Read Vaiphei DANIAL 2 Bible Online

DANIAL 2 - Vaiphei bible

DANIAL 2

¹Nebukadnezar lal kum ni’na chun, Nebukadnezar in mang a nei ah, a lungkham ziakin a ipmu thei ta pua’n.

²Tichun, lengpa chun mitvaidawi thiamte, âisân thiamte, dawithiamte leh Kaldai mipilte chu lengpa mang hilchian dingin a ko khawmsak tai. A hung phat un, lengpa kiang in a hung ding tau a;

³ama’n a kiang un: “Mang khat ka nei in, zia ka mang hilchetna chu he nuam talua’n ka lung a kham ma ma hi,” ti’n a gen a.

⁴Kaldaite chun a kiang in: (Aramaic pau in) “Aw lengpa, dam sawt in! La suakte hi la mang chu hil inla, hun hilchian piak ing kau,” a tiu a.

⁵Lengpa chun Kaldaite kiang ah chun, “Zia hi mipi zosia het ah ka thupuan ahi: Ka mang leh a hilchetna lei hil theilo ua leh, sât tel in um in la tiu in, la In uh le suksiat sik sek hi’n a.

⁶Himaleh, ka mang leh a hilchetna lei hil thei uh chun, thilpiak leh kipakman leh choihoina thupi tak hun pia ding ka hi. Ziaziakchun, mang chu a hilchetna tawh ei hil un,” ti’n a dawnhu ta’n.

⁷Amau chun: “Lengpa’n a suakte kiang in a mang chu hilphot hen la, ziaphat chuleh, a hilchianna gen piak ing kau,” a tiu a.

⁸Lengpa’n a kiang un: “Thu tanna khau tak ka bawl tâk ziakin, hun a sau thei pen la neina ding bep uh ngaitua la hiu ti ka hechian tai;

⁹mang chu lei hillo ua leh, nang uh â dingin thupiak khat bep a um hi: A hun hung kitheng ta ding chu la tiu a, kizuauzawp tak ah thuzuau leh la nop nop ua lei la thep sek uh ahi. Ziaziakchun, mang chu ei hil un, chutileh, a hilchetna chule ei hil thei la hiu ti hechian tâng ka,” ti’n a dawnhu tai.

¹⁰Kaldaite chun lengpa kiang in, “Lengpa thildot hedok thei ding khawvel ah mihing khat le um pua’n a! A dik tak in, bang gual ah lal leh thunei inle, dawithiamte leh âisân thiamte leh Kaldaite chu zia gual chun a dong kha ngai puau.

¹¹Lengpa thil dot hivâng thil haksa ta lua ahi, mihingte lak ah um hilo pathiante lo’ngal in hedok thei pua’n au,” a tiu a.

¹²Zia a thugen ziak uh chun lengpa a lungna ma ma ah, Babulon ah mipil zosia chu that gam dingin thu a pia tai.

¹³Thupiak chu suadaw in a um ta’n, mipil zosia thalup dingin a um tau a; chuleh, Danial leh a gualte chule tha khawm dingin a hun hawl tau a.

¹⁴Ziaphatchun, Danial in Babulon mipilte that dingte lak ah hotu, Ariok kiang in chingthei tak leh pil tak in a dawnhu a;

¹⁵lengpa sepai hotu Ariok kiang in, “Bang ding ah lengpa’n zia gual lawm lawm ah kin chun thu pia a hem?” a tia. Ariok inle Danial kiang in a thu chu a hilchian ta’n.

¹⁶Tichun, Danial chu a lût ah, lengpa kiang in a mang hilchetna ding ah hun chomkhat pia ding in a don tai.

¹⁷Tichun, Danial a In lam in a chia ta’n; zia thu chu a gualte Hananiah, Mishael leh Azariah kiang in a hil a;

¹⁸Danial leh a lawite pum ah Babulon mipil zosia thalup a hilo’na ding ua, van Pathian in zia thugûk chu a hiatsak theina ding ah a ja’ngaina don dingin a hil a.

