Read Vaiphei DANIAL 7 Bible Online

DANIAL 7 - Vaiphei bible

DANIAL 7

¹Babulon Lengpa Belshazzar lal kum khatna’n, Danial in a lupna chung ah lum ah, a ngaituana leh a mang ah thil a mute chu. Zia a mang chu a zikdok ta’n:

²Keima Danial in, ka gaulam ah jan ah ka thil mu’lawk ah chun, van ah hui palite hung nung in, tuisuagiat lian tak chu a hun mût nawk zung zung a;

³chuleh, tuisuagiat ah kipat in, gam sahâng pali, a kibang lo ngen hung pawtdok ka mu hen.

⁴A masa pen chu sakeibaknei mêlpu, mupi thâ gual a nei in. Ka et zing lai in, a thâte chu baw thâk in a hung um ah; chuleh, lei tual ah kipat dopdaw in a um ah, mihing gual in a keng pani’n dinsak in a um tai; chuleh, a kiang in mihing ngaituana lungthim piak in a um tai.

⁵Gam sahâng dang khat, a pani’na chu savom tawhbang a hi’n. A nung lam keng ah dingin, a hâ te kikâl in hapi pathum a um a; chuleh, a kiang in, “Tho inla, mi tam takte taksa vane zo in,” a tiu a.

⁶Ziazaw chun, ka et zing leh a dang pakhat, gialbem tawhbang khat a hung pawtdok a. Zia gamsa chun a nungjang ah vacha thâ gual thâ pali tawh luchang pali a nei ah; chuleh, a kiang in lalna piak in a um a.

⁷Zia nung chun, gaulam ah jan ah ka thil mu’lawk lak ah gamsa, a pali’na chu ka mu ta’n; tizat um, lau um tak leh hât mêl pu ma ma khat ahi. Thîk hâ lianpi a nei ah, a nêk tâk chu a thainêl ah, a nêkbang cheng a chuanchil tai. A masang ah gam sahâng dangte kha tawh a kibang pua’n, kî le sawmkhat a nei hi.

⁸A kîte chu ka ngaitua zing lai in, a kî chuam, neucha khat, a dangte lak ah kipat chun a hung dawndok ah; zia kî neu hung pawtdawna mun ah kî dang pathumte chu a zung pum in bawdaw in a um tau a. Zia kî neu ah chun mihing mit gual gual leh, chapo tak ah thugenna kam le a um a.

⁹Ka et zing leh, lalchutphate a hung kidaw a, Tuan ah tâng ah mi chun a lalchutpha a hun lua ah, a puan chu vûk gual in a vâm a, a sam chu samul vâm a bang hi; a lalchutpha meikuang ahi’n, a kengte le meikuang ahi.

¹⁰A ma-âng ah kipat in mei a hung pawtdok in; a sâng ah mun sâng tam takte’n a na a sep piak un, a kiang in a sîng ah mun sîng tam takte a ding kîmvêl ui. Thutanna hun a pan un, lekhabute a phêt tau a.

¹¹Kî neucha’n chapo tak ah a thugen git husa ziak ah chun ka en zing a. Ka et zing lai in, gam sahâng chu thalup in a um ta’n; a taksa chu suksiat ah um in, meikuang ah hâltum dingin a pedok tau a.

¹²Sahâng dangte chu, a lalnau lâk mang in a um un, a hinnau vang hun khat leh a kim khat â ding ah hisau a hiu.

¹³Jan ah kilâkna ka et zing lai in, van sûmpi lak ah mihing mêlpu pakhat ka vak mu’n. Tuan ah tâng ah mi kiang lam a zuan in, a ma-âng in a pui lût tau a.

¹⁴A kiang ah vaihawmna, lopina leh lalna piak ahi’n; tichun, mi zosia, nam zosia leh, pau zosia’n a na a septheina ding un. A vaihawmna’n kumtuang a dai in, tawp ngai ngai pua’n a; a lalna le hisiat thei hipua’n a.

¹⁵Keima Danial chu ka ngaituana a buai ma ma ziang ta’n, ka kilâkna mute chun ei sulau ma ma hi.

¹⁶A sontawlawiteu lak ah khat ka vak nai ah, zia thil chu bangtidan a hem ti’n ka dong a. Tichun, thil umdan zosia ei hilchian piak tai:

¹⁷“Zia gam sahâng pali la mute gual ah chun, lal pali lei ah hin hung pawtdok ding a hiu a.

¹⁸Himaleh, Chungnung pen ah Mithiangtho chun lenggamte chang intin, kumtuang tiang in changden ta’n a,” a hun ti tai.

¹⁹Ziaphatchun, gam sahâng a pali’na, a dangte tawh kibang lo, tizat um ma ma, thîk hâ nei ah, sum-eng tin nei, a bân ah ne zo pek leh puaitel zo, a nêkbang cheng a keng ah chuanchil ziang pen chungchâng chu ka hechian nuam ma ma ta’n;

²⁰chuleh, a luchung ah kî sawmkhatte leh a dang pakhat, a hung dawn daw’na ding ah thugenna kam le nei, a dang cheng sâng ah thupi zaw hileh kilawm chungchâng chule ka he nuam ma ma ta’n.

²¹Chutia, ka et zing leh, zia kî chun mithiangthote a hun do ah,

²²Tuan ah tâng ah mi a hung phat ah chun, Chungnung pen mithiangthote chung ah vaihawmna piak in a um ta’n; amau chu a zo ta mai a; chuleh, mithiangthote lenggam a channa ding hun uh a hung tung tai.

²³Zia gual hin a hun gen a: “Gam sahâng a pali’na â dingin, lenggam dangte tawh kibang lo tak, khawvel ah lenggam a pali’na hung um ding ahi; ama’n khawvel pumpi vaihawm intin, chuanchil in, puaitel dik dek ding ahi,” a tia.

²⁴Kî sawmkhatte chu: Zia lenggam ah kipat chun lal sawmkhat, hung pawtdok intiu in, ziate nung ah chun a dang khat hung pawtdok in a. Zia pen chu a masa haw tawh bang pua’n tin, ama chun lal pathumte chu subei ta’n a.

²⁵Ama’n Chungnung Penpa demna thu gen intin, Chungnung Penpa mi thiangthote suchau zo ta’n tin, hunbî thiangthote leh dante chu, hun sukdanglam gua’n tin; chuleh, mithiangthote chu a thunuai ah, hun khat, hun ni leh a kimkhat sung piak hi’n au.

²⁶Ziaphat chuleh, vaihawmna pat hi’ntin, a lenggam chu lâkpiak in hâltum ding leh, suksiat dik dek dingin lâkpiak hita’n a.

²⁷Van nuai khawvel ah lalna zosia leh thuneina zosia, Chungnung Penpa mi thiangthote kiang ah piak hita’n a; a lenggam chu kumtuang lenggam hita’n tin, thuneina zosia’n ama na sêm in, a thu mang ta’n au, ti in.

²⁸Zia tiang ah chun a thu a tawp tai. Keima Danial vang, ka ngaituana’n ei hi’lau ma ma in, ka mai a hung dâng hial tai; himaleh, zia thu chu ka lungthim in ka vop zing tai.