Read Vaiphei EZEKIEL 8 Bible Online

EZEKIEL 8 - Vaiphei bible

EZEKIEL 8

¹A kum gukna, a tha gukna, ni nga tin ni ah chun, ka âng ah Judah upa vaihawmte ka In ah a kichut pet un, keile ka In ah ka chut zing lai in, LALPA PATHIAN khut ka chung in a hung um ta’n.

²Ka et leh, lim, mihing tawh kipua thim khat a um ah; a kawng nuai lam chu meikuang ahi’n, a kawng chung lam cheng chu meiâm vâk tak a bang hi.

³Khut tawhbang a hun thadok ah, ka sam in ei hun man ta’n; chuleh, thagau in lei leh van kikâl in ei domkhai ah, Jerusalem ah Pathian In kilâkna’n ei etsak ah; a huang sungnung lutna kotpi mallam nga lutna bul tak ah chun thangsiatna milim a um ah, zia milim chun thangsiatna a choktho sek a.

⁴Chuleh, phâijawl ah kilâkna ka la mu gual khan, Israelte Pathian lopina le a la um hi.

⁵Ziaphatchun, Pathian in ei hun ho ah, “Aw mihing, mallam nga’n khawda tiam in,” a hun tia. Tichun, mallam nga’n ka dakdaw leh, mâichâm kotpi mallam kâi ah, a lûtna bul ah chun thangsiatna milim chu a la um a.

⁶Ka kiang in, “Mihing, ka mun thiangtho ah kipat ei delmang ding in, Israel Inkuante’n bang gual ah ki’dak um bawl a hiu em ti la mu em? Ziate sâng ah ki’dak um zaw diak a bawl uh le hun etsak nalai ding ka hi,” ti’n a hun gen a.

⁷Chun, a huang ûmna lûtna bul ah ei pui ah; ka et leh, bânghawm pakhat a um a.

⁸Ziaphatchun, ka kiang in, “Mihing, bâng kha vak cho tiam in,” ei hun tia; ke’nle bâng chu ka chawhawm leh, a lutna ding kot pakhat a la um a.

⁹Ama’n ka kiang in, “Lût inla, zia tak ah ki’dak um huaisia tak a bawlteu chu vaen ma tiam in,” ei hun tia.

¹⁰Tichun, ka lût ah, ka et leh, a bâng ah ganhing bokvâk chitin, ganhing ki’dak um zosia leh Israel Inkuante milim ho zosia lim, a dim ah kizik ka mu tai.

¹¹A âng ua Israel upa vaihawm sawmsagi dingte lak ah, Shaphan chapa Jaazaniah ding chule ka mu’n. A khut un gimtui hâlna bêl a chawi chiat un, a gimtui hâlnau meikhu chu a jam to a.

¹²Ziaphatchun, ka kiang in, “Mihing, Israel Inkuan ah upa vaihawmte’n, pindan sung thim nuai ah a milimteu bang law a hiu em ti la mu em? Amau in, ‘LALPA‘n ei mu pua’n, LALPA‘n gam hi a nutsia ahi tai,’ a ti ta’ngal un,” a hun tia.

¹³Chuleh, ka kiang in, “A thilbawl uh ki’dak um zaw diakte hun etsak ing ka,” a ti nalai a.

¹⁴Ziaphatchun, LALPA In lûtna, mallam kotpi bul ah chun ei pui a; zia tak ah chun, Tammuz kiti kâ khum ah numei kichute a um un.

¹⁵Ziaphatchun, ka kiang in, “Aw mihing, zia chu la mu em? Ziate sâng ah ki’dak um zaw hun etsak nalai ding ka hi,” ti’n a gen a.

¹⁶Chun, LALPA In huang sungnung ah ei pui lût a; zia tak ah LALPA tempul lûtna, hulliap tawh mâichâm kikâl ah pawsal sawmni leh nga ding vêl, LALPA tempul nungngat ah, sualam nga, sualam ah nisa ho ah khiangkhote chu a la um un.

¹⁷Ziaphatchun, ka kiang in, “Aw mihing, ziate chu la mu em? Judah Inkuante’n zia tak ah thil phalo a bawl uh hi ki’dak um tawk hilo a hem? Gam pumpi hiamngamna’n a hi’dim un, ka lungnatna choktho sawn sawn lo ding a hiu em? En in, a nâk uh a sunîl tau hilam!

¹⁸Ziaziakchun, lungna tak in thuk ing ka; kimulosak ta pua’ng ka tin, daidawp pua’ng ka; ka het in ngai tak in kap maleule, limsak ta pua’ng ka,” a ti tai.