¹⁹Ziaphatchun, jan mang in Danial kiang ah zia thugûk chu hiatsak in a um ta’n; tichun, Danial in van Pathian chu a chawihoi tai.

²⁰Danial in: “Pathian min chu kumtuang kumtuang in pâk in um ta hen; pilna leh hatna ama â ahi ngal a.

²¹Ama’n hun leh hunbîte a sudanglam ah, lengte a paitha’n, lengte a tungding hi; mipil kiang ah pilna a pia’n, hetthiamna neite kiang in hetna a pia’i.

²²Thugil leh kisêlgute a tâklang in, thim ah umte le a hia’n, a kiang in vakna a um hi.

²³Aw, ka pu leh pate Pathian, nang in pilna leh hâtna lei pia ta’n, la kiang ah ka thil dot uh ei hiatsak in, lengpa’n ei phût chu lei hiatsak tâk ziakin, la kiang ah kipak thu gen in ka hun chawihoi hi,” ti in a gen tai.

²⁴Ziaziakchun, Danial chu lengpa’n Babulon mipilte that ding ah a guatpa, Ariok kiang in a chia ah, a kiang in, “Babulon mipilte chu that kin; lengpa kiang ah ei pui lût inla, lengpa mang hilchetna gen piak ing ka,” a ti tai.

²⁵Tichun, Ariok in Danial chu lengpa kiang ah kin tak in a pui lût ah, a kiang in: “Judah saltângte lak in lengpa mang hilchian piak thei ding mi khat ka mu tai,” a tia.

²⁶Lengpa chun Danial, a min Belteshazzar a ti sek kiangah chun, “Nang in ka mang hilchetna ei hil thei ding maw la hi?” ti’n a dong a.

²⁷Danial in lengpa kiang in, “Lengpa’n mipilte, dawithiamte, mitvaidawi thiamte leh âisân thiamte kiang ah thugûk hilchian ding ah a dot hi kuama’n hil thei pua’n au;

²⁸himaleh, van ah Pathian pakhat, thugûk zosia taklang sek a um in, ama chun khawvel huntawp ding lam ah bang gual ah thil hung um ding ahi em ti Lengpa Nebukadnezar kiang in a hun hiatsak ahi chu. Lupna chung ah la lup ah, la mang leh kilâkna la mu chu ziate hi a hiu:” a tia.

²⁹Aw lengpa, nangma’n tu’nung leh bang gual in thil a hung um dia aw ti’ la lupna chung ah la ngaitua lai in, thugûk hiatsak sekpa chun thil hung tung dingte chu la kiang in a hun tâklat ahi.

³⁰Keima ka hileh, midangte sâng ah ka pil zawk ziak a hem ah zia thugûk hi ka kiang ah tâklat a hipua’n; himaleh, lengpa kiang ah a hilchetna hiatsak a hitheina ding leh, nang in la lungthim ah la ngaituate chu la hettheina dingin hiatsak ka hizawi.

³¹Aw lengpa, la et leh milim lian tak khat la mu’n! Zia milim chu lian ma ma leh lamdang tak ah vâk ahi’n; la ma-âng in a ding ah, a kilat dan chule lau um ma ma ahi.

³²Zia milim luchang chu sana thiang ahi’n, a awm leh a bânte chu dangka thîk ahi’n; a pum leh a malpite chu sum-eng ahi’n,

³³a kengte chu thîk ahi’n, a kengpêk chu thîk tawh tungman kihel ahi.

³⁴La et zing lai in, suangtum khat, mihing khut ah kisêk hilo khat hin a kengpêk thîk leh tung kihel chu a hun sepnawn dim dem tai.

