Read Vaiphei HOSEA 3 Bible Online

HOSEA 3 - Vaiphei bible

HOSEA 3

¹LALPA‘n ka kiang in, “Chia inla, Israel mite’n pathian dang kiang lam ah ei kiheisan in, grep ho vaithumte ngaina ziang maleu, LALPA‘n amau a hepi tei tei gual in, jawlsai leh ângkawm lai numei pakhat vahepi in,” a ti kit a.

²Tichun, ke’nle zia nu chu dangka shekel sawm leh nga, chun barli bu te’na homer dim khat leh, uain te’na dim khat in ka vachaw ta’n.

³Chuleh, a kiang in ke’nle, “Kei â ding ah ni tam tak la um ding ahi; nawchi la zok tâk lo ding; chuleh, pawsal dang le la lupkhawmpi lo ding ahi; chutileh, hun um khawmpi ding ka hi,” ka ti ta’n.

⁴Israelte chu hun sawt tak leng leh lal chapa neilo in, kithoina leh dawikhuam bei ah, thiampu awmphaw leh milim pathian le nei lo ah hung um ding a hiziak un.

⁵Zia nung chuleh, Israelte hung kile’kit in, LALPA a Pathian uh leh David, a leng uh chu hun hawl ta’n au; ni nunung lam ah chun LALPA leh a phatna chu lau kawm in zuan in au.