Read Vaiphei EZEKIEL 7 Bible Online

EZEKIEL 7 - Vaiphei bible

EZEKIEL 7

¹LALPA‘n ka kiang in thu a hun gen kit a:

²Nang mihing, LALPA PATHIAN in Israelte gam kiang in zia gual hin a gen hi: Tawpna! Gam kil li ah tawpna a tung tai!

³Tu’hin, la chung ah tawpna a hung tung in, la chung ah ka lungnatna buntha ding ka hi tai; la umdan dungzui in la chung ah vaihawm ing ka tin; la ki’dak umna zosia ziakin, hun gawt ding ka hi.

⁴Ka mit in hun hawi pua’n tin, khawtuana hun nei lo ding ka hi. La umdan dungzui in hun gawt ding ka hi’n, la ki’dak umna zosiau la lak un a umzing ngal a. Ziaphat chuleh, kei hi LALPA ka hi ti hun he ta’n lau.

⁵LALPA PATHIAN in zia gual hin a gen a: Siatna chung ah siatna! En in, a hung tung hi.

⁶Tawpna a hung tung in, a tawpna a tung tai. Nang kilanpi dingin a hung tho hi; en in, a hung tung hi!

⁷La siatna ding a hung hi, aw gammâng ah chêngte haw. A hunbî a tung in, a ni chu a nai tai, tângte chung ah kinoptelna hilo in, buaisiatna ahi.

⁸Kin tak in la chung ah ka thangtawmna buntha’ng ka tin; la chung ah ka lungnatna buting ta’n a. La umdan dungzui in la chung ah vaihawm ing ka tin, la ki’dak umna zosia ziakin hun gawt ding ka hi.

⁹Ka mit in hun hawi pua’n tin, hun daidawp pua’ng ka. La umdan dungzui un hun gawt ding ka hi’n, la ki’dak umnau la chung un a umzing ngal a. Ziaphat chuleh, a hun bawl genthei chu, keima LALPA ka hi ti hun he ta’n lau.

¹⁰Ngai in, a ni chu! En in a hung tung hi! La siatna ding a hung kuangdok tai. Mol chu a seldok ta’n, kisaktheina chule a mûmdok tai.

¹¹Kipawngbawlna chu nunsiatna mol in a piting tai. A neinungnau leh a hausaknau khat chale umden ta pua’n tin; a lopinau le um diak ta pua’n a.

¹²Hun chu a hung tung ta’n, a ni chu a nai tul tul tai; a chawte chu kipak kiu hen la, a zuakte chule lungngai diak kiu hen; lungnatna chu a mipite chung ah chu ding ahi ngal a.

¹³A zokdawsa chu a dam sung ah mu kit talo ding ahi ngal a. Kilâkna chu a leng ua chung ah tung ding ahi’n, lâk daw kit hi pua’n a. A dukdaklo’nau ah kipat suakcha umlo ding ahi ngal un.

¹⁴Pengkul a mût un, bangkim a siam zo tau hi! maleh, kuama kido’na mun in a chia puau in, ka lungnatna a leng ua chung ah um ahi ngal a.

¹⁵Pawlam ah chemjam, sunglam ah natpi leh kialna, gamlak ah umte chemjam ah thi’n tiu in, khawpi sung ah umte chu, kial leh natpi’n thizo in au.

¹⁶A suakcha jamdok a um chun, phâijawl ah vakhute gual ah, a dukdak lona ziak ua lusûn in, tâng ah te chun um ta’n au.

¹⁷Khut zosia zoi intin, khûp zosia tui gual in nêm ta’n a.

¹⁸Saidip puan sil intiu in, dipchâkna’n dim ta’n au. Mi zosia zakcha’n tin, a luchang zosiau kol ta’n a.

¹⁹A dangka thîkteu kotzingte ah thejak intiu in, a sanateu le buaksia gual in koi ta’n au. LALPA lungnatna nikhua chun, a dangka leh sanateu chun hukdok thei ta pua’n a. Ziate ah chun a gilkialnau nêm pua’n tin, a gil uh le vâsak diak pua’n a. Zia chu a khawlo’nau ah a kisuinau ahi tâk ziakin.

²⁰A kisuanpiu a kicheinau mêlpha takte ah kipat in, ki’dak um milimte a kisiam un, thil polche tincheng a kibawl un; ziaziakchun, amau â ding ah thil thianglo dingin siam piak ding ka hi.

²¹Gâl lâk dingin nam dangte khut ah pia’ng ka tin, khawvel ah mi nunsiate suam dingin pia’ng ka; amau chun mi chu subuak ta’n au.

²²Amau lam nga ta pua’ng ka tin, ka mun go tak chu subuak ta’n au; mi huhamte lût intiu in, subuak ta’n au.

²³Thikkhau bul un! Gam pumpi tualthana thisan in a dim ta’ngal a; khawpi sung le hiamngamna’n a dim zo tai.

²⁴Khawvel ah nam gilo pente a In uh lua dingin, hun pui lût ing ka. Mi kiletsakte chapona hi’bei ing ka tin, a mun thiangthoteu sukbuak in um ta’n a.

²⁵Lungjinna a hung tun phat leh, muanna hawl intiu in; maleh, mu ta pua’n au.

²⁶Siatna a sawn sawn in tung intin, gâl thuthang a sawn sawn in tung in a; jawlnei ah kipat kilâkna hawl veng vung ta’n au, thiampute ah kipat zilsakna bei ta’n tin, upate ah kipat puihuaina thugen le um diak ta pua’n a.

²⁷Lengpa lusûn ta’n tin, lal chapa lungngaina puan in kithuam ta’n tin; gam sung ah mi zosia khut kithing zo ta’n au. Amau umdan dungzui in a chung un bawl ing ka tin; a vaihawm dungzui un a chung un vaihawm ing ka. Tichun, LALPA ka hi ti hun he ta’n au.