Read Vaiphei DANIAL 8 Bible Online

DANIAL 8 - Vaiphei bible

DANIAL 8

¹Belshazzar a lal kum thumna chun, keima Danial kiang ah thil khat musak ah ka um nung in, a dang khat ka mu kit a.

²Mu’lawkna ka thil mu chu ka et leh, Elam gam khawpi Susa ah Ulai lui pang ah um in ka la kimu’n.

³Ka dakdaw leh lui pang ah belamchal khat ka vak mu’n. Ama chun kî pani a nei in. A kî teni chu a sau gêl un; himaleh, khat chu a sauzaw’n, a sauzaw chu a hung dawkdok nunung zaw ahi.

⁴Zia belamchal chun tumlam, mallam leh simlam vaksi’n ka mu’n. Gam sahângte lak ah khat chan le a lang zo puau hi; ama ah kipat hukdok thei le a um puau hi; a nop dan dan in a bawl ah, a hung hât ma ma tai.

⁵Ka ngaitua zing lai in, tumlam ah kipat in kêlchal pakhat, khawvel pumpi hun paltheng ah, lei tual le chuan kha man lo ah kin tak ah hung pawtdok ka mu’n. Zia kêlchal chun a mit teni kikâl in kî pakhat a nei a.

⁶Lui pang ah belamchal pakhat, kî pani nei ka mu chu a hun zuan a; tichun, a hat theitawp in a hun del ta’n.

⁷Belamchal kiang a hung tun chu ka mu’n. A chung ah lungna ma ma in belamchal chu a si’n, a kî teni chu a sîtbot piak tai. Belamchal chun a zawtheina ding thahâtna him him a nei ta pua; belamchal chu lei tual in a septha’n, a chuanchil ta, a khut ah kipat belamchal hukdok thei ding kuama a um puai.

⁸Ziaphatchun, kêlchal chu a hung khanglian ah; himaleh, a thahât lai tak in a kî challang tak chu a hung bong ta’n; chuleh, a kî umna chun kî kilang tak mai pali, van ah hui palite lam ngat in a hung pawtdok kit tau a.

⁹Zia kîte lak ah pakhat ah kipat chun, kî neucha a hung pawtdok kit a; zia chu mallam, sualam leh gam mêlpha lam zuan in a khang ma ma a.

¹⁰Van ah umte chan in a khang a. Van ah umte khenkhat leh aksite lei tual a paitha’n, a chuanchil tai.

¹¹Van ah um pawlte hotupa chung natiang in kisathei tak in a um a; nisi’n hâlmang thillat chu a lâkpiak ah, a mun thiangtho chule a paithâk piak tai.

¹²Nisi’n hâlmang thillat bawl zing sâng in gitlona’n a dim tau a; dikna bangma’n a ngai ta pua’n, a kiheina lam taphot in a lamzang ma ma a.

¹³Ziaphatchun, mithiangtho khat in thu a hun gen ah, zia thugenpa kiang ah chun, a dang khat in a hun dawnhu kit chu ka hia’n: “Hâlmang thillat thu leh thil phalo bawl ziak ah nutsiana leh mun thiangtho leh van hotu tawdenna la mu kilâkna hi bang chan hiding a hem?” a hun tia.

¹⁴Chuleh, a hun dawnhu a: “Jing kalte leh nitâkte sang ni leh za thum bei nung leh mun thiangtho chu a umna ding tak ah tundin kit hita’n a,” a hun tia.

¹⁵Keima Danial in, mu’lawkna ka mu zaw phatin a umzia het ka gua’n. Ziaphatchun, mihing mêlpu khat ka âng ah dingin a hung kilang a,

¹⁶chuleh, Ulai lui pang ah chun mi pakhat in, “Gabriel, zia pa chu a mu’lawkna a mu chu vak hilchian piak in,” ti ah hung kiko ka hia’n.

¹⁷Tichun, ka dinna mun lam nai in a hung ah, ka kiang a hung tun phatin ka ti a za ma ma ah, lei tual in ka bokkhup ta mai a. Himaleh, ka kiang in, “Aw mihing thi thei, kilâkna la mu kha huntawp lam ah thil tungding ahi ti hia’n,” ti’n ei hun ho a.

¹⁸Ei kihopi phatin, ka mai ah lei tual si’n khawhelo in ka um ta’n; ziaphatchun, ei hun khoi ah, ka keng in ei hun dinsak ta.

¹⁹Ka kiang in, “Ngai in, lungnatna hunbî a hung tun phat leh, bang gual ah thil hung um ding a hem ti hun hil ing ka; huntawp lam ah thil tung dingte chu guatsa ahi ta’ngal a,” a tia.

²⁰Belamchal kî pani nei la mu kha Media leh Persia lengte a hiu.

²¹Kêlchal chu Grik lengpa ahi’n, a mit teni kikâl ah kilang tak ah a kî hung dawndok chu a leng masa pen uh ahi.

²²A kî pakhat botna mun ah kî dang pali hung dawndokte chun, ama chipite lak ah kipat in ama thahâtna pang lo ah lenggam pali hung dingdok ding a hiu ti’na ahi.

²³A vaihawmnau tawp lam ah chun, bawsiatnau in a tawp khawk a tun phatin, lal huham tak leh mi thep thiam tak khat hung dingdok in a.

²⁴A thilhitheina khang intin, a thil hisiatdan tizat a um in, a thilbawl taphot in lamzang in a. Ama’n mi thilhitheite leh, a thiangtho pa mipite chule hisia’n a.

²⁵A dawhathûk ziakin a mithepna lam in lawting ma ma intin, ama lunggêl in thupi kisa’n a. Hetlawk umlo in mi tampi that intin, Chamna lal chapa nasan do dingin kipan in a. Himaleh, ama chu mihing khut pang lo ah suksiat in hung um ta’n a.

²⁶Nitâk lam leh jingkal lam thu, mu’lawkna la kiang ah hun kihil hi a dik ahi. Ahi’n la, ni tam tak nung lam ah thil hung um ding kigenna ahi ziakin, nang in vang la thil mu hi îmchak phot mai in, a hun ti tai.

²⁷Tichun, keima Danial chu lungkham in, ni bang jat a hem damlo in ka um tai; ziaphatchun, ka thodok ah, lengpa na ka sêm pan kit tai. Himaleh, ka thil mu’lawk chun ei sulungjing ma ma ah, ka hilchian thei him him puai.