Read Vaiphei HOSEA 13 Bible Online

HOSEA 13 - Vaiphei bible

HOSEA 13

¹Ephraim in thu a gen phat leh midangte a kithing sek un; Israelte lak ah nasa tak ah choisân a la hiu. Tu’hin, Baal ah a kisukbuak phât un, a thi khawlaw tau hi.

²Tu’tiang hinle thil phalo a la bawl nalai un, amau lemhiatna dungzui in dangka thîk milimte, khutthiamte khutsuak in a kisiam tau hi: “Ziate kiang ah hin kithoina thilpiakte chu lân un,” a tiu a. Bawngno lim chu mipite’n a chawp tau hi!

³Ziaziakchun, amau chu jingkal phâisûm a hem, jan dâichîm bei kit pai ziang sek gual a hem leh, phual ah busi hui in a mut mang gual leh, tukvan ah meikhu leng mang gual chu hi’n au.

⁴Ahi’n la, kei chu Aigupta gam ah kipat, LALPA la Pathian uh ka la hita’n; kei tilo Pathian dang la hepuau in; chuleh, kei ti lo hukdampa dang le a um puai, ti la hiau a.

⁵Gamthip, gamkeu ah hun vâkvâpa kha keima hi ka hi.

⁶Amau ka vâk lai khan a vâ un, a lungkim ma mau a; a vâ phat un a lungthim uh a hung chapo ta’n; tichun, ei hemil kit ta mai sek ui.

⁷Tichun, amau â ding ah sakeibaknei gual hi’ng ka tin, gialbem gual in lam pâm ah la châng ing ka.

⁸Savom no kiluak gual in amau chu man ing ka tin, a lungchang tuamnau chu puai thêk piak ing ka; sakeibaknei in a nêk zaw gual in, amau chu val zo ing ka tin, gamsa’n a puaitel gual in hun puaitel ding ka hi.

⁹Aw Israel, hun susia ding ka hi; kua’n hun panpi thei ding a hem?

¹⁰Nang hun hukdok ding la lengpau chu tu’hin khoitak ah um a tam? “Lal leh vaihawm ding ei pia’n,” la ti sek, khawpi sung ah lal leh vaihawmtu chu, khoi lam tung ahi tam?

¹¹Lungdam lo kawm in lal ka hun pia’n, hachangthak in ama chu ka lamang kit tai.

¹²Ephraim diklona chintup ahi’n, a gitlonate chu koitup ahi.

¹³Numei nauvei natna gual a chung in a hung tung a; himaleh, ama chu chapa ngol ahi. A pian hun tak in nau pianna kot lam a hun zuan ta puai.

¹⁴Sheol thuneina lak ah kipat in amau tandok ding ka hem? Thi’na kipat amau hukdok ding ka hem? Aw thi’na, khoi ah hem la gû chu? Aw Sheol, khoi ah hem la suksiat theina chu? Lainatna kiti chu ka mai ah kipat in sêl mang ahi tai.

¹⁵Hambuk lak ah hampa gual in nîm dep dup maleh, LALPA huizang, sualam hui gamthip ah hung kipan chun hun mut intin, a tuinâkte hung kang intin, a tuihing luite chu hung keugawp ta’n a. A gam sung ah golûl pente chu chawm nâm piak hita’n a.

¹⁶Samaria chun a gitlona maw kipuak intin, a Pathian chung in a hel ta’ngal a; chemjam ah satlup hi’ntin, a chasenteu chu jeptel in um intiu in, numei nauvop laite chu phildok hi’n au.