Read Vaiphei HOSEA 4 Bible Online

HOSEA 4 - Vaiphei bible

HOSEA 4

¹Israel mipite haw, LALPA thu hi ngai un; zia gam ah chêngte hi, LALPA‘n thiamlo chansak in a awimaw hi. Zia gam ah hin ginumna leh thutakna a um ta pua’n; Pathian hetna le a um ta puai.

²Kihaksialna, zuautheina, tualtha’na, gukchakna leh ângkawmna a pung a; thisan sua’na chu thisan sua’na’n a zui hi.

³Ziaziakchun, gam chun a sûn in, a sung ah chêng zosiate chule a thavai zo tau hi. Gamsate, chunglêng vachate leh, tuisuagiat ah sanga zosia pum in mangthai ta’n au.

⁴Himaleh, kuama kina kiu inla, kuama kihêktua kiu in; aw thiampute haw, thiamlo ka chansak chu, nang ma ma hi la hi’ngal in.

⁵Sûn lai tak inle kipal pâi in la tiu in, jawlnei le nang tawh jan leh kipal pûk in lau, chuleh, la nu chu hi’mangthai ing ka.

⁶Ka mite chu hetna a tâksap ziak un sukmangthai a hiu a; nang in hetna la paithâk ziakin, ka thiampu la hi’na kipat in ka hun paitha tai. La Pathian dan la hetmil tâk ziakin, ke’nle la chate hemil ding ka hi.

⁷A pun po ua leh ka chung ah a gitlonau a pung in, a lopinau ziakin a mualpho tau hi.

⁸Ka mite gitlona chu kivâkna’n a mang un, a thulim lo’nau ah chun a huaihap ui.

⁹Mipite thok gual chu thiampute chung inle tung in a; a tawi dan dungzui un gawt ing ka tin, a thilbawlteu chu thuk ing ka.

¹⁰LALPA kiheimangsan ah, thanghuai tak ah a kipiak zaw tâk ziak un, Ne maleu vâ diak pua’n au; nawchizuak intiu in pung diak pua’n au.

¹¹Zu leh zu thak chun a hetthiamnau a lamang hi.

¹²Ka mite chun thing milimte po a dong un, a âisânnau mol chun thu a hil a. Nawchi zokna lungthim chun a pui mang a, a Pathian uh kiheisan in hukna’n a kihel thanghuai zo tau hi.

¹³Tângvûmte ah chun kithoina a lân un, gangpi thing, hiangpi thing leh thingbul lîm chu a nop ziakin. Mualte chung ah chun kithoina thilpiak a lân ui. Ziaziakchun, la chanuteu in nawchi a zuak un, la moteu inle jawl a sâi zo tau hi.

¹⁴La chanuteu nawchi man leh, la moteu a ângkawmnau chu gawt pua’ng ka; pawsalte le nawchizuakte tawh a kipui chuam un, tempul ah nawchizuakte tawh a kithawi khawm un; tichun, hetthiamna neilote chu a puksia tau hi.

¹⁵Aw Israel, nawchi zuak tama lechin, Judah vang thiamlo chang ki’hen. Gilgal ah lut kin la, Beth-aven ah le chia to kin, “LALPA a hin nâk leh,” ti’n kihaksial diak kin.

¹⁶Bawnglâ lochal gual in Israel chu a lu’lul hi; Hampa hing tamna mun ah belam pakhat um gual in, LALPA‘n amau chu tu’hin a vâk theina diam?

¹⁷Ephraim chu milim tawh a kizop un, a um um in, um mai tau hen.

¹⁸A zudawn uh a kichai phat leh, thanghuai tak in a kimang un; a lopinau sâng in a thanghuainau a ngaina zawu hi.

¹⁹Hui in a tha’te’n amau a tuam in, a mâichâmte u ziakin mualpho in au.