Read Vaiphei HOSEA 10 Bible Online

HOSEA 10 - Vaiphei bible

HOSEA 10

¹Israel chu grep gui pha tak, ga nuam ma ma gual chu ahi. A ga tam po leh mâichâm a siam tam in; a gam a masawn po leh dawikhuam a siamphau a.

²A lungthim a dik pua’n; a gitlo man mu ngei in a. LALPA‘n a mâichâmteu hi’chim intin, a kithoina suangphute chule hi’sia’n a.

³Tu’hin amau in, “LALPA I lau lo ziak un leng nei lo I hiu, lengpa chun bang ei bawl piak thei ding a hem?” ti’n au.

⁴Thu mai mai a gen un, zuau ah kitiam in thuthungte a siam un; loulai ah jawtlam kuak sung ah, sachik gûnei gual in kihêkna a hung pawtdok hi.

⁵Beth-aven ah bawngnote ziakin, Samaria ah chêngte chu lau in a kithing tau hi. A mipite chun sûn intiu in; a lopinau amau ah kipat lakdaw ah a um ziakin, a milim ho’na thiampute chun amau chu kâ in’au.

⁶A milim ho uh chu Assuria gam lam ah, leng lopi tak golgûkna ding ah puak tung hi’n a. Ephraim chu mualpho tak ah koi hi’ntin, Israel in a milimte chu mualphopi ta’n a.

⁷Samaria lengpa chu tuipi chung ah, thinghal gual in mangthai ta’n a.

⁸Israelte gitlona, Aven, munsângte chu suksiat hita’n a. A mâichâm umna mun in ling leh lênling kek in a. Tângte kiang ah chun, “Ei khu un,” mualte kiang ah chun, “Ei delkhum un,” ti ta’n au.

⁹Aw Israel, Gibeah hun ah kipat khan la gilo tau in; zia kipat khan la gilo den tau hi. Gibeah ah chun kidona’n amau hun huam lo ding a hem?

¹⁰Mi chanlam beite gawt dingin hung ding ka hi; a gitlonau ziak ah a le’ni ah, amau chu gawt ah do dingin, namdangte pui khawm hi’n au.

¹¹Ephraim chu bawnglâ lâk nguaisa, buchil thanuam tak chu a la hi’n, a ngawng hoi tak chu ka la hawi ta’n; tu’n Ephraim in lei let intin, Judah in lou kai in a; Jakob in ama â di’n lei kikhet nêl ngei in a.

¹²Dikna nang uh â dingin kituu inla, ja’ngaina ât tau in; la pâmtûl lou uh kikhet nêl tau in; LALPA chu a hung ah, la chung ua dikna gua a zuk sak theina dingin, ama chu hawl hun ahi.

¹³Nunsiatna lei la let un, diklo’na ga la luak un, zuau’na ga la neu hi. La hatnau leh la sepaiteu tam in la ki-ngau in,

¹⁴Ziaziakchun, la mipite do-na ding ah, kido’na thawmgi hung um intin; chuleh, Shalman in kido ni ah Beth-arbel a suksiat ah, nute chu a chateu tawh khet gawp a hilai gual uh khan, la kulpiu zosia suksiat hita’n a.

¹⁵Aw Bethel, la nunsiatna a nasat ziakin, la chung in zia gual chu hung tung in a. Phalvak in Israel lengpa chu sât thâk in um ta’n a.