Read Vaiphei DANIAL 10 Bible Online

DANIAL 10 - Vaiphei bible

DANIAL 10

¹Persia Lengpa Kuras a lal kum thumna’n, Danial, Belteshazzar a tiu kiang in thu khat taklat in a hung um a. Zia chu thudik tak, kidona nasa tak hung um ding thu ahi. Mulawkna thute hiatthiamna neisa ahi ziakin, zia thu chu a hechian ma ma ziang hi.

²Zia hun ah chun, keima Danial chu lusûn ah hapta thum a la um ka hita’n.

³Bugum, sa leh zu him him ka kam in a lût pua’n, zia hapta thum sung chu sathau le ka kinu’ puai.

⁴Tha masa pen ah a ni sawmni leh li ni chun, Luipi Lian Tigris lui pang ah ka ding a,

⁵ka dâk to ah, pawsal khat puanmalngat sil, a kawng Uphaz sana kawnggâk ah kigâk ka vak mu’n.

⁶A pumpi chu beril suang mantam gual, a maichang kawlphe tawh bang, a mitte meisel kuang gual, a khutbânte leh a kengte chu sum-eng kinawtval tak gual leh, a aw chu mipi husa gual ahi.

⁷Keima Danial bep in zia ka thil mu’lawk chun, ka kiang ah mipite chu lau in kithing maleu, mu’lawkna chu a nei puau a; tichun, a tai mang un, a kisêlmang zo tau a.

⁸Chuleh, zia mu’lawkna nasa tak chu en dingin keima bep nutsia in ka um ta. Ka tha a um ta pua’n, ka mêl le mithi mêl a pu ta’n, tha leh zung him him ka nei ta puai.

⁹Ziaphatchun, a aw ka he ta’n; a aw ka het phat in, ka mai ah lei tual si’n, khawhelo in ka kipûk tha tai.

¹⁰Himaleh, ei hun khoi ah, ka khupbok ah vâk dingin ei kaitho tai.

¹¹Ka kiang in, “Danial, doisakna lian tak chang la hi; la kiang ah ka thugen ding hi ngaikhawk ma ma in. Tu’hin nang kiang ah sawl ah um ka hi’n, la keng in ding in,” ei hun tia. Tichun, zia gual ah a gen zing lai ah chun, lau ah kithing kawm kawm in ka dingdok tai.

¹²Ka kiang in, “Lau kin Danial, hiatthiamna ding ah kingaitawm tak ah la Pathian kiang ah la lunggil la piak lim ah kipat khan, la thute chu ngaithâk a hita’n, la thute ziak ah keima la kiang ah hung ka hi.

¹³Himaleh, Persia lenggam chapa chun ni sawmni leh khat zet ei dâl hi. Tichun, hotulian Mikael ei panpi dingin a hung ah, ama tawh Persia lenggam chapa chu nusia in,

¹⁴ni tawp lam leh la mite chung ah bang gual thil hung tung ding a hem, ti hiatthiamsak ding ah la kiang ah hung ka hi,” ti’n a hun gen a.

¹⁵Zia thute chu ka kiang ah a gen zing lai in, lei tual lam ka ngat leh ka pauthei ta pua’n.

¹⁶Ziaphatchun, mihing mêlpu khat in ka lei a hun khoi ah; chuleh, thu gen dingin ka kam ka ka’n, ka âng ah dingpa kiang in, “Aw LALPA, zia kilâkna ziak ah hin ka chung ah natna hung tung in, tha leh zung him him ka nei ta puai.

¹⁷Bangti’n ka LALPA suak hin ka LALPA chu ho thei ding ka hi tam? Kei la kithing in, tha leh zung him him ka nei ta puai,” ti’n ka dawnhu a.

¹⁸Chuleh, mihing mêlpu khat in ei hun khoi in, ei hun hi’hât kit tai.

¹⁹Ka kiang in, “Lau kin, nasa tak ah doisakna changpa! Nang chu humbit la hi tai. Hat tak leh hangsan tak in um in!” ei hun tia. Zia gual ah ei hun ho zaw phat ah chun ka hung hât ta’n, a kiang in, “Nang in lei hi’hât tâk ziakin, tu’hin ka LALPA‘n thu hun gen ta’n le,” ka ti tai.

²⁰Ziaphatchun, ka kiang in, “Bang ding ah la kiang ah hung ka hi la he em? Tu’hin Persia leng chapa do dingin chia kit ding ka hi tai; ama ka zaw phat leh Grik lal chapa hung kilang ta’n a.

²¹Himaleh, thutak zikna lekhabu ah kizik chu hun hil ing ka. La lal uh Mikael tilo ngal, zia lengte ei dopi ding kuama a um puau hi,” ti’n a hun gen tai.