Read Vaiphei EZEKIEL 5 Bible Online

EZEKIEL 5 - Vaiphei bible

EZEKIEL 5

¹Aw mihing, nang in chemjam hiam tak kilâk inla; samchem ah mang in, la sam leh khamul mêt in; chuleh, a gik dan te’ inla, sam chu hawm jak in.

²Khawpi lâkna ni a bukim phat leh, sam, se’thum sua a se’khat chu khawpi sung ah mei in hâltum inla; se’thum sua se’khat chu khawpi kîmvêl ah chemjam in sâttan sik sek inla; a se’thum sua se’khat dang chu hui tawsak inla, zia nung ah chun chemjam hun del zuisak ing ka.

³Chuleh, a lak ah tam lo la’n la, la puanâk chual mong in chûn in.

⁴Zia lak ah bang a hem jat chu ladok kit in, mei lak ah sep lut in la hâltum in; zia kipat chun Israelte zosia kâng ding meikuang hung pawtdok ding ahi ngal a.

⁵LALPA PATHIAN in zia gual hin a gen a: Zia Jerusalem hi, gam dang in a ûm kîmvêl, namtin â ding ah gam lailung ah ka koi ahi.

⁶Himaleh, ka dan leh thuguatte bawtsia’n, a kîmvêl ah nam dangte leh, gam dang mite zosia sâng ah nunsia zaw a um tâk ziak un, ka dan leh thuguatte pâmpai in, ka dan siamte a zui nuam ta puau hi.

⁷Ziaziakchun, LALPA PATHIAN in zia gual hin a gen hi: La kîmvêl ah nam dang umte sâng ah la thukhel zawk ziak leh, ka dan siamte leh ka thuguatte zui malak sâng ah, la kîmvêl ah nam dangte dan leh thuguatte la zui zawk tâk ziak un;

⁸LALPA PATHIAN in zia gual hin a gen hi: Keima, keima ngei hi, nangma dodâl dingin ka hung hi; nam dangte mit mu in la chung un vai hun hawm ding ka hi.

⁹Ki’dak um tak ah la um ziak un, thil ka la bawl khâk nai lo, ka bawl kit tâk lo ding khat la chung un hun bawl ding ka hi.

¹⁰La lak un nu leh pa a chateu sa ne leh, a chateu a nu leh pateu sa ne, matheilo in hung um ding la hiu; la lak un vai hun hawm ding ka hiziak in, zia lak ah suakcha sunte chule kil tin ah thejak nalai ding ka hi.

¹¹Ziaziakchun, LALPA PATHIAN in, ama kiminlaw in, “Ki’dak la umnau zosia leh, la polchenau zosia ah ka mun thiangtho la sukbuak zaw tâk ziak un, hun dangdâk ding ka hi; ka mit inle hun en pua’ng ka tin, daidawp talo ding ka hi.

¹²La lak ua se’thum sua a se’khat chu hipi a hem, kial a hem in thi’n la tiu in; a se’thum sua a se’khat chu la kîmvêl ua nam dangte chemjam in thi’n la tiu in; se’thum sua a se’khat dang cheng chu kil tin ah thejak in, chemjam del zuisak nalai ding ka hi,” a ti tai.

¹³A chung ua ka lungnatna butit ing ka tin, a chung ua ka thangtawmna sungtha’ng ka tin, ka lungdam ta’n ah; ka mitthîpna ziak ah Keima, LALPA hin, a chung ua ka lungnatna buntha ka hi, ti hun he ta’n au.

¹⁴Zia mai chule hilo in, la kîmvêl ua nam dangte zosia leh, a hun mu kha taphot in, a simmawu ah nuizatbûk ah a hun mat ding un hun siam ding ka hi.

¹⁵Chuleh, lungna leh thangtawm tak ah la chung ua vai ka hawm ah, hachangthak tak ah ka hun gawt phat leh, la kîmvêl ua nam dangte nuizatbûk leh engho, dipchâk um leh kihilna’n hun mang ta’n au, ti’n, Keima, LALPA hin ka gen ahi; a tia.

¹⁶Nanghaw susia ding mawng mawng ah kialna thalchang, thitheinate ah ka hun kâp ah, a hun susia ding thalchang ah kâp la hiu a; kialna a khawk zaw diak ah ka hun tunsak ah, la hinna bul uh ka hisiat phat leh, zia gual chu tuak ta’n lau.

¹⁷Nanghaw susia dingin kialna leh gamsate hun sawl ing ka tin, la chateu hun lâkpiak ta’n au; hipi leh thisan sua’na la lak un leng intin; chuleh, la chung un chemjam lek ing ka. Keima, LALPA hin zia gual chun ka gen ahi, a ti tai.