Read Vaiphei DANIAL 1 Bible Online

DANIAL 1 - Vaiphei bible

DANIAL 1

¹Judai gam ah Lengpa Jehoiakim a lal kum thumna chun, Babulon Lengpa Nebukadnezar in Jerusalem a hung sim a.

²Lalpa chun Judai gam ah Lengpa Jehoiakim chu a khut in a pia, chuleh, Pathian In ah ûm leh bêl khenkhat a lâk piak chule a phal a. Zia go thilte chu Shinar gam in a paw tung ah, ûm leh bêlte chu a pathian In ah go thil koi khawmna chun a koi tai.

³Chuleh, lengpa chun a lal In ah hotu Ashpenez chu, Israel lal Inkuan leh milian Inkuan ah kipat hun pui ding in,

⁴Israel tangval mêlpha leh pian bukim, pilna lam zosia ah thiam, hetthiamna leh lungthim pil, lengpa Inpi ah nasêm thei ding bang jat a hem hun têldok ah, Kaldaite lekha leh pau zilsak dingin thu a pia.

⁵Lengpa chun, lal Inkuan ah mite nêk leh dawn tawh kibang in, nisi’n leh a chan ding uh le a guat chuam piak a. Amau chun kum thum a zil zaw phat uh leh, lengpa vaihawmna pansak ding a hiu a.

⁶Ziate lak ah chun Judah phungah kipat in, Danial, Hananiah, Mishael leh Azariah cheng hi a pang ua.

⁷Leng In ah hotupa chun, a min ding uh a chuam a phuak piak chiat a: Danial chu Belteshazzar a sak ah, Hananiah chu Sadrak a sak ah, Mishael chu Meshak a sak ah, Azariah chu Abednego a sak hi.

⁸Himaleh, Danial chun lengpa nêk leh dawn ah kisukbuak lo ding a tup tinten a; tichun, lal In ah hotupa kiang in kisubuak lo dingin a dawn ta’n.

⁹Tichun, Pathian in Danial chu lal In hotupa doisakna leh lainatna a nei sak tai.

¹⁰Lal In hotupa chun Danial kiang in: “La nêk leh dawn ding uh hun guat piak lengpa, ka lalpa chu ka lau hi. Ama’n la khan gualpi tangval dangte pha zo lo in hun mu kha leh vang, ka hinna a âng ah lauthawng um tak ah ei koi ding la hi,” a tia.

¹¹Ziaphatchun, Danial in, lal In hotupa, Danial, Hananiah, Mishael leh Azariah te lawi enkol ding ah a guatpa kiang ah chun:

¹²“La suakte hi ni sawm sung ei entha’n la. Anche me bep ei mesak in tui thiang bep ei dawnsak in.

¹³Lengpa nêk leh dawnte ne leh dawn tangval dangte chu tawh ka mêl latdanteu ei te’ inla, zia la mudan ah chun ei bawl mai in,” ti’n a don ta’n.

¹⁴Zia chu lem a hun sa ta’n; ni sawm sung a entha tai.

¹⁵Ni sawm nung in lengpa’n nêk leh dawn ding a piak, tangval dangte sâng ah a mêlteu phazaw leh thau zaw in a mu ta’n.

¹⁶Tichun, amau vêngpa chun, lengpa’n a nêk leh dawn ding ua a piakte chu peta lo in, anche mai mai a pia zaw tai.

¹⁷Zia tangval palite chu Pathian in hetthiamna leh pilna lam zosia ah lekha thiamna leh pilna a pia ta’n; Danial in kilâkna leh mang lam ah hiatthiamna a nei chuam a.

¹⁸Lengpa kiang ah a kilatna ding uh huntiam a tun phatin, lal In hotupa chun Nebukadnezar kiang in a pui lût ta’n,

¹⁹lengpa’n a holimpi ah. A lak un Danial, Hananiah, Mishael leh Azariah tuk chu khat chale a um puau a; ziaziakchun, amau chu lengpa vaihawmpi dingin a koidet tau a.

²⁰Pilna thu leh hetthiamna lam thu ah lengpa’n a dot taphot chu, a gam sung ah mitvaidawi thiam leh âisân thiam zosia sâng in ale’ sawm in a thiam zawu a.

²¹Tichun, Danial chu Lengpa Kuras lal kum khatna tiang in, lal Inpi ah chun a um den tai.