Read Vaiphei HOSEA 5 Bible Online

HOSEA 5 - Vaiphei bible

HOSEA 5

¹Aw thiampute haw, he tau in! Aw, Israel Inkuante haw ngaisak un! Aw lengpa Inkuante haw, a la ngaiphau in! Vaihawmna chu la chung un hung tung ding ahi ngal a; Mizpah ah thâng kikam leh, Tabor tâng ah lên kijak tawh bang la hitau in;

²Shittim ah kawkhûk thûk tak kicho gual chu la hiu; himaleh, a leng un gawt ding ka hi.

³Ephraim chu ka he hen, Israel chule kei ah kipat in sêlmang ahi puai; aw Ephraim, tu’hin nawchi la zawk tâk ziakin; Israel chule sukbuak ahi ta’ngal a.

⁴A thilbawlteu in a Pathian kiang ah a kile’kit ding uh a phal puai. Kizawk ut tun tunna lungthim a nei ziak un, LALPA a hepuau hi.

⁵Israel chu a chapona ziakin ama thiamlo a chansak in; Ephraim chu a thulimlona’n a kipal pâi hi; Judah le amau tawh a kipal pâi khawm hi.

⁶LALPA hawl dingin a belam honteu leh, a bawng honteu tawh chia intiu in, himaleh, mu zo pua’n au; amau a kilepdok san ta’ngal a.

⁷LALPA chung ah lepchia tak in a la tawi tau in; jaucha a la neisan ta’ngal un. Tu’hin, tha thak in amau chu a louteu tawh hun ne zo ding ahi.

⁸Gibeah ah belam kî mût unla, Ramah ah pengkul mût un. Beth-aven ah kigalginna mût unla; Benjamin, la nung lam en in!

⁹Gawtna ni ah chun Ephraim chu suksiat hung hi’ntin; Israel namte lak ah thil hung tung ngei ding chu ka hun puang hi.

¹⁰Judah leng chapate chu gamgi chawn mite gual a hiu in; a chung ua ka lungnatna chu, tui gual in buntha ding ka hi.

¹¹Ephraim in bangmalo mai a del tâk ziakin, nuaisia in a um ta’n; vaihawmna suksiat in a um tai.

¹²Ziaziakchun, Ephraim â dingin nget tawhbang ka hi’n, Judah Inkuante â dingin muatna ka hi.

¹³Ephraim in a natna a mu ah, Judah in a liamna a mu phât in, Assuria lam in Ephraim a chia ta’n, leng lopi tak kiang ah chun a sawl tai. Himaleh, ama’n nang hun sudam thei pua’n tin, la liamnale sukdam piak thei pua’n a.

¹⁴Ephraim â dingin sakeibaknei gual hi’ng ka tin, Judah Inkuante â dingin sakeibaknei vânglai gual hi’ng ka. Keima’n bottel in chia mang ta’ng ka; paw mang ing ka tin, kuama’n hukdok pua’n a.

¹⁵A hi’khelnau a hun hetdawu ah, ka mai a hun hawl masiau chu, ka umna lam ah kile’kit ing ka. A lunggimna ziak un ka doisakna chu hun don ta’n au.