Read Vaiphei HOSEA 2 Bible Online

HOSEA 2 - Vaiphei bible

HOSEA 2

¹La suapipa kiang in, Ammi ti’n la; chuleh, la suapinu kiang in, Ruhamah tiu in.

²La nuu hi gen piak unla, ama chu ka ji a hipuai ti hil un; keile a pawsal ka hita pua’n, a mai ah kipat in thanhuaina mêl haisan hen la, a ânglai nopna kipat in thanhuaina hi paitha ta hen;

³achutiloleh, ngawnchang in koi ing ka tin, a pian ni gual ah ngawnchang in umsak ing ka tin; gamthip gam gual in siam ing ka tin, gam keu gual in umsak ing ka tin, dangchâk ah thi’sak ding ka hi.

⁴Thanghuainu chate a hiziak un, A chate chung ah le lainatna nei pua’ng ka.

⁵A nuu chu a thanghuai sek a, amau vopnu chu jachâk um tak in a um tai. “Ka an leh ka tui, ka samul leh ka pat, ka sathau leh ka dawn ding ei pete, ka hepite delzui ing ka,” a ti’ngal in.

⁶Ziaziakchun, a lampi chu ling in dâl ing ka tin, ama dâl in bâng khat siam ing ka tin; a lampite muthei pua’n a.

⁷A dawichâkte chu delzui intin, himaleh, delpha pua’n a; amau hawl intin, himaleh, mupha pua’n a. Ziaphat chuleh, “Ka pawsal masa kiang in vaikit ing ka tin, tu’sâng hin tu’ma kha kei â di’n a phazaw ngal in,” ti’n a.

⁸Bu te, uain te, sathau te, chuleh, Baal â ding ah a mat uh, dangka leh sana sukpun piak chu, keima ka hi ti amanu’n a hepuai.

⁹Tichun, ka bu chu a hun takah ka uain le a hunbî ah, la kit ing ka tin, ka samul leh ka patle, a ngawnchang khu’na dingte lamang ding ka hi.

¹⁰Tu’n, a dawichâk te mit mu in, a jachâk umna chu hi’lang ing ka tin; ka khut ah kipat in kuama’n hukdok pua’n a.

¹¹A kipakna hun zosia, a kûtte, a thathakte, a sabbath nite leh, a gualnop nibîk zosiate sukbei piak ding ka hi.

¹²A grep gui te leh theipikung te chu: “Ziate hi ka dawichâkte ei piak, ka law dawte chu a hiu hi,” a ti chu hi’siat piak ing ka. Gammâng in siam ing ka tin, gamsate’n ne zo in au.

¹³Baalte â ding kût nite ziakin amanu gawt ing ka, zia hun ah chun ama khutsebi leh, suang mantamte’n a kichei in, a dawichâkte a vazui ah, keima ei hemil tai, LALPA‘n a tii.

¹⁴Ziaziakchun, tun ama jawl ing ka tin, gamthip ah pui ing ka tin, aw nem tak in ama jawl ing ka.

¹⁵Zia kipat chun a grep huante chu ama pia’ng ka tin, Akor phâile kinepna kotkhak in siam ing ka. Zia tak ah chun a khangdawn lai nite leh, Aigupta gam ah a hung pawt daw lai gual khan, La’n hun dawng ta’n a.

¹⁶Zia ni chuleh, “Ka Baal” ei ti lo in, “Ka Pawsal,” ei tizaw ta’n la, LALPA‘n a tii.

¹⁷A kam ah kipat in Baal minte chu lâk mang piak ing ka tin, a min uh genkhâk hita pua’n a.

¹⁸Zia ni chun gamsate, chunglêng vachate leh lei ah bokvâkte tawh thuthung nang â dingin siam ing ka tin; thalpite leh chemjamte; chuleh, kidona lei ah kipat in subei ing ka tin; bit tak in lup thâksak ta’ng ka.

¹⁹Kumtuang ah ka ji dingin hun la ta’ng ka tin; diktatna leh vaihawm dikna’n, hepina det leh jaidawna’n ka ji hiding in hun la ta’ng ka.

²⁰Ginumna’n ka ji hiding in hun la’ng ka tin; tichun, LALPA chu hun he ta’n la.

²¹Zia ni chun hun dawnhu ta’ng ka, LALPA‘n a ti’n; vante dawnhu ing ka tin, amau in ei dawnhu ta’n au;

²²lei in bu te, uain te leh sathau te hun dawnhu intin; amau in Jezreel hun dawnhu ta’n au;

²³chuleh, kei â dingin ama chu gam ah kitû ta’ng ka tin; Lo-ruhamah chu lainat ta’ng ka tin, Lo-ammi kiang in, “Nang ka mi la hi,” ti ta’ng ka. Ama’nle ka kiang in, “Ka Pathian la hi,” ei ti ta’n a.