a lâkpiak lo diu ahi, ti’n a gen a.

¹⁹Ziazaw chun, mallam pang ah, thiampute pindanneu kitiang kiang ah kotpi pang ah lûtna chun ei puidok ta’n; zia kipat chun tumlam geijul ah mun khat ka vak mu ta’n.

²⁰Ama’n ka kiang in, “Huang paw lam ah thilzek thiang a puakdawu ah, mipite â ding ah thilsia a umlona dingin, zia hin thiampute’n hi’khial kithoina leh gitlo kithoina sa a huan ua, changbuang thillatte a kan diu ahi,” ti’n ei hil a.

²¹Chuleh, huang pawlam in ei puidok ah, huang kil li’te chu ei fanpi ah; zia kil pali tin ah chun pindan a la um chiat a,

²²a huang kil palite ah chun pindanneu a um chiat ah; a dung tong sawmli leh a vai tong sawmthum chiat a hiu ah; a pali un a kibang chiat a hiu.

²³Pindan tin chu suang bâng in a ûm ah, bâng jul ah chun thukkhûk a um chiat a.

²⁴Ziaphatchun, ka kiang in, “Ziate hi mipite kithoina sa, Tempul ah nasêmte’n a huannau, anhuan In ahi,” ti’n ei hil a.