Read Vaiphei EZEKIEL 48 Bible Online

EZEKIEL 48 - Vaiphei bible

EZEKIEL 48

¹Ziate hi a phung minteu chu ahi: mallam gamgi bullam, Hethlon lamlian ah kipat Lebo-hamath lam ah kipat Hazor-enon (zia chu, mallam ah Hamath tiang Damaska gamgi ahi’n;) ah kipat in sualam ah kipat tumlam Dan tiang chu chan khat ahi. A bân bân ah a kihop dan uh chu zia gual hi ahi: A masapen in Dan ahi’n;

²Dan bân ah Asher,

³Asher bân ah Naphtali;

⁴Naphtali bân ah Manasseh;

⁵Manasseh bân ah Ephraim;

⁶Ephraim bân ah Reuben;

⁷Reuben bân ah Judah, ti in.

⁸Judah gamgi jul, sualam ah kipat tumlam tiang chu la koichuamna ding chu ahi; a vai tong sîng ni leh sang nga hi’ntin, a dung lam chu namtin channa tawh kibang in, sualam ah kipat tumlam ah kithung intin, Tempul chu a lailung ah um in a.

⁹LALPA chanvo ding ah la khenthâkna bial chu, a dung tong sîng ni leh sang nga leh, a vai tong sîng ni ah lian hi hen.

¹⁰Chanvo zek thiangtho chu zia gual hi hi’n a: Thiampute gam chanvo chu a mallam tiang ah tong sîng ni leh sang nga hi’ntin; a vai chu a tumlam kâi tiang in tong sîng khat leh, a sualam kâi tiang tong sîng khat hi’n ah; chuleh, a simlam kâi ah a dunglam chu tong sîng ni leh sang nga hi’ntin, LALPA Tempul chu a lailung ah um in a.

¹¹Zia huap sung chu guat chuam ah um thiampu, ka nasem Zadok chate â ding hi hen; Israel mipite a vâk mang lai ua, Levite nasan in ei kilepsan lai unle ka thupiak vop in, ei kilepsan paw’ngal un.

¹²Levite gam tawh kizawm, gam sung ah kipat gambung thiangtho bîk, mun thianthona pen chu a chan ding uh hi’n a.

¹³Chuleh, thiampute gamgi tawh kizawm in, Levi phung ah mite’n, a dung tong sîng ni leh sang nga leh, a vai tong sîng khat ah lian a chang diu ahi. A gam pumpiu sau dan chu tong sîng ni leh sang nga leh, a vai tong sîng ni hi’n a.

¹⁴Zia sung hi a zok thei lo diu, midang le a kithenpi thei lo diu ahi; zia kual sung hi LALPA chantum thiangtho ahiziak in, zia gambung doichuam hi a tha’suak lo diu ahi.

¹⁵A gam um nalai chêng, a dung tong sîng ni leh sang nga leh a vai tong sang nga bial sung chu khawpi ah chêngte kikop ding, a chêng nuamte chênna ding leh gam awng ah koi ding hita hen. Khawpi chu a lailung in a um ding ahi;

¹⁶zia khawpi um ding dan chu: A mallam kâi ah tong sang li leh za nga, a simlam kâi ah tong sang li leh za nga, a sualam kâi ah tong sang li leh za nga leh a tumlam kâi ah tong sang li leh za nga hi’n a.

¹⁷Chuleh, khawpi chu gam awng in kîmvêl intin, a mallam kâi ah tong za ni leh sawmnga, a simlam kâi ah tong za ni leh sawmnga, a sualam kâi ah tong za ni leh sawmnga leh a tumlam kâi ah tong za ni leh sawmnga lian hi’n a.

¹⁸Gambung thiangtho jul ah gam awng um nalai chu a sualam ah tong sîng khat tawh, a tum lamkâi ah tong sîng khat hi’ntin; gambung kikoi thiangtho tawh kizom ah kithung in a. A sung ah thingga zosia chu khawpi sung ah umte nek ding hi’n a.

¹⁹Khawpi sung ah nasêmte, Israel namtin lak ah mite chun, lou bawl ta’n au.

²⁰Gambung la koichuam ding pumpi chu, a dung a vai tong sîng ni leh sang nga lian hi’ntin, zia chun khawpi sung leh gambung thiangtho chule huap khawm in a.

²¹Chun, chan thiangtho tawh khawpi huap lo pawlam zosia chu lengpa chan ding hita’n a. Chan thiangtho sualam gamgi jul tong sîng ni leh sang nga tiang leh, tumlam gamgi jul tong sîng ni leh sang nga tiang ah phung tin gam kihopna tawh kizawn cheng chu, lengpa chan ding hi’n a. Chan thiangtho lailung ah Tempul mun thiangtho tawh,

²²Levite leh khawpi gam in a huapnate chu, lengpa gam channa lailung ah um in a. Lengpa gam channa chu Judah leh Benjaminte gam in laitât in au.

²³Zia gual ah a gam channa ding chiat uh a kihop zaw phat un, a ban ua mallam kâi ah gam um nalai cheng chu, sualam gamgi jul ah kipat tumlam Mediteranean Tuisuagiat tiang in, gam chang nai lo phungte chu sualam ah kipat tumlam zuan in, zia gual hin a kihawm dial dial tau a: Sualam ah Benjamin,

²⁴A bân ah Simeon,

²⁵A bân ah Issakhar,

²⁶A bân ah Zebulun tawh,

²⁷A bân ah Gad a hiu.

²⁸Gadte chênna bân mallam ah gamgi chu Tamar ah kipat in Meribath-kadesh luicha tiang kithung intin; zia kipat chun Aigupta Luipi lam ah kipat Tuipi Lian, Mediteranean Tuisuagiat tiang in kithung in a.

²⁹Gam pumpi chu Israel phung tin in go ah a lua ding ua, a chan ding chiat uh, a channa ding mun chiat uh, zia gual chun la hawm piak chiat ding ahi, LALPA PATHIAN in a tii.

³⁰Chuleh, khawpi ah kipat pawtna ding kotpite chu zia gual hi a hiu: mallam kâi chu tong sang li leh za nga sau ahi;

³¹zia lam ah chun Reuben kotpi, Judah kotpi leh Levi kotpi pathumte chu: a khawpi sung kotpite, Israel phung tin min ah kisak dungzui in um in a.

³²A sualam kâi chule tong sang li leh za nga sau leh kotpi pathumte chu: Joseph kotpi, Benjamin kotpi leh Dan kotpite chu um in a.

³³Simlam kâi chule tong sang li leh za nga sau leh, kotpi pathumte chu: Simeon kotpi, Issakhar kotpi leh Zebulun kotpite chu um in a.

³⁴Tumlam kâi chule tong sang li leh za nga sau leh, kotpi pathumte chu: Gad kotpi, Asher kotpi leh Naphtali kotpite chu um in a.

³⁵Khawpi kîmvêl chu tong sîng khat leh sang giat hual sung ahi. Chuleh, zia hun ah kipat chun a khawpi min chule, “Zia hin LALPA a um hi,” ti hita’n a.