Read Vaiphei EZEKIEL 9 Bible Online

EZEKIEL 9 - Vaiphei bible

EZEKIEL 9

¹Chuleh, ka nakhang ah ngai tak in, “Nanghaw, khawpi sung ah mite bantan ding zosia, la khut ua suksiatna matchâk chawi in, hun nai tau in,” ti’n a kiko tai.

²Chuleh, mallam nga, chung lam ah kotpi kipat in mi paguk a hung pawtdok un, a khut un mi tha’na ding matchâk a hun chawi chiat un; a lak un mi pakhat puan malngat ah kithuam, a kiang ah lekha zikna ding kikoi khat a um a. A lut un, sum-eng mâichâm kiang in a ding tau a.

³Tu’hin, Israelte Pathian lopina chu, tempul In mai tual ah cherub chung ah kipat chun a chiadok ah. LALPA‘n puan malngat ah kithuam, a kiang ah lekha zikna ding koipa chu a ko a;

⁴a kiang in, “Khawpi sung hawtheng inla, Jerusalem khawpi sung ma ma hawtheng in; chuleh, khawpi sung ah ki’dak um tak ah thil a kibawl ziak ah, khawksa tak ah thûm leh mau zosia chu a chalkiu ah tepte’na bawl in,” ti’n a hun gen a.

⁵Ka het in mi dangte kiang ah chun, “Ama nung in khawpi sung paltheng unla, mite chu that malam pek un; kimulosak kiu inla, daidawp diak kiu in.

⁶A têk, a khang, numei leh naupang, a leng un that gam unla, tepte’na nei cheng vang khoikha kiu in. Ka mun thiangtho ah chun that pan un,” a hun ti’n. Tichun, tempul In mai tual ah upa vaihawmte lak in a hun that pan tau a.

⁷Ziaphatchun, a kiang un, “Tempul chu a subuak un, mithiluangte chu a huang sung ah siakhawm un. Kipan un!” a hun tia. Tichun, a kipan tau a, khawpi sung ah mi a that pan tau a.

⁸Mi a vatha sung un kei ngen in ka um ta’n, bokkhup in ka kap ah, “Katei, LALPA PATHIAN! Jerusalem ah la lungnatna la butthâk sung hin, Israel mi a um sunte chu that zo vek ziang ding la hem?” ka ti tai.

⁹Ama’n ka kiang in, “Israel leh Judah Inkuante thil bawl khial chu a huaisia ma ma hi; gam pumpi thisan sua’na’n a dim ah, khawpi sungle nunsiatna’n a dim zo tai; amau in, ‘LALPA‘n gam hi a nungngat ta’n, LALPA‘n en talo ahi,’ a ti’ngal ui.

¹⁰Ke’n vang kimulosak pua’ng ka tin, daidawp diak pua’ng ka; a thilbawl dungzui un a luchung un tunsak zaw ta’ng ka,” a hun ti tai.

¹¹Ziaphatchun, puan malngat ah kithuam, a kiang ah lekhazikna ding neipa chun, “Bawl ding ah thu lei piak dungzui in ka bawl ding zosia ka bawl zo tai,” a hun ti tai.