Read Vaiphei DANIAL 3 Bible Online

DANIAL 3 - Vaiphei bible

DANIAL 3

¹Lengpa Nebukadnezar in milim lian tak, a sân dan tong sawmguk leh a vai tong guk in a siam a; zia chu Babulon gam sung ah Dura phâijawl in a koi a.

²Lengpa Nebukadnezar in gambung tin awpte leh a kithuapite, thudot mite, sumkolte, thutante, vaihawmte leh a gam sung ah milian milal zosia chu, a milim tundaw latna pang chiat ding ah ko khawm dingin mi a sawldok a.

³Tichun, gambung tin awpte leh a kithuapiteu, thudot mite, sumkolte, thutante, vaihawmte leh a gam sung ah milian mi lal zosia Lengpa Nebukadnezar milim siam latna pang dingin a hung khawm tau a. Nebukadnezar milim siam âng ah chun a ding chiat tau a,

⁴tângsam pa chu ngai tak in a hung kiko ah, “Aw mitin, namtin leh pau tinte haw,

⁵pengkul, lilu, tingtang, gawsem, nawt git leh tumgit pêng ni neite leh thil githei chitin git la het phat ua leh, Lengpa Nebukadnezar milim siam ma-âng ah la bawkhup chiat ua, la biak diu ahi.

⁶Kua hileh, bokkhup ah, be nuam lo taphot chu kin tak ah tum meipi sung ah se’lût ngal ding ahi,” a hun tia.

⁷Ziaziakchun, mipite zosia’n pengkulte, lilute, tingtangte, gawsemte, nawtgitte leh thil githei chitin git a het phat un, mitin, namtin leh pautin ah mite chu Lengpa Nebukadnezar milim siam ma-âng ah bokkhup in, a ho chiat tau a.

⁸Zia hun ah chun Kaldai mite lak ah khenkhat hung pawtdok in, Judate chu a hung hêk tau a.

⁹Lengpa Nebukadnezar kiang in, “Aw lengpa, damsawt in!

¹⁰Aw lengpa, nangma’n thu la pia’n, mi zosia’n pengkulte, lilute, tingtangte, gawsemte, nawtgitte, tumgit pêng ni neite leh, thil githei chitin a het phat phat uh leh, tual ah bokkhup in, sana milim a ho chiat ding uh ahi;

¹¹chuleh, kuale bokkhup ah ho lo taphot chu, meipi kuang sung ah se’lût ngal ding ahi, ti in.

¹²AW lengpa, Babulon bial ah vaihawm ding ah la guatte lakah Juda mi, Sadrak, Meshak leh Abednegote hin la thupiak a ngaisak puau hi; amau hin la pathian na a sêm nuam puau ah, la sana milim siam le a ho nuam puau hi,” a hung tiu a.

¹³Tichun, Nebukadnezar lungna talua’n, Sadrak, Meshak leh Abednego chu hun pui lut dingin thu a pia’; tichun, ziate chu lengpa kiang in a hun pui lût tau a.

¹⁴Nebukadnezar in a kiang un, “Aw Sadrak, Meshak leh Abednego, ka pathian na la sêm nuam puau in, ka sana milim siam le la ho nuam puau ti thu ka la het hi a dik em?

¹⁵Tu’hin, a la kiging unla, pengkulte, lilute, tingtangte, gawsemte, nawtgitte, tumgit pêng ni neite leh thil githei chitinte git la het phat ua leh, bokkhup unla, ka milim siam hi bia un; chutileh, bangkim pha mai ding ahi. Ahi’n la, la biak nop lo uh leh vang, meipi kuang sung ah kin tak ah selut ziang ding la hiu, ka khut ah kipat nang uh hukdok thei ding pathian chu kua a hem?” ti’n a gen a.

¹⁶Sadrak, Meshak leh Abednego chun lengpa kiang in, “Aw Nebukadnezar, zia thu ah hin la âng ah ka kilep uh a ngai puai.

¹⁷Aw lengpa, a na ka sep uh Pathian chun meipi kuang lak leh nangma khut ah kipat ei hukdok thei ahi chun, ei hukdok mai hen.

¹⁸Ahi’nla, a chutilo tâk leh le, Aw lengpa, la pathian na chu sêm pua’ng ka tiu in, la sana milim siam chule ho diak lo ding ka hiu ti he ta’n,” ti’n a dawnhu tau a.

¹⁹Ziaphatchun, Nebukadnezar chu Sadrak, Meshak leh Abednegote chung ah lungna talua’n, a mêl a danglam hial ziang ta’n. Meipi chu ale’sagi ah tik sa zaw dingin thu a pia’n;

²⁰sepai ama vêngte lakah a hatpen pente chu Sadrak, Meshak leh Abednegote nungkale kân ah, meipi kuang lak ah sep lut dingin thu a pia tai.

²¹Tichun, zia mite chu a puanâkchual uh tawh, a tawka chual uh tawh, a lukhuk uh tawh, a kithuamnau dang zosia pum ah nungkale kân in, meipi kuang lak ah chun a sep lut tau a.

²²Lengpa thupiak a chan-gan tawh, a meipi kuang sat huai siat ziak in, Sadrak, Meshak leh Abednegote sep lut ding ah domte chu meipi kuang chun a hul lum tai.

²³Himaleh, Sadrak, Meshak leh Abednegote lawi chu a khut uh kânsa’n tummeipi kuang sung in a sep lut tau a.

²⁴Ziaphatchun, Nebukadnezar in maksa talua’n a dingdok ah. A thudot sek mite kiang in, “Meipi lak ah khut nungkale kân ah I selut uh kha mi pathum hilo a hem?” ti’n a dong a. Amau inle, “Aw lengpa, a dik hi,” a tiu a.

²⁵Ama chun, “A leh, bangma khawk sa lo hial in, meipi kuang sung ah mi pali, a kikânnau le um talo ah vâk tawl tawl ka mu’n; a pali’napa vang chu pathian a bang hi,” a hun ti tai.

²⁶Nebukadnezar in meipi kuang lûtna kotkhak chu a nai phei ah, “Chungnung pen ah Pathian nasêmte Sadrak, Meshak leh Abednego hung pawt un! Zia hin hungdok un!” ti’n a ko a. Tichun, Sadrak, Meshak leh Abednegote chu meipi kuang lakah kipat chun a hung pawtdok tau a.

²⁷Gambung awpte leh a kithuapiteu, thudot mite, sumkolte, thutante leh vaihawmte zosia a hung khawm un, zia mite chung ah chun mei in bangma thilhitheina a nei puai; a luchang ua samzang le a kângkin pua’n, a puanâk chual uh le bangma a tipua, mei gimle a nam puau ti a mu chiat tau a.

²⁸Nebukadnezar in, “Sadrak, Meshak leh Abednegote Pathian chu pâk in um ta hen! Ama’n a vansawlchâk hun sawl in, ama muangah a nasêmte, lengpa thupiak le jalo ah a Pathian uh tilo pathian dang nasep leh ho sâng ah, a taksau pedok ngam zaw te chu meipi lak ah kipat in a hukdok ta’ngal in.

²⁹Ziaziakchun, thupiak ka bawl tai: mitin, namtin leh pautin lak ah kipat Sadrak, Meshak leh Abednego Pathian gensia thugen taphot chu sât tel in um hen la, a In uh le suksiat ding ahi; zia gual ah hukdok thei pathian dang him him a um paw’ngal in,” ti’n a gen tai.

³⁰Tichun, Sadrak, Meshak leh Abednegote chu lengpa’n Babulon gambung chung in a kaisânsak tai.