Read Vaiphei DANIAL 12 Bible Online

DANIAL 12 - Vaiphei bible

DANIAL 12

¹Ziaphat chuleh, Mikael, lal thupi tak leh, la mite hukdokpa chu hung kipan ta’n a. Khawvel ah mihing a um lim ah kipat tung kha nailo, buaina hung tung in a. Himaleh, lekhabu ah min kizik a mu taphot uh, la mite zosia chu hukdaw in um ta’n au.

²Mi tam tak leivui a la suak ta, a la ipmusate chu hung khanglo ta’n tiu in; khenkhatte kumtuang hinna chang ding leh, khenkhatte kumtuang jachakna leh mualpho’na chang ta’n au.

³Mipil taphot chu van lam vakna gual in vâk ta’n tiu in, mi tam tak dikna lampi puilûtte chu, kumtuang kumtuang in aksite gual in vâk zing ta’n au.

⁴Himaleh, aw nang Danial, huntawp masia zia thute hi îm inla, lekhabu chule châldet mai in. Mite chu tai vêl het hut intiu in, siatna pung ma ma ta’n ah, a hun ti tai.

⁵Ziaphatchun, keima Danial in ka vak et leh midang pani, ka umna gâl lam ah khat leh luigâl lam ah khat dingin ka vak mu’n.

⁶A lak ua pakhat, puan malngat ah kithuam, luinâk lam ah umpa chu a vak ho ah, “Zia thil lamdang takte guitunna ding chu bang chan ahi nalai diam?” ti in.

⁷Puan malngat ah kithuam, luinâk lam ah umpa chun a khut changlam leh a khut veilam van lam in a jak to a. Ama’n zia hun tunna ding chu hun khat, hun ni leh hun kimkhat zaw leh mithiangthote thilhitheina sukchimitna tung intin, ziaphat chuleh, zia thil zosia bukimna chu tung ta’n a, ti’n kumtuang ah hingzingpa min ah kipautiam hial in a hun gen a.

⁸A thugen git chu ka he; ahi’n, ka hethiam puai; tichun, a kiang in, “Aw ka LALPA, zia thilte chu bangti’n a hung um diam?” ti’n ka dong a.

⁹Ama’n ka kiang in, “Danial, chia mai ta’n; zia thute hi huntawp lam masia îm ah châlbit tâk di phot ding ahi.

¹⁰Mi tam tak chu hi’thian ah um in thiangtho in, buak kâi lo in um in au; himaleh, migilo chu gilo tak in umden mai tau hen. Migilote lakah khat cha’nle he’thiam pua’n tiu in, mipilte’n vang he’thiam na’n au.

¹¹Nisi’n hâlmang kithoina lâkmang ahi ah, hi’buakpa ki’dak um tak tundaw ahi ah kipat in, ni sang khat za ni leh sawmkua hung um in a.

¹²Ni sang khat za thum sawmthum leh nga a bei tiang ngâk ah thuakzote chu mi hampha a hiu.

¹³Himaleh, nang vang, a tawp tiang in chia inla, chawldam ta’n; zia mite a bei nung ah hin la kipakman sâng dingin hung thokit ding la hi’ngal a,” ti’n ei hun ho tai.