³⁵Chuleh, thîk tawh, tung tawh, sum-eng tawh, sanate chu a leng un nipi lai ah buphual ah busi gual mai in a buang dim dem tau ah; chuleh, hui in a hun mût mang ta’n, a um nau him himle mu ding a um ta puai. Himaleh, zia milim hun sepnawn suangtum chu mual lian tak hung suak in, lei chung pumpi a hun lua suak tai.

³⁶La mang chu zia chu ahi: Tu’hin lengpa kiang in a hilchetna hun gen ding ka hiu.

³⁷Nangma, aw lengpa, lengte zosia chung ah lengpa, van Pathian in la kiang in lenggam, thilhitheina, hatna leh lopina a hun pia’n,

³⁸khawi ah chêng hitaleh mihingte, gamlak ah gamsa chi tinte leh chunglêng vachate zosia chung ah vaihawmtu hiding in lal in a hun koi a: a luchang sana chu nangma la hi.

³⁹La nung hin nangma sâng ah thupilo zaw lenggam khat hung dingdok kit intin; ahi’n, lenggam pathumna lei chung zosia ah vaihawm ding, sum-eng lenggam chule hung um ding ahi.

⁴⁰Chuleh, lenggam pali’na, thîk gual ah hat hung um intin; thîk in thil a khet gawp ah, a khet nawn gei gui gual hin a dang zosia chu hun khen nawn dim dem in a.

⁴¹A kengpêk leh a kengzungte, thîk tawh tungman kihel la mu gual khan, lenggam chu khen jak hita’n a; himaleh, a lak ua khenkhatte chu thîk gual ah hat lawi um in au, thîk tawh tungman kihel khawm la mu gual ah khan.

⁴²A kengpêk ah a kengzungte, thîk leh tungman kihel ahi gual in, lenggam chu hatna tiang nei, dêngdelna tiangle nei hi kit ding ahi.

⁴³Thîk tawh tung kigawm la mu gual ah chun, midang dang tawh kicheng pawl intiu in, thîk tawh tung a kimat tak tak thei lo gual hin, kigawm khawm thei tak tak diak pua’n au.

⁴⁴Chuleh, zia gual ah lengte um sung ah chun, van Pathian in lenggam khat hun tungdok intin, zia chu kuama’n susia thei pua’n tiu in, zia lenggam chun kuama â ding khêk ta pua’n a. Zia lenggam chun lenggam dang zosia khen nawn dim dem in, subei zo ta’n a; ama chu vang kumtuang in umden ta’n a;

⁴⁵khut ah kisêk hilo, mual ah kipat suangtum hung kilîk in, thîk leh sum-eng leh, tung leh dangka leh, sana hun sep nawn dim dem la mu gual ah chun, hung um ding ahi. Pathian lopi tak chun, tu’nung ah bang gual thil hung um ding a hem ti, lengpa a hun hiatsak ahi chu lam. La mang ah la mu ngei leh a hilchetna chule a dik tak ahi, ti’n a dawnhu tai.

⁴⁶Ziaphatchun, Lengpa Nebukadnezar chun a mâi ah lei tual si’n, Danial chu chibai a bûk ta’n; chuleh, thâi thillat leh gimtui a kiang ah lân dingin thu a pia tai.

⁴⁷Lengpa chun Danial kiang in, “La Pathian chu pathiante zosia Pathian leh, leng zosiate chung ah Lalpa leh thugûk zosia taklangpa chu ahi ngut ngei hi, nang in zia thugûk chu la hun tâklang thei ta mai in!” a tia.

⁴⁸Tichun, lengpa chun Danial chu a koisâng ta’n, thilpiak thupi tak tak le a pia’n, Babulon lenggam zosia chung ah vaihawm ding leh, Babulon mipilte zosia chung ah thunei in a koi tai.

⁴⁹Danial in lengpa kiang ah a dotna dungzui in, Sadrak, Meshak leh Abednego te chule Babulon gambung ah vaihawm dingin a pansak tai. Himaleh, Danial chu vang, lengpa Inpi sung in a umden tai.