Read Vaiphei HOSEA 14 Bible Online

HOSEA 14 - Vaiphei bible

HOSEA 14

¹Aw Israel, LALPA la Pathian lam ah hung kile’kit ta’n; la thulimlo’na ziakin la kipal pûk ta ahi.

²Thupha chawi in hung kile’kit inla, LALPA kiang in: “Ka mawnau zosia lamang inla, a pha taphot chu pom inla; tichun, ka mûk gateu chu thillat in hun pia ta’ng kau.

³Assuria in ei hukdam pua’n tin, a sakol chung ah chuang pua’ng kau; ka khutsuakteu kiang in, ‘Ka Pathian uh la hiu,’ ti ta pua’ng kau. Nangma ah chun nauchagate’n, ja’ngaina a mu sek ngal un,” ti in.

⁴A thutak lonau ah kipat in sudam ing ka tin, a thawn in amau hepi ta’ng ka; amau chung ah ka lungnatna a bei ta ngal a.

⁵Israelte â dingin jan daitui gual hi’ng ka tin; lili gual in hung pâk lûn intiu in; Lebanon gammâng thing gual in zung khaw in au.

⁶A selthakte chu hung jamdok intin, Oliv gual in hung mêlpha’n tin, Lebanon tâng gual in hung gimtui in a.

⁷Ka lîm nuai in hung chêng kit intiu in, huan gual in hung nîm dip dep in au; grep gual in hung no thak kit in, a gimtui uh chu Lebanon uain gual hung hi’n a.

⁸Aw Ephraim, milimte chu ka bang ah pang ding a hem? Nangma dawnhu ah, hun vêngpa chu keima ka hi’ngal a. Châk thing hing zing gual chu ka hi’n, la ginumna chu keima ah kipat hung ahi.

⁹Mipil taphot chun ziate hi hechian tau hen; hiatthiamna nei taphot in zia chu he tau hen. LALPA lampite chu a dik in, mi dikte’n zia chu a haw un; himaleh, bawlsiate vang, zia chun a kipal pûk sek ui.