Read Vaiphei EZEKIEL 6 Bible Online

EZEKIEL 6 - Vaiphei bible

EZEKIEL 6

¹LALPA‘n ka kiang in thu a hun gen a:

²Aw mihing, Israel tâng sangte lam khi nga’n la, amau kãl in thu gen in;

³a kiang un: Nanghaw Israel tâng sangte haw, LALPA PATHIAN thugen hi ngai un! LALPA PATHIAN in, mual leh tâng, guam leh phâijawlte kiang in zia gual hin thu a gen hi: Kei, Keima’n la chung un chemjam lek ding ka hi; tichun, la thoimualteu susia ding ka hi.

⁴La mâichâmteu chu nutsia in um intin, la gimtui khuamteu le hi’bot hita’n ah; chuleh, la milimteu âng ah la luang uh paitha ding ka hi.

⁵Israel mipite luang chu a milimteu âng ah siavum ta’ng ka tin; chuleh, la mâichâm ma-âng un la guteu chu thejak ding ka hi.

⁶La mâichâm uh suksiat leh chomnâm a hiu ah, la milimteu khet buang leh khet gawp a hiu ah, la gimtui khuamteu sat bot a hiu ah, la khut nasep zosiau phiatnâm a hitheina dingin, la chênnau mun taphot ah la khawpiteu a hawm ah nutsia hi’ntin, la thoimualteu chule suksiat dik dek hita’n a.

⁷La lak un la mithiteu kitâl tek tuk in au; ziaphat chuleh, keima hi LALPA chu ka hi ti hun he ta’n lau.

⁸Himaleh, la lak un khenkhat hawi ding ka hi. La lak ua khenkhat nam dangte lak ah um in chemjam ah kipat suakcha’n, gam tin ah thêchek in um ta’n lau.

⁹La lak ua suakchate chun, sal ah puimangte gam ah chun, keima ei hun he ta’n tiu in; chuleh, a lungthim un ei kiheisan ziak uh leh, a mitdunau ziak ah milim lam ei ngatsan ziak un, ka lungthim nat ding dante chu he ta’n au. Ziaphat chuleh, amau mit mu ziang ah thil huaisia tak a la bawl ziak ua, polche tak leh ki’dak um tak ah a la um a hiu ti kihia’n, amau leh amau le kiluaksuak hial ta’n au.

¹⁰Chun, a chung ua zia gual siatna huaisia ka tunsak ziak hin, LALPA ka hi ti hun he ta’n au; amau ka vauna ahiziak in thawn pua’n a.

¹¹LALPA PATHIAN in zia gual hin a gen a: La khut bêng in, la keng tat in; chuleh, Israel Inkuante a la ki’dak umnau zosia chu aw! ti’n gen in. Chemjam in pûk intiu in, natpi leh kialte ziakin thi’n au.

¹²Gamla tak ah umte chu natpi’n thi’n tiu in; a nai tuam ah umte chu chemjam in thi’n tiu in; zia lak ah suakcha nalaite chu kial thi’n au. Tichun, a chung ua ka lungnatna but khum ta’ng ka.

¹³A milimteu ma-âng ah a gimtui hâlna munteu, gangpi thingbuk nuaite, thinghing bul tinte, tângsip tin leh mualsang tinte chung leh, a mâichâm bul tin ua a milimteu lak ah a mithi luangteu a um zeng zung phat leh, kei hi LALPA ka hi ti hun he ta’n au.

¹⁴A chung un ka khut lek ing ka tin, gam chu susia’ng ka tin, a chênnau gam zosia gamthip ah kipat Riblah tiang in susia’ng ka. Ziaphat chuleh, kei hi LALPA ka hi ti hun he ta’n